A Ginigeet te Pol urungan köbo
KOLOSI
I wawara bere Pol ixo kis kö gunon ne aömokorot tingan Rom nang ixo geet ina ginigeet urungan tö idi abo Kolosi xö xönö raxin Esia (pere Aposol 28:16-21). Ixo geet a nine ginigeet urungan te Pilimon mabo Epeses kö ina axana bung bölök. E Pol kaim kö sulo a lotu ro Kolosi. I wawara bere Epaparas ixo ölangen a atöngösen deek ke Pol to Epeses, io nang, ixo wan uruso Kolosi ma ixo palas tinenge ringan ee (Kolosi 1:7-8 me Aposol 19:10). Me Pol ixo geet ina tinenge rua ötumarang idi abo Kolosi xöbo tene ausu röxröxö. Idi toxo töxö ulamunon a oleleng ne mangana lalaa. Idi toxo bulus öraxin a dauleng nebo mangana bung (Kolosi 2:16) ma abo angelo (2:18). Idi toxo mamaa bara a nangadi idi tabo kis kö pu xö ene abo warkurai (2:21) ma a tatalien ne kuru lewene aine nangadi (2:11). Idi toxo pet öraxin abo mangana dinödöm iat te idi bara ina na a mangana nanase nang i silien ire urungan kö to (2:4, 2:8, 2:18). Ma lamun e Pol ixo bulus öraxin köbanin iat e Krais bara ine xalik mon i eöt bara irabo öro a nangadi. Krais a malalar kö God (1:15). Krais ixo uxis abo lalaa xirip (1:16). Krais i balaure abo lalaa xirip (1:17). Krais a sisila möxö tinaru kaa xalik a minet (1:18). Krais i eöt esexere me God (1:19, 2:9). Krais irabo kip puxus öbaling kirip abo lalaa urungan kö God (1:20-22). Io nang, Krais i taxin köbo lalaa xirip ma i eöt köba rua öro ire. Ma ina na a unine ina ginigeet.
1
1 E, e Pol, a önga aposol te Krais Jisas eöt kö mamaa xö God, me Timoti, a tönö ire kölöme re Krais, 2 maa me tile ina tinenge na urungan tö mum a nangadi runon kö God niang Kolosi, e mum abo tönö e maa nang mum mo nunu re Krais me mum mo kis kölöme re ine.
A abalamu ma malum meriso xö God, a Tamana ire, urungan tö mum.
A tinenge deek ma sineseng
3 Maa bo rengrengen deek kö God a Tamana Orong ke ire, e Jisas Krais, nang mem bo seseseng lamun e mum. 4 Maa me tengen deek bira, möxösa, maa moxoro ölangen ulamun abo nunu re mum kölöme re Krais Jisas ma ulamun abo abalamu re mum urungan kö nangadi xirip nang mere God. 5-6 Me mum bo ebalamu me mum bo nunu, möxösa, mum mo kis xiset abo lalaa deek i kis tagur sik kö mum puso xö watmaep. Me mum moxoro ölangen ulamun inabo lalaa deek nang a tinenge turunon ixo ot urungan te mum, ma ina na a atöngösen deek. Ina atöngösen deek ixobo oo ma ibo önan esexere xirip kö öxöno lagunon, xarnang mon nang ixoro talien bie kaluluonin e mum meringan kö sisila ne bung nang moxo ölangen ine ma moxo maras ulamun abo turunon möxö abalamu xö God. 7 Ma a ais deek ke ire, e Epaparas, ewe nang i tuu arixe me mem köbo tinörön, ma a tultul deek ine xö pu re Krais sua gene e mum, ine niang ixo usu e mum ulamun a na. 8 Ine ewe niang ixo töngösen e maa ulamun a tatalien ne abalamu nang a Töxödös ne Tanono iri tabaa e mum min.
9 Io niang, maa mokoxobo mamas sua siniseng kua gene e mum urulo meringan kö bung maa moxo see lo a atöngösen ulamun e mum. Maa moxobo seseng e God bara irabo tabaa e mum ma nanase raxin ulamun abo to re mum kölöme xö Tanono bere mum morobo eöt ta ösöxö ödeek abo lalaa ine i mamaa bara mum morobo pet. 10 Io niang, mum morobo eöt tua talien xarnang i mamaa, ma morobo eöt tua öaxanan ine xöbo lalaa xirip nang mum bo wewet. Ma xöbo tatalien deek kirip pe mum, irabo nangen a inone, ma a nanase re mum ulamun e God irabo taxin nana. 11 Maa me seseng bölök bara mum morobo kip abo lölös eöt ma lölös taxin saxit te ine bara morobo tuu lölös arixe ma balawapat kölöme xöbo tiip, 12 ma bara mum morobo tengen deek ma axanan urungan kö Tamana ire ewe ine iri pet eörin e mum pua kinis arixe ma nangadi runon te God ewe idi nang te kisisik kö maras. 13 Me ine ewe nang ixo öro ire xalik a kinis se ire xö ene lölös möxö xödxödö ma ixo ömen lo ire urungan kölöme xö kingdom möxö Barok ke ine ewe i mamaa xöba rö ine. 14 Ma a Barok ke ine iat ewe nang ixo kun ölanglanga ire nang ixo döxömen tewe abo tatalien saban te ire.
