Luka.
3.
Yuka tealo bar laka ruei vo bisi, ana Jone Baruei, Sakaraia kenerinio, naio miyotuba ea vio yauo. Nina ea bogo na burum̃ara parinio tubo Taiperias Sisa na vio Romo naio be tubo bokar kiano yuka duelimo ba jimo ruei, ana ka telikiti na naio bitiri bulag kanano tomu na tortoru nalo tai ruei, jibe Pontas Pailat, naio mije tuboiano ea vio Yutea, a Erot, naio mije tuboiano ea vio Kalele, a kuruano Vilip, naio mije tuboiano ea tano na vio Ituraia bija Trakonaetis, a Lesanias, naio mije tuboiano ea tanobuku na vio Abilini. Ana ka bogo na bunu, parinio kulo lu juo napano m̃a aju Yerusalemo, be Anas naljuo Kaivas. Mia Jone joa vio yauo, ana Atua jian iliano ban naio, 
naio ba jeliviv ea tanobuku nalo na Yortano, naio jom̃a mioliolu berinavo tomu nalo monoka aviliglo, a avaruei, tibe na ana mia Atua riviekokoa kanalo kariano nalo. 
Naio mila javukia ga na nanua m̃a Naverialiano Aisea naio ber nua ruei ea kiano niosi, napano m̃a berenio “Niono tai naio jo bio ea vio yauo, berinavo: Kuvila vatitig Atua kanano m̃arabo nalo, ka naio mijikia rimei ea kenemiu meuliano nalo. 
Mia monoka kuvitiviniko bop̃ap̃ili nalo, a monoka kuvikili bulag yasuku nalo avatove rivu, a vio nalo na jorokoro monoka nalo amemedu rivu, a vio nalo nam̃a jukujukuduo monoka nalo aierivin rivu; 
tibe na, ana mia taara nonovio na tomu nalo aial kialo Ioruriano napano Atua riila riel ea m̃arabo nei riyotuba kalo.” 
Im̃auano na be Jone kanano, naio jo ka m̃a rioliolu tibe na naruei, mia telikiti na tiniobi toru aba tavio ea vio yauo ka naio rivaruei ealo, naio mil jikili banlo, naio ber jibe nei berinavo “Kamiu na kumitibe ka maro nalo ga napano amerou ka sebi tai ana aburo, mia kuberiam̃a kumijikia kuvuro ka buruta kenieno sebi na mia Atua rionio rimei? Makanio, bior maka kuvilig kamiu vatitigio vo. 
Mia ver kube riano ka napano kumerou ka vironiano nei, kenemiu meuliano monoka avar m̃arati nabo napano rivare ka kenemiu viligiano nene. Mia kuvitikar, kuve re m̃arou bereio, tibe ka nam̃a kumila ruei, nam̃a kumitum̃a kuberinavo ‘Ee, kito roju bo ruei, bior kito naruei robe Epraamo kiano yati nalo memedu kia nei.’ Mia nina maka titenia, bior ver Atua sidom, naio mijikia rivar puruveru nalo na ga rim̃aukalo ave Epraamo kanano yati ve telabo, ka mia adu jelemiu. 
Kiniou neber ka kamiu, ka m̃aryekesi jo ruei ka te bulag buruiesi nalo na maka avar m̃arati nabo, ka avukulo avan ea burutinia sebi.” 
Telikiti na tiniobi neibano amijogio amerou mia amerou, ana abika aberinavo “Mo aver tibe na, ana mia kumemi nuvila tum̃abe naruei?” 
Ana Jone berdop̃elo, berinavo “Toro na m̃ano kulukoti juo, mia monoka naio rijamo ka tinene van toro na maka ve m̃ano tai; a toro na be sano sinaniano miroano, mia naio monoka riviovio ka tealo van toro na maka ve sano taio.” 
A tomu na takis, nam̃a abe tomu na jukujukuano memedu, telabo bunu abinimei ka Jone rivaruei ealo, mia nalo bunu abitilubar kialo vovaiano nalo, naruei abika bunu aberinavo “?Naverloglogiano, tum̃abe ka kumemi, mia monoka nuvila tum̃abe?” 
Ana naio ber kalo, berinavo “Mia kuvar den tomu nalo rive verare ka ga nana mia monoka avuluio, mia to loa re, tibe ka nam̃a kumilala mugaruei.” 
Mia tomu na mira tealo bunu abika jibe na ka Jone, aberinavo “?Mia kumemi, nuvila tum̃abe?” Naruei naio ber kalo, berinavo “Kamiu kubar kenemiu tenalo na mira ana tomu nalo aju amerou laka ka kamiu, mila na bogo napano kamiu kumisidom vite tai, kuber ga, ana nalo monoka ajamo bior napano amerou. Mia bajago na, mia monoka kuvila re bereio. A kamiu kumitum̃a tiniemiu mimi dam̃ariga ka kuber tom na tortoru nalo ajum̃a abulu kamiu telisu ga, p̃eli bare ga kovio vo, mia kamiu monoka kuvisaaro ga kanio.” 
Mia ea bogo na, kulo Ju ajidomii aber kialo Naverikariano vaataro ka maluvo, ana nalo amijog Jone kiano ilinovoiano nalo nei, ana nalo ajaaro kanio, naruei vikadeniano joa kialo jidomiano, ajum̃a abivika, aberinavo “?Aa, p̃eli toro na naruei, p̃eli naio be kiado Naverikariano koviobo?” 
Mia Jone naio jom̃a ber lubarbario banlo, naio berinavo “Makanio, kiniou nebinimei jukamu, nojom̃a nabaruei ea kamiu ka uei ga, mia be toro dolu tai napano naio jo binimei iorou ka kiniou. Toro nene, naio loa lie vo ka kiniou, mia kiniou maka navare ka neialar kanano kulubue na jaano, p̃eli nala kanano im̃auano dolu tai. Mia naio naruei, mia rivaruei ea kamiu ka Niununo Lu, rivija kanano sebi, ka risebi kon niamiamo nono den kenemiu meuliano nalo. 
Naio jibe ka napano naio midukar burup̃ia m̃artea tai, ka mia rikurkar ka uiti nalo, rip̃ilig kon m̃arati nalo. Tibe na, ka mia naio rivar m̃arati uiti nabo nene ava vonuo, mia naio rivuku vinikiti nene rivan ea sebi tai napano mia maka rijikia rim̃aro bogo tai.” 
Nina naruei, Jone Baruei naio jom̃a mioliolu ka ioluano vou nabo ban tomu nalo jibe na naruei, a naio jom̃a ber iliano dolu nabo telabo ka tunukakarlo, a ka rilabonlo. 
Mia be toro tai naio tiniene maka saaro ka Jone nene leleio, nina be Parinio tubo Erot, bior ka napano Jone naio jom̃a mil banio ka napano naio burular tira nei Erotias, napano kuruano koano, mia mil banio bunu ka vite dolu telabo napano jom̃a milaio. 
Mia loa ka kanano vovaiano dolu nalo, Erot tinien jer Jone banbano-o deio, ana jumolu buku naio ban ea yimo na lakoiano. 
Mia bogo na Jone maka rivan ea yimo na lakoiano vo, naio jom̃a baruei ea tomu nalo banbano-o, mia bogo tai ana Yesu bunu binimei ea vio nene, ana na Jone baruei ea naio bunu. Naruei telikiti na Yesu jaluvo den uei, naio jom̃a bolkouo, ana vio mave betavo, 
naruei Atua kanano Niununo midu niabene, naio batove binimei jibe ka vaama tai, binimei bujo jua naio. Ana na Atua mil jel mave batove berkanio, berinavo “Jau kobe keneriku na, nam̃a nejidomso toru laka. Tinieku joaso, tinieku jaaro toru kaso.” 
Mia iorou ka na Jone baruei ea Yesu, ana na naio jikar kiano im̃auano naruei, ana ka bogo na, naio kiano yuka bokar duelimo va rolu. Mia yati na Yesu miyotuba eaio, nina tivelinio ka sum̃ano, jikar ea Yoseve, napano amial jibe ka naio be Yesu karam̃ano, naio jo ban jibe na: Yoseve, naio be Eli kenerinio 
Eli naio be M̃atata kenerinio M̃atata naio be Livai kenerinio Livai naio be Melki kenerinio Melki naio be Janae kenerinio Janae naio be Yoseve kenerinio 
Yoseve naio be M̃atateas kenerinio M̃atateas, naio be Amos kenerinio Amos, naio be Neam kenerinio Neam, naio be Esli kenerinio Esli, naio be Nagae kenerinio 
Nagae, naio be M̃at kenerinio M̃at, naio be M̃atateas kenerinio M̃atateas, naio be Semein kenerinio Semein, naio be Yosek kenerinio Yosek, naio be Jota kenerinio 
Jota, naio be Joanan kenerinio Joanan, naio be Resa kenerinio Resa, naio be Serupapele kenerinio Serupapele, naio be Sieltiel kenerinio Sieltiel, naio be Neri kenerinio 
Neri, naio be Melki kenerinio Melki, naio be Adi kenerinio Adi, naio be Kosam kenerinio Kosam, naio be Elm̃atam kenerinio Elm̃atam, naio be Ere kenerinio 
Ere, naio be Yosua kenerinio Yosua, naio be Eliesa kenerinio Eliesa, naio be Jorim kenerinio Jorim, nao be M̃atat kenerinio M̃atat, naio be Livai kenerinio 
Livai, naio be Simion kenerinio Simion, naio be Yuta kenerinio Yuta, naio be Yoseve kenerinio Yoseve, naio be Jonam kenerinio Jonam, naio be Eliakim kenerinio 
Eliakim, naio be Melea kenerinio Melea, naio be Mena kenerinio Mena, naio be M̃atata kenerinio M̃atata, naio be Netan kenerinio Netan, naio be Teviti kenerinio 
Teviti, naio be Jese kenerinio Jese, naio be Ovete kenerinio Ovete, naio be Boasa kenerinio Boasa, naio be Sala kenerinio Sala, naio be Nesono kenerinio 
Nesono, naio be Aminatapo kenerinio Aminatapo, naio be Atmin kenerinio Atmin, naio be Ani kenerinio Ani, naio be Esrono kenerinio Esrono, naio be Peres kenerinio Peres, naio be Yuta kenerinio 
Yuta, naio be Yakovo kenerinio Yakovo, naio be Aisak kenerinio Aisak, naio be Epraamo kenerinio Epraamo, naio be Tera kenerinio Tera, naio be Nao kenerinio 
Nao, naio be Seruk kenerinio Seruk, naio be Reu kenerinio Reu, naio be Pelek kenerinio Pelek, naio be Epa kenerinio Epa, naio be Sela kenerinio 
Sela, naio be Kaenan kenerinio Kaenan, naio be Avaksati, kenerinio Avaksati, naio be Sem kenerinio Sem, naio be Noa kenerinio Noa, naio be Lamek kenerinio 
Lamek, naio be Metusela kenerinio Metusela, naio be Inok kenerinio Inok, naio be Jarete kenerinio Jarete, naio be M̃alalel kenerinio M̃alalel, naio be Kaenan kenerinio 
Kaenan, naio be Enos kenerinio Enos, naio be Sete kenerinio Sete, naio be Atam kenerinio ana Atam, naio be Atua kenerinio.