A Ginigeet urungan köbo Ibru.
1.
Mesila God ixo wöwörö xöbo untubuno ire xö tinenge ne propet. Ma ixobo wewet köbo oleleng ne axana bung ma kölöme xö oleleng ne mangana ngas. 
Ma lamun na im a xakawöm möxö axana bung, me God iri wöwörö rö ire kölöme xö Barok ke ine. Ma ixo pere kos sik bere ine irabo unan abo lalaa xirip. Ma xö limine a Barok ke ine, God ixo uxis a mango ma öxöno lagunon kirip. 
Me ine a mararang möxö mariris se God. Ma i eöt turunon iat me God. Ma ibo sösölök ma ibo balaure a mango ma öxöno lagunon kirip ma lölös möxö tinenge re ine. Ma nang ixo pet a tinörön ne kip tewese abo magingin saban, ixo kip a kinis taxin. Ma ina kinis nang i kis kö lawa tuun kö Öng Nang i Taxin Saxit Köba riso xö watmaep. 
Io, ine ixo kip lo a kinis taxin nang i taxin sik ke idi abo angelo, xarnang mon a ese nang God ixo isik ke ine, i taxin sik ke idi. 
Ma ina na i maras, möxösa, God i kara tengen kere önga angelo bara, “Nöngön a Barok ke e. Nixinen e tengen ömaras bara nöngön a Barok ke e, me e a Tata re nöngön.” Kaim. I koxobo tengen bira xöbo angelo mon. Ma ixo tengen öbaling bira, “E rabo Tamana ine, me ine irabo Barok ke e.” 
Ma xö axana bung bara God i isik ot a Barok ke ine ura xö öxöno lagunon, ina Barok ke ine nang i kip lo a sisila ne kinis, God i tengen öbaling bara, “Abo angelo re God idi xirip tabo mana lotu wösöt a Barok ke e.” 
Ma ulamun abo angelo, God ixo tengen bira, “God ibo wewet abo angelo re ine xarnang a xiki. Ma ibo wewet abo tene tinörön te ine xarnang a kamene ia.” 
Ma lamun kö Barok ke ine i tengen bara, “God, a kinis ne warkurai te nöngön irabo kis ulorexe ma i karabo kawam. Ma örobo kure a nangadi re nöngön ma tatalien töxödös. 
Me nöngön u bo mamaa lamun a tatalien töxödös ma u bo melmelentexin abo sasaban. Io niang, God, ewe ine a God te nöngön, ixo bulus a wel ne axanan lömö re nöngön tua pere kos nöngön. Möxö ina na, nöngön örobo kip lo a kinis nang i taxin te idi abo ais se nöngön.” 
Me God ixo tengen öbaling bara, “Orong, mero xö urulo nöngön u xo uxis a öxöno lagunon. Ma u xo pet a mango ma nine limem iat. 
A balana kubu ma öxöno lagunon idu tabo kawam, ma lamun nöngön örobo kisisik iat. Idu tabo xarnang a man maut i tamadidi. 
Me nöngön örobo pulin idu xarnang a man. Ma örobo kulas idu xarnang a nangadi tobo kulas man mabo man te idi. Inexalik u kara xuxulas, ma abo bung ke nöngön i karabo kawam.” 
Me God i kara tengen kö önga angelo bara, “Örö kip a kinis taxin ta xö lime tuun te e, ot nang e rabo bulus ösu abo iuo re nöngön kö pu xarnang a laa möxö bulus xexe.” 
Io, a sa runon idi abo angelo? Idi abo tano ne tultul. Me God ibo ritile rewe idi rua rorop idi ewe nang God irabo öro idi.