Krais i taxin köbo lalaa xirip
15 Me Krais a malalar te God ewe nang tekara pere ine. Krais i xarnang a sisila ne barok, möxösa, a kinis se ine i taxin saxit köbo lalaa xirip nang God ixo uxis. 16 Ma kinis se ine i taxin köba bira, möxösa, God ixo uxis abo lalaa xirip kö limine e Krais, abo lalaa riso lömö xö watmaep ma mera xö pu, abo lalaa ire tabo pere ma nang tekarabo eöt tua werwere, ma abo mangana tano xarna na: abo sisila me idi ewe idi nang a lak lölös me ewe idi nang tobo ekure. Idi xirip na, God ixo uxis idi xö limine e Krais ma rua ii öraxin e Krais. 17 Me Krais iat ixo kis mesila xöbo lalaa xirip me idi xirip te kis deek kö ene rorop pe ine. 18 Ine a sisila raxin möxö marakörö ne lotu, me idi a lewene aine ine. Ine a unine to re idi, möxösa, ine a sinila ne tinaru kaa xalik a minet, ma ixo tuu kaa sila bara irabo taxin saxit köbo lalaa xirip. 19 Krais i xarna na, möxösa, God ixo axanan bere Krais irabo wöwö mabo lalaa deek kirip nang God ibo wöwö sik min. 20 Ma xö tinörön kö Barok ke ine, God ixo mamaa bara irabo xikip puxus abo lalaa xirip baling urungan te ine. Ixo bulus a malum ma dee re Krais kö öxöno sölöxöröp. Io, ixo kip puxus öbaling abo lalaa xirip mera xö pu ma meriso xö watmaep.
21 Mesila mum moxo kis tewe xalik e God ma moxo melentexin ine me mum moxo wewet abo tatalien saban. 22 Ma lamun na im, God iri lamus puxus e mum urungan te ine xarnang abo ais se ine xö minet möxö lewene aine e Krais sua öraru e mum kö wawara re ine. Io nang, mum morobo madakdak ma kaim im pe biling ma re sasaban kölöme re mum. 23 Ma lamun mum morobo mana tuu dik sik kö nunu re mum ma ganim e mum pua taxase xalik a tatalien ne xixiset ulamun abo lalaa deek nang mum moxo ölangen ulamunon kölöme xö tinenge deek bara mum morobo kip lo. Ma ina tinenge deek na nang idi toxo palas tinenge min urungan kö nangadi mera xö öxöno lagunon. Me e, e Pol, e a önga tultul möxö ina tinenge deek na.
Pol ixo rörön lölös sua a lotu
24 Na im e axanan köba ulamun abo kinadik i uban e rua gene mum. Me e kip ina kinadik kö lewene aike rua öxawam abo kinadik ke Krais nangen bang i malaa sik. Me e xobo xikip inabo kinadik kua gene a lewene aine ine, ma a aine ine e mum abo marakörö ne lotu. 25 E xoro kip a tinörön ne rorop ulamun e mum a marakörö ne lotu, möxösa, God ixo isik ina tinörön tö e bara arabo pet bira rua wewet ödeek e mum. Ixo isik ina tinörön te e bara arabo öxawam ödeek a tinörön möxö palas tinenge ulamun e God. 26 Ma ina tinenge na nang ixo umixen kalik a nangadi möxöbo awat mesila. Ma lamun iri wösö im kö nangadi runon iat te ine me nixinen. 27 God ixo mamaa rua ömaras idi ulamun ina laa nang ixo mun sik ma nang irabo wadöane ödeek ewe idi nang kaim bara idi abo Judeia bölök. Ma ina laa nang ixo mun sik, i bira, bere Krais i kisisik ke mum, ma möxö ina na i turunon saxit bere mum morobo laxa xö mariris taxin te God.
28 Me mem bo palas tinenge ulamun e Krais urungan köbo mangana nangadi xirip. Me mem me ötumarang me mem me uusu idi mabo nanase xirip bara idi tabo ot deek esexere kölöme re Krais nang mem me lamus idi urungan kö wawara xö God. 29 Ma ina unine niang e rörörön lölös. E bo lölölös köba eöt ma lölös taxin te ine nang ibo rorop e min bara arabo pet bie.