Ha:bagage
(Da:i Sia:-Habakkuk; Modu-Habakuku; Bisini-Habakuk)
Hidadea Sia:
Ha:bagage da ea sia: amo ode 605 Y.H.M. o amo ode gadenene amoga dedei. Amo esoha, Ba:bilone fi dunu da Isala:ili soge ouligisu. Ha:bagage da Ba:bilone dunu ilia gegene nimi dasu hou amola dodona:gi hou ba:beba:le, da:i dioi bagade nabi. E da Hina Godema amane adole ba:i, “Ba:bilone fi dunu da wadela:idafa amola ilia da moloidafa dunu amo wadela:lesisa. Dia da abuliba:le ouiya:le esalabala? Dia abuliba:le Dia fi hame gaga:sala:? (1:13) Hina Gode Ea bu adole iasu da E da Ea ilegei eso amoga, hou huluane hahamomu. Amola wali, Ea fi dunu da mae fisili, Ea houdafa ganodini esalumu da defea. “nowa da moloidafa hou lalegaguiwane esalea da fifi ahoanumu. Bai ilia da Gode hame fisisa.” (2:4)
Buga la:idi eno amo ganodini, Ha:bagage da wadela:i hamosu dunu da gugunufinisi dagoi ba:mu, amo sia: olelesa. Amola buga dagomusa:, e da gesami dedei. Amo ganodini, e da Gode Ea Bagadedafa hou nodone olelesa. Amola e da Gode Ea hou baligiliwane dafawaneyale dawa:beba:le, Godema fa:no bobogebe amo hamedafa yolesimu amane sia:sa.
Sia: dedei
Ha:bagage ea Egasu Sia:
amola Hina Gode Ea bu Adole Iasu...Sia:alalo 1:1-2:4
2 Wadela:i Hamosu Dunu
da Gugunufinisi Dagoi Ba:mu...Sia:alalo 2:5-20
3 Ha:bagage ea Sia:ne Gadosu...Sia:alalo 3:1-19
1
Ha:bagage
1 Hina Gode da balofede dunu Ha:bagage ema sia:ne iasu iasi.
Ha:bagage da Moloi Hou Hame Ba:beba:le, Hina Godema Egane Sia:i
2 “Hina Gode! Na da habowali seda Dima fidima:ne wema:bela:? Ba:bilone dunu da ninima bagadewane gegene nimi daha. Di da habogala na wesu nabalu, nini gaga:ma:bela:? 3 Dia da abuliba:le na da bidi hamosu bagadedafa ba:ma:ne hamosala:? Dia da abuliba:le agoai wadela:i hamosu hou udigili ba:lala:? Gugunufinisisu hou amola gegene nimi dasu hou huluane da na sisiga:sa. Amola gegesudafa amola sia:ga gegesu da soge huluane nabalesi diala. 4 Fofada:su hou da gasa hame amola hamedei agoane ba:sa. Moloidafa hou hamobe da hamedafa ba:sa. Wadela:i hamosu dunu da moloidafa hamosu dunu ilima osa:le heda:sa. Amaiba:le, moloidafa fofada:su da wadela:lesi dagoi ba:sa.
Hina Gode Ea bu Adole Iasu
5 Amalalu, Hina Gode da Ea fi dunu ilima amane sia:i, “Dilia fifi asi gala huluane dilima sisiga:i dialebe, amo mae fisili, ba:laloma. Amasea, dilia da fofogadigimu. Bai, Na da hou bagade hamomu. Amola dilia da amo hamobe dilia gega nabimu ganiaba, dafawaneyale hame dawa:la:loba. Amaiba:le, ba:laloma! 6 Ba:bilone dunu da nimi bagade dodona:gi dunu. Amo dunu fi da eno osobo bagade fi ouligimusa:, Na da ilima gasa iaha. Ilia da eno soge hasanasimusa:, osobo bagadeba:le mogodigili ahoa.
7 Ilia habi ahoasea, dunu huluane da beda:gia:sa. Ilia da gasa fili, ilisu da ouligisu hou gagui dagoi dawa:lala.
8 Ilia hosi ilia hehenasu hou da ‘lebade’ ea hehenasu baligisa, amola ilia ougi hou da wufi wa:me ea ha:iba:le ougi baligisa. Ilia hosi da:iya fila heda:i dadi gagui dunu da soge badilia amoga manebe ba:sa. Ilia hosi da osoba gidilagidilasa. Ilia da buhibaga sage famusa: dabe, amo defele, gogili daha.
9 Ilia dadi gagui wa:i da gegene nimi dahawane midadi mogodigili ahoa. Amola dunu huluane da ilia mabeba:le beda:sa. Ilia doagala:le samogele lai dunu ilia idi da sa:iboso defele, idimu gogolei ba:sa. 10 Ilia da hina bagade ilima higale ba:sa, amola ouligisudafa dunu amoba:le oufesega:sa. Gagili sali diasu da ilia logo hedofamu hamedei. Ilia da amo ea gagoi beba:le osobo gasa:le lelegela heda:le amodili golili sa:ili, doagala:le laha. 11 Amasea, ilia da fo ahoabe defele, bu asi dagoi ba:mu. Amo dunu ilia gasa da ilima ‘gode’ gala.
Ha:bagage da bu Hina Godema Egasa
12 Hina Gode! Musa:dafaganini, Di da Gode galu. Di da na Gode! Di da hadigidafa amola Fifi Ahoanusudafa. Hina Gode! Na Gode amola na Gaga:su! Di da Ba:bilone dunu ilegei dagoi. Di da ili gasa fufugilisili, ilia ninima se dabe ima:ne gasa fufugilisi. 13 Be Di da abuliba:le amo wadela:i hamosu dunu amola hohonosu dunu ilima asigiwane ba:sala:? Dia si da hadigidafaba:le, Di da wadela:i hou amola wadela:i hamobe dunu amo ba:mu gogolesa. Amaiba:le, Di da Ba:bilone dunuma, amo dunu da ilia moloi hou baligisa dunu, amo gugunufinisilalebe ba:sea, Di da abuliba:le ouiya:le esalabala?
14 Menabo fi amola sage fi da ilima olelema:ne, ouligisu dunu hame gala. Di da abuliba:le Dia fi dunu ilima menabo amola sage fi ouligibi defele ouligisala:?
15 Ba:bilone dunu ilia da eno dunu menabo agoane ma:go amoga hiougisa. Ilia da dunu gasa:su amuni ganodini sa:i, hiouginana ahoa. Ilia da dunu gaguiba:le, hahawane nodone wele sia:sa. 16 Ilia da ilia menabo gasa:su amoma nodone sia:ne gadosa amola amoma gobele salasu hou hamosa. Bai ilia gasa:su amuni da ilima baligili noga:idafa liligi ilima iaha.
17 Ilia da eso huluane, mae fisili ilia gegesu gobihei amoga fifi asi gala dunu ilima mae asigili, gugunufinisilaloma:bela:?