17
Bidi Hame Hamosu Dunu amo Fidima:ne Sia:ne Gadosu
1 Hina Gode! Na sia:be goe nabima.
Na moloidafa fofada:su ba:ma:ne Dima edegesa.
Na da Dia na fidima:ne Dima diginiwane wele sia:sa.
Dia nabima.
Na da ogogole hame sia:ne gadosa.
2 Dia da na moloidafa hou dawa:beba:le,
Dia da na fidima:ne fofada:mu.
3 Dia na dogo dawa:.
Di da gasi ganodini nama misini, na hou huluane abodele ba:su.
Di da na hou amo ganodini, wadela:i hanai hou hamedafa ba:i.
4 Eno dunu da wadela:i sia: bagade sia:sa.
Be na lafiga agoai hame sia:sa.
Na da Dia hamoma:ne sia:i amo fa:no bobogei.
Amola nimi bagade hou amