Ekaresia Ekaresia, Daiyagha Tutuno Ea, Baria Aria Jojabe Uria Re..
1.
Ariee, Tiofilus ko, anda buka seiva gefirera-da bee mo, aná enanu indú rereta, ningi! Iesu umó buro daiyagha tutuno ea furia-va, ari donu uria, kotú gaga donu nghaĩ ititurota furia, kotú uutuva vivituria, ananu gefirere. Avotago, Iesu ambua erea, uutuva jo vitambi irirota, fefera aghade, embobo unda aghi egegari-du sei gateguturia-du nghaĩ ititurie. Númane Asisi Kakarada anomi buro donu egegari-du, kotú gaga donu regegari-du uno uria-nu nghaĩ ititurie. 
Iesu amburarivareta jebugea erea, umó fefera 40 endava irirota, fefera daba-daba unda ambo nimbidava isagha ea, ivata anogha dibe eini be eini urota, undufa umonu irugeaveta, umó amburarivareta jebugea eroruria-nu gaabee egegeta urie. Aghade, God Afa unda natofo* daiyagha kaifa eta rouvia, ananu irugeta urie. 
Fefera einiva, Iesu numonde danode desea, undari undidiguturota eghá ririe, “Anda Afada donu utaita be gajituria, aná ririeta niningigutureravore. Amindu eve Jerusalem kaifa egege! Mania doa serigata! 
Anada bee mo, Jon na enembo tefo uvumi bafutaito eta urie. Avotago, fefera dumenida ambova, nímane Asisi Kakarada anomi bafutaito aita rore.” 
Amindu fefera eini, numonde furia desea, uriga eghá egeguturie, “Jojabee, gigo! Inona oreki rata, námane andufa Jiusi enembo tefo neno egeguturota, námane andufa kaifa egegara, aĩ, tefo?” 
Aghá regeguturieta, Iesu na mino númandu eghá ririe, “Nímandu jo rata niningigambi aita rosoravore. Eini-eini dano God Afa na unda unomi reaveta siroreta rouvie. Amindu, nímandu jo rata niningigambi egegaita rosoravore! 
Avotago, Asisi Kakarami nímandava asugadua mo, unda ano utota bua, nímane erea tutuno ea, Jerusalem reta ya Judia Frovensi anava, Samaria Frovensi anava, naa dano kotú roo enda dano biruru urota, anda Gaga Taubananu minono regegaita rosoravore.” 
Aghá riria-da ambova, númane gerueta, Iesu rururieta uutuva yavuria gooso rova teterurieta númanda dibe goosomi gajiturie. 
Númane avo jijiregea, unda yavua-nu tatasegea gigigutueta, jo gaimbo ambi, embobo ungagha ungá unda asugari saghai tatamo manemi furia, númane vitiria-da kasava isagha ea jijireguturie. 
Aghá ea, númandu eghá ririe, “Galili embobo, nímane dodu uutuva dingera roso? Iesu daiyagha nímandavareta uutuva vivitueta gigigetora, emboro dabako aghagonu uutuvareta kaverea furaita rouvie.” 
Aghá uria-da ambova, Iesu da ambo nimbi, ooto ragaro Olivi avo reta kaverea aria, jo roo yafabe yambi, bogu naa Jerusalem bububuguturie. 
Bubua aria, númanda sei iririgeta uria kambova terua vitia aria, itiva buburiturie. Anava buburituria mo, Pita, Jon, Jems, Andru, Filip, Tomas, Bartolomyu, Matyu, kotú Alpheaus da mendi Jems da akau, númanda akauda mendi Judas, Saimon Tuvari Katode dano. 
Númane evevetu dumenide, Iesu da nue Meri de kotú Iesu da ikoko mendide dano desea, neno dabako egeguturota, benunu urota iririgeta urie. 
Anada ambova fefera dumeni seriguturieta, Iesu gaa bee egegeta uria enembo dano 120 bubua desuturieta, Pita na erea jiria eghá ririe, 
“Anda ikoko mendi, ariri gharovu, Asisi Kakara na ririeta, namonde anda mambube Devit donu Judas du gefiria, aná gaa bee siroruta. Judas reiria mo, aná namonde anda enembo eini re. Ená buronu ari-du, Iesu na gateguturie. Avotago Judas na gitofo kofiri urota, Iesu númanda ingova itutata, umó nandia bundita. 
Judas umó, Jiusi enemboda barirari guri ututata bua angia, kambesi eininu aná gurimi utua bua, avo jua dea uro bejea desini bani-bani isaghava buburitata ambubuta. 
Aghá utata, Jerusalem enembo dano niningiguta-gea, aná kambesida ragaro númanda gaami Akeldama ririkiguta. Anada bee mo, Tatangu Kambesi re. 
Anada bee mo, Daa Bukava eghá gembari vitie: ‘Unda kambesiva enembo tefo iroe! Mania doata, enembo eini unda kambova irauveta!’ Kotú gaga eini eghá gefirieta vitie, ‘Embó einimi unda kambesi bua, buro aita rouvie.’ 
Amindu taubana mo, namonde embó eini Judas da kambesi bari-du regegota jiroe! Tutunova Jon enembo bafutaito eta uria-vareta, Jojabee Iesu uutuva vivita anada rorova, namonde danode iru-furu eta uria embó eininu gategore! Aghá adora mo, namonde amó Iesu da ambua erora-da gaga nanjigo riradora mo, umó osagho fumboe!” 
Aghá riria-da ambova, embobo ungagha gateguturie. Embó einida ragaro bakode re: Josep, Barsabas, kotú Jastus re. Embó einida ragaro mo, Matias re. 
Aghá egegea benunu urota, eghá regeguturie, “Jojabee, imó enembo nanjogoda neno roo dano gita roravore. Judas unda buro doa kambesi akuago undú simbuguturia anava angie. Amindu, unda kambesi bari-du rea, avonu rei-nundubutora, ananu iruge-gea, regegota jiria inda aghi kato eini ae!” 
Anada ambova númane, ungá unda ragarova kikindo gaegeguturia mo, Matias da ragaromi isagha urie. Urieta, Matias umó Iesu da aghi kato eini ea, numonde 12 ea deĩ egegeta urie.