15
15:1-8 Anera Ingo Yoveni Yoveniva Ungaghami God Da Oya Akuago Utaita Simbuguturia Re.
1 Anada ambova, uutuva eini-eini jojabe eini jo gambi vitara-nu isagha ueta gia, bee duduku utara, aná evere: Anera dano ingo yoveni yoveniva ungagha gerare. Númandava oya akuago ingo yoveni yoveniva ungagha utarida ano irieta gerare. Aná ano jijimu urota, endava mema utaita rouvia-mi God da neno akuago sidara aita rouvie.
2 Aghade amó sao jojabe eini garasi ivarigha bagega arigo irieta gerare. Anada kasava, enembo avona mene-mene urota, aná karajevareta vitia furia nino okade unda imumude dea, ekami ukova fatia jijireguturia-nu, gerare. Unda ragaroda namba 666 aghago, aná umó re. God da vesa uta gauma reka dibe eininu ingomi righia, 3 Ex 15:1aná enembomi God da buro kato Moses de, kotú Sifi da Mendideda daa didivueta gerara, aná evere:
“Jojabee God, ano tofo, inda eta rora ivata dano, esiko-esiko taubana bee re,
gerurota duduku-dadaka eta rosore.
Abua-abua nanjogoda kini imó re.
Imó donu eta rora-mi gaa beeda emboro dambu yarinu rei-irugetue.
4 Jer 10:7; Ps 86:9Jojabee, enembo nanjogo vitia dano, indú ititi urota, vitie.
Inda ano bee joja tofo vitia-du, enembo dano indú raga regegaita rousue. Imó inunka kakara re.
Inda aito fugari taubana dogonu isaghava urieta, giguturie-gea,
abua-abua dano ya, indava bubua, indú tumogha baĩ egegaita rousue.”
5 Ex 38:21Anada ambova, God du Tafaroro Ari Kambo uutuva bebato ifegea irieta gerare. Aná kambo rova Dobo Kakara irieta gerare. 6 Aná anera ingo yoveni yoveniva ungagha oya akuagonu righia vita-mi aná Tafaroro Ari Kambo bebatovareta buburitata gerare. Númane asugari dighari saghai dogo biri jarinu asugea, sangorova auri goldi mi arinu asugea buburitata gerare. 7 Serubim* ungagha-ungaghada einimi erea, eghá uta. God tumanadu vitia-mi sei unda neno akuago kibubu dano ingo yoveni yoveniva ungagha goldi mi ariva rurukutata beda uta-nu bua, aná serubim anera mane ingo yoveni yoveniva ungagha dava vesa utata bubuguta.* Tutuno enava kibubu God da neno akuagomi beda ea vitie, reiria, kotú tutuno enada tuva oya du reiria, anada bee dabako re. 8 Ex 40:34; 1 Kgs 8:10-11; 2 Chr 5:13-14; Is 6:4Aghade, God da anode unanade dimbori aghago vorea, Tafaroro Ari Kambo beda uta. Utata, enembo eini o anera eini anava terari jo inono ambi egeguta. Aghá irirota, aná oya akuago dano ingo yoveni yoveniva ungagha aná anera ingo yoveni yoveniva ungaghami bua furá ya serigasueta, rekago furá, God du Tafaroro Ari Kambova teterugasue.