A Sese Öninöng ne
Ginigeet te Pol urungan köbo
TESALONIKA
Pol ixo geet ina ginigeet na melamu xö sisila ne ginigeet urungan tidi abo Tesalonika (pere a öxöno tinenge xö 1 Tesalonika). Idi tokoxobo maras bang kö tinawuxus baling kö Orong. Ma uleng ke idi toxo döxömen bere Krais ixoro tawuxus baling. Inexalik e Pol ixo töngösen idi bara a tödi nang i onwat te God irabo ot sila re Krais, ma abo magingin saban irabo taxin köba xö ina axana bung (2 Tes. 2:1-12). (A oleleng ne tene nanase idi te döxömen bara ina tödi onwat ine a mawak kö Winawara 13:1-10 ma bara ine ina tödi nang i saban köba xö Matiu 24:15.) Pol ixo ömanan bölök idi kaluluonin abo auban ixo ot pösöt idi (2 Tes. 1:4-10) ma ixo öxaxat idi bara tabo muu abo tatalien töxödös (2:13-3:15).
1
1 E, e Pol, arixe me Sailas me Timoti, meet me tile a tinenge na urungan tö mum a marakörö ne lotu niang Tesalonika, ewe e mum mere God a Tamana ire, ma mere Jisas Krais, a Orong.
2 A abalamu ma malum irabo kis se mum meriso re God, a Tamana ire, ma a Orong, e Jisas Krais.
A bung ne warkurai xö God
3 Abo töke kölöme re Krais, i töxödös bara meet marabo tengen deek sösöxö urungan te God tua gene e mum, möxösa, abo nunu re mum iri lölölös nana im mabo abalamu re mum kö öngöng kabise iri dedek nana. 4 Io, ina na, meet me ölolot e mum kaluluonin abo marakörö ne lotu re God köbo lagunon, möxösa, mum mo tuu lölös ma mo nunu kaluluonin abo eler mabo kinadik nang mo örasen.
5 Ma niang i osen ömaras bara a warkurai xö God i töxödös. Möxö ina na, God irabo perexulen e mum bere mum mo eöt ta nilaxa xö kingdom pe ine, nang mum mo örasen a kinadik möxönan. 6 Io, God i töxödös saxit me ine irabo pet ina na bira: ine irabo balu öbaling abo sasaban te idi ewe nang te ögarin e mum. 7 Me ine irabo ömamanaa e mum kalik abo kinadik ke mum ma irabo ömamanaa e meet bölök. Ma irabo pet xarna na xö axana bung bara e Jisas a Orong irabo ot wösö meriso xö watmaep kaluluonin a bibio ne ia arixe mabo angelo lölös se ine. 8 Ma irabo ömokorot ewe me idi nang tekara ösöxö e God ma tekara tame a atöngösen deek ke Jisas, a Orong ke ire. 9 Ma xinuxun te idi bira: God irabo pet ögarin idi me idi tabo kis biringan sik ulorexe saxit. Me idi tabo kis tewe xalik a wawara xö Orong ma xalik a mariris ne lölös se ine 10 xö axana bung bara a Orong irabo wanot tua xikip a ese raxin ma aölelet kaluluon köbo tene nunu, idi a nangadi töxödös se ine. Me mum bölök, mum morobo arixe me idi, möxösa, mum moxo nunu xö tinenge re God, nang meet moxo töngösen e mum ulamunon ine bara turunon.
11 Io, ina na, meet me seseseng sösöxö rua gene e mum, bara God irabo perexulen e mum bara mum mo eöt ma mangana to nang e God ixoro kuwe lo e mum ulamunon. Meet me seseng bölök bara irabo top e mum ma lölös se ine bara mum morobo pet abo lalaa deek kirip nang i wanot meringan kölöme xöbo nunu re mum ma nang i eöt arixe mabo mamaa re mum. 12 Meet me seseng bira, rua a nangadi tabo pere abo to re mum ma tabo ii a esene e Jisas, a Orong ke ire, ma bara idi tabo ii e mum arixe me ine, eöt ma abalamu xö God te ire me Jisas Krais, a Orong.