1 Kɔ Isifu ɔŋkɔ pəluksɛ ti Firawona. K'oloku kɔ: «Awɛŋc im aŋa kɔ papa kem ŋander kəyɛfɛ ka atɔf ŋa Kanahan kɔ yɔcɔl yaŋan ŋkesiya, cir kɔ cəna kəbəp ka ca yaŋan fəp. Ŋayi tantɛ atɔf ŋa Kosɛŋ.» 2 Kɔ Isifu ɛlɛk awɛŋc aŋa kəcamət k'ementər ŋa Firawona. 3 Kɔ Firawona eyif awɛŋc a Isifu: «Ake 'yɔnɛ yɛbəc yonu-ɛ?» Kɔ awɛŋc a Isifu ŋaloku Firawona: «Sən' acar am, akɛk a ŋkesiya, cir kɔ cəna ŋɔ səyɔnɛ pəmɔ papa kosu aŋa.» 4 Kɔ ŋaloku sɔ Firawona: «Sənder kədendɛ atɔf ŋaŋɛ, bawo dəkəcɔl deyi fɛ sɔ nde acar am ŋayɛfɛ mɔ, kɔ dor dɛmbɛk kəbɛk dəm atɔf ŋa Kanahan. Məwosɛ oŋ acar am kəndɛ atɔf ŋa Kosɛŋ.» 5 Kɔ Firawona oloku Isifu: «Papa kam kɔ awɛŋc əm aŋa ŋander nnɔ məyi mɔ. 6 Atɔf ŋa Misira ŋey' əm dəwaca, mədəs papa kam kɔ awɛŋc əm aŋa nnɔ pəntesɛ ŋa Kosɛŋ mɔ, kɔ məŋcərɛ sɔ awɛŋc əm aŋa dacɔ afum alompu-ɛ, məcəmbər ŋa ŋackɛks' em yɔcɔl.» 7 Kɔ Isifu ɛŋkɛrɛ papa kɔn Yakuba kədementər kɔ Firawona. Kɔ Yakuba ontolanɛ Firawona. 8 Kɔ Firawona eyif Yakuba: «Meren cəke mɔ məyi doru-ɛ?» 9 Kɔ Yakuba oloku kɔ: «Meren mmɛ isɔtɔ kəcepɛ-cepɛ disrɛ mɔ, mɔsɔtɔ meren 130, kiyi kem doru kəŋcepər katəna-katəna. Iŋcepərɛnɛ meren meyeŋki kiyi kem doru. Intasɔtɔ fɛ meren mmɛ akombəra em ŋanasɔtɔ mɔ, mba tecepərɛnɛ doru tin tayi tɔ səŋcepərɛnɛ doru.» 10 Kɔ Yakuba ontolanɛ sɔ Firawona. K'ɛyɛfɛ, k'ɛsak kɔ.

11 Kɔ Isifu ɛndəs papa kɔn kɔ awɛŋc aŋa atɔf ŋa Misira. K'ɔsɔŋ ŋa antɔf Misira, nde atɔf ŋa Ramsɛs, pəmɔ tɔkɔ Firawona ɛnaloku kɔ ti mɔ. 12 Kɔ Isifu ɛntam oŋ kəgbɛkərɛ papa kɔn, awɛŋc aŋa, kɔ afum a papa kɔn fəp pəmɔ tɔkɔ ŋanalanɛnɛ mɔ.

13 Yeri yɛnayi fɛ sɔ atɔf ŋa Misira fəp, bawo dor dɛnasɔtɔ fənɔntər. Atɔf ŋa Misira kɔ atɔf ŋa Kanahan dor dɛŋclɛŋkəs oŋ kəlɛŋkəs dəm afum a tɔf yayɔkɔ. 14 Kɔ Isifu ɛwɛtəs gbeti fəp mbɛ bɛnayi atɔf ŋa Misira kɔ atɔf ŋa Kanahan mɔ. Pəcsəkpərɛ gbeti babɔkɔ malɔ, kɔ Isifu ɛmbɛrsɛ gbeti babɔkɔ nde kəlɔ ka Firawona. 15 Ntɛ gbeti ba Misira kɔ Kanahan belip mɔ, kɔ aMisira fəp ŋander nnɔ Isifu eyi mɔ. Kɔ ŋaloku: «Məsɔŋ su yeri! Cepɔ səndefi fɔr yam kiriŋ bawo gbeti beyi fɛ sɔ?» 16 Kɔ Isifu oloku: «Nəsɔŋ yɔcɔl yonu. Iŋsɔŋ nu kəcom kəsəkpɛ ka yɔcɔl yonu, bawo gbeti beyi fɛ sɔ.» 17 Kɔ ŋaŋkɛrɛ Isifu yɔcɔl yaŋan. Kɔ Isifu ɔŋsɔŋ ŋa yeri kəsəkpɛ ka yɔcɔl yaŋan: Fəlɛs, yɔcɔl yɛfɛt kɔ yɔpɔŋ, sɔfale. Kɔ Isifu ɔsɔŋ ŋa yeri ya teren tatɔkɔ kəsəkpɛ ka yɔcɔl yaŋan fəp. 18 Ntɛ teren tatɔkɔ teŋcepər mɔ, kɔ aka Misira ŋander sɔ nnɔ Isifu eyi mɔ teren tɔc-kɔsɔk. Kɔ ŋaloku kɔ: «Səfɔtam kəmɛŋkər əm a gbeti bosu belip, kɔ yɔcɔl yosu yelip. Daka o daka dɛŋcəmɛ fɛ su sɔ, mɛnɛ dis dosu kɔ ntɔf yosu. 19 Səndefi oŋ fɔr yam kiriŋ ba, kɔ ntɔf yosu? Məway su kɔ ntɔf yosu kəsəkpɛ ka yeri. Tɛm tatɔkɔ səyɔnɛ acar a Firawona, səna kɔ ntɔf yosu. Məsɔŋ su defet səbəc ta sədefi, ntɔf yosu yedefəntərɛ gbəlməs.»

20 Kɔ Isifu ɛwayɛ Firawona ntɔf ya Misira fəp, aka Misira fəp ŋanacaməs ntɔf yaŋan, bawo dor dɛnabɛkər ŋa. Kɔ atɔf ŋɔyɔnɛ oŋ ŋa Firawona. 21 Kɔ Firawona ɛlɛk afum aŋɛ ŋanayi dəcələŋcər ca Misira mɔ, k'ɛŋkɛrɛ ŋa sədare səpɔŋ. 22 Mba Isifu ɛnaway fɛ ntɔf ya Sali Almamye, bawo Firawona ɛnamɔnɛ kəway ka ntɔf yaŋan. Sali Almamye ŋayi kəkɛkəs ka Firawona disrɛ, ti tɔ Sali Almamye ŋanatɔcaməsɛ ntɔf yaŋan.

23 Kɔ Isifu oloku afum a Misira: «Iway nu mɔkɔ kɔ ntɔf yonu, nəyɔnɛ mɔkɔ aka Firawona. Defet dɛndɛ: Nəntam kəbɔf dəntɔf. 24 Kɔ nəndetɛl-ɛ, nəsɔŋ poboc pin pa kətɛl konu kɔ nəyer ki kəcamət-ɛ Firawona. Nəna nəlɛk yoboc maŋkəlɛ nyɛ, yendeyɔnɛ nu yeri ya dɛkɛr kɔ awut, yɔyɔnɛ nu sɔ defet da teren tɔcɔŋc.» 25 Kɔ ŋaloku Firawona: «Məluksɛ su kəyi doru! Səsɔtɔ kəŋaŋnɛnɛ ka wəbɛ kosu, səndeyɔnɛ wəcar ka Firawona.» 26 Kɔ Isifu ɛŋcəmbər ti kɔ tɔyɔnɛ mɔkɔ tɔyɔ ta Misira: Poboc pa kəcamət fəp pa Firawona pɔ. Mɛnɛ ntɔf ya Sali Almamye gbəcərəm yɔtɔyɔnɛ ya Firawona.

27 Kɔ Yakuba ɛndɛ atɔf ŋa Misira, atɔf ŋa Kosɛŋ. Kɔ pəyɔnɛ di ndaraŋan k'ɔyɔnɛ kas ka afum alarəm. 28 Kɔ Yakuba eyi doru meren wəco kɔ camət-mɛrəŋ atɔf ŋa Misira. Kəwon ka Yakuba doru fəp kənasɔtɔ meren 147. 29 Mataka ma Yakuba kəlɔtəs kəlip, k'ewe wan kɔn Isifu k'oloku kɔ: «Kɔ məfaŋ kəmar im-ɛ, məboc kəca kam aləŋk ŋem tantɔf, məlɛk' em layidi pəsoku disrɛ ndɛ məndetɔmpər' em mɔ: Ilɛtsɛn' am ta məwup im Misira! 30 K'indefəntərɛ kɔ papa kem aŋa-ɛ, məwurɛn' em Misira. Məkɔ məwup im nde kufu kəŋan kəyi mɔ.» Kɔ Isifu oloku kɔ: «Indeyɔ tɔkɔ məlok' im mɔ.» 31 Kɔ Yakuba oloku: «Mədɛrəm' em ti.» Kɔ Isifu ɛndɛrəmɛ kɔ ti. Kɔ Yakuba ontontnɛ nde kəfəŋc kɔn dəromp.