1 Anda neno bari kokomana, enembo oruabe, númane God da Asisimi sonembutuaveta, minono rari gaa reta rousue. Amindu jajari ea gigigadi rere. Númane mo, God da Asisimi sonembutuaveta minono reta rousua, aĩ taimumi sonembutuaveta reta rousua? Ananu nundubea gigige! Anada bee mo, feroveta gavera kakato oruabe, Satan da unonu raita rea, iiava roo enda nanjogodava minono reta rousue. 2 O enembo dumeni mo, God da Asisimi irugutuaveta, minono reta rousue. Atá, God da Asisi gia tanana arida emboro evere. Enembo avona bemi karigea, “God da Mendi Iesu Keriso furia, enembo bee ea, ená endava siroruturie,” aghá radua mo, gaa bee re. Umó God da Asisimi sonembuturota, raita rouvie. 3 Atá enembo avona Iesu da endava siroruturia gaganu gambi gaa radua, umó God da Asisi jo bambi re. Umó Keriso da gitofoda asisinu bua, ungá irirota, amindu kivu aita rouvie. Iesu Keriso da gitofo furaita rouvia, aná seibe ririeta niningigutureravore. Aná gitofo etia, oreki eve vitie.

4 Avotago, anda sasingu, nímane God da natofo ea viteravore. Aghá-gea, feroveta gavera kakato nímanena ekami fatia jijiregutureravore. Anada bee mo, nímanda rururera Asisi, umó anogha re. Atá endava enembomi rururia asisi jo aghago irambi re. 5 Aná enembo, númane endada buro, tamo firída uno, kotú endada nundubari, anada gaganu reaveta, ená endava vitia enembo númanda gaganu ningita rousue. Anada bee mo, númane endada tofo re. 6 O namonde amó mo, God da tofo re. Enembo avona God tanana rouvia-mi, namonde anda gaga ningita rousue. Tago, enembo avona God da natofo ambi vitia, númane jo namonde anda gaga ningambi eta rousue. Aghá egeguturota gigigadora mo, enembo avona gaa beeda asisi rururia-de, kotú enembo avona gaverada asisi rururia-de dano, namonde amó isaghava tanana egegaita rosore.

7 Anda neno bari kokomana, namonde amó mino-mino neno bubugore! Anada bee mo, neno bari God dava reta futa rouvie. Amindu, númanda kokomana neno bubugeta rousua enembo, númane God tanana ea, unda sasingu ea vitie. 8 Atá, númanda kokomana jo neno bambi eta rousua enembo, númane God jo tanana ambi re. Anada bee mo, God umó neno barida ruru re. 9 God unda neno bari daiyaghagoro, ananu namonde andú iruguturia, aná evere. Namonde amó unda Mendi da ragarova jebuga tambua bubugari-du nundubuturota, unda Mendi dabakonu ninenguturieta endava furie. 10 Neno barida bee, aná evere. Namonde amó jo God neno bambi irieta, unona seibe namonde amonu neno rururota, namonde anda ari-bari akokogo nundubea gia doaita rea, unda Mendi ninenguturieta furia, unda tamonu ari-bari akokogoda mino utua, ambubuturie.

11 Anda neno bari kokomana, God namonde amó neno rururota, aghá uria-du, namonde amó mino-mino neno bubugasire 12  Jon 1:18Enembo einimi God jo unda dibemi gambi vitie. Avotago, namonde amó mino-mino neno rururota iririgadora, God undufako namonde anda neno rova buro urota, unda neno bari namonde anda neno rova baria jojabe aita rouvie.

13 God unda Asisi ututurieta bubuguturere-gea, namonde amó neno roomi nundubuturota, tanana rosore: namonde amó God de dano vitere. Kotú God beago, namonde danode vitie. 14 Kotú, endava enembo nanjogo sonembota jejebugari-du rea, God Afa unda Mendi ninenguturieta furia-nu gia, unda bingá námanena enembodu isagha eta rosore. 15 Enembo avona, “Iesu, God da Mendi re,” radua, umó God gha danode irota, God unda neno rova iraita rouvie. 16 Aghá-gea, God na namonde amó neno daiyagha buta rouvia, ananu tanana urota, gaabee eta rosore.

God umó neno barida ruru re. Amindu, avona neno rururota iradua, umó God gha danode irota, God unda neno rova iraita rouvie. 17 Avore, God namonde anda neno rova irirota, unona ata, neno barimi namonde anda neno rova baria, beda aita rouvie. Anada bee mo, unda uno, namonde amó endava eto-bato umongo irirota, irurari feferava, jo oru ambi, ano egegasire. 18 Avotago, gigige! God umó namonde amó neno buta rouvie. Unda neno bari jojabe itatama urota, umonu mino-mino neno rururota, namonde amó jo undú oru ambi eta rosore. O, namonde amó unda neno bari jo tanana ea goghó ambi iririgadora, Irurari Feferava namonde andava mema utarinu nundubuturota, oru egegasire.

19 God umó sei namonde amó neno rururie. Amindu rea, namonde umó neno buta rosore. 20 Enembo avona, “Amó God neno rei-rurore,” rirota, unda ikoko mendi o ariri gharovu eini injigha adua, umó gavera kato re. Anada bee mo, namonde amó ikoko mendi o ariri gharovu dibemi gita rosora-nu, neno bambi egegadora, namonde amó God dibemi gambi eta rosora beago, neno bari jo inono irambi re. 21 Kotú, agho dari Keriso da namonde andú ututuria, aná evere. Enembo avona God neno rururota mo, unda ikoko mendi o ariri gharovu beago neno bae!