1 Abo ais deek ke e, a oleleng nebo propet atöxö idi toxoro wan nana ra xö öxöno lagunon. Lamun ina na, ganim e mum pa nunu xö nangadi xirip nang idi te tengen bara a Tanono God i töngösen idi ma lalaa. Inexalik mum morobo mana könönöin idi rua ösöxö bara e God ixo isik abo tinenge re idi bara kaim. 2 Ma i eöt te mum pa werwere xulen a Tanono God kölöme xö önga tödi xöbo tinenge re ine. Ewe re öng i nunu bara e Jisas Krais ixo wanot xarnang a tödi ine, ma i etöngösen maras bira, io, mum morobo ösöxö bara a Tanono meriso re God i kis se ine. 3 Ma lamun ewe re öng i öös tewe e Jisas bira, io, a Tanono meriso re God i kobo kis se ine. Kaim. I uruoxe a tanono möxö iuo re Krais. Me mum moxoro ölangen bara abo iuo re Krais tabo wanot. Ma turunon, idi ia tere wanot ta xö öxöno lagunon.

4 Abo baroxorok ke e kölöme re Krais, mum mere God me mum moxoro bulus ösu inabo mangana nangadi arixe ma inausu re idi, möxösa, ewe nang i kis kölöme re mum i taxin saxit te Satan, ewe nang i kis kö öxöno lagunon. 5 Idi mera xö öxöno lagunon. Möxö ina na, idi tobo wöwörö mera xö öxöno lagunon ma öxöno lagunon ibo ölangen idi. 6 Ire mere God. Me ewenene nang i ösöxö e God, irabo ölangen ire. Ma lamun ewenene nang i kobo mere God, ine i karabo ölangen ire. Xö ina na mon, ire tabo perexulen a Tanono möxö turunon kö God, ma a tanono möxö röxröxö.

7 Abo ais deek ke e, ire tabo mana mamaa kaluluonin ire iat, möxösa, a tatalien ne mamaa, ine meriso lömö xö God. Me ewenene nang ibo mamaa ulamun a öng, ine a bak kö God ma i ösöxö e God. 8 Me ewenene nang i kobo mamaa ulamun a öng, ine i kobo ösöxö e God, möxösa, abo tatalien kirip pe God, a tatalien ne mamaa. 9 Me God ixo osen bara i mamaa ulamun ire bira: God ine ma önga Barok kalik mon. Me God ixo tile ösu ine ura xö öxöno lagunon, bara ire tabo kip a to mere ine. 10 A lasa ina tatalien ne mamaa turunon? Kaim bara ina tatalien na nang ire toxo mamaa ulamun e God. Kaim. Inexalik bara ina tatalien na nang ine ixo mamaa ulamun ire, ma ixo tile ösu a Barok ke ine, ine a arabaa nang ibo ruruu wi a bala laie xö God tua kip tewe abo magingin saban te ire. 11 Abo ais deek ke e, nang bere God ixoro mamaa ulamun ire xarna na, io, i töxödös bara ire tabo mana mamaa kaluluonin ire iat. 12 Ma kaim pe öng ixoro pere e God. Inexalik nang bara ire te mamaa kaluluonin ire iat, God irabo kis kölöme re ire ma ina mangana mamaa iat nang ke God irabo kis kölöme xö to re ire.

13 Ire te ösöxö bara ire te kis kölöme re ine me ine i kis kölöme re ire, möxösa, ine ixoro isik tabaa ire ma Tanono ine. 14 Me ire toxoro pere me ire toxoro öturunon köbo atöngösen te ire, bara a Mama ixo tile a Barok ke ine bara irabo a Tene Aöro möxö öxöno lagunon. 15 Ewenene re öng niang i aut bara e Jisas, ine a Barok kö God, God i kis kölöme re ine me ine i kis kölöme re God. 16 Me ire toxoro örasen me ire te nunu xö ina tatalien ne mamaa re God ulamun ire.

Abo tatalien kirip pe God, a tatalien ne mamaa. Me ewenene re öng ibo mumuu ina tatalien ne mamaa, ine i kis kölöme re God me God i kis kölöme re ine. 17 Ma nang bere ire te kis bira, a tatalien ne mamaa irabo taxin köba kölöme re ire. Möxö ina na, ire tabo kis ne balamasa kölöme xö bung möxö warkurai, möxösa, ire te xarnang e Krais sa xö öxöno lagunon. 18 Ma nang bere ire te mamaa re ine bira, me ine bölök i mamaa ulamun ire, i kebeöt bara ire tabo buut. Kaim. Ma nang bara ire te mamaa runon te ine, me ine i mamaa runon tö ire, ina tatalien irabo kip tewe ina binuut, möxösa, a binuut i kis arixe ma ömokorot mon. Ewenene re öng i bubuut, ina tatalien ne mamaa i karabo wöwö re ine.

19 Io, ire te mamaa ulamun ine, möxösa, ine ixo araun ta mamaa ulamun ire. Me ire te mamaa ulamun idi xabise, möxösa, ine ixo araun ta mamaa lamun ire. 20 Ma nang bara re öng i tengen bara, “E mamaa lamun e God,” ma lamun ine i mimixenin abo tönö ine kölöme re Krais, io, ine a tene röxröxö. Ma i turunon, möxösa, ewe re öng nang i kobo mamaa ulamun a nangadi xabise nang ine ixoro pere idi, i kebeöt bara irabo mamaa ulamun e God, nang kaim ine xo werwere. 21 Me ire toxoro kip lo a warkurai meringan te ine bira, bara ewe re öng i mamaa ulamun e God irabo mana mamaa bölök ulamun a tönö ine kölöme re Krais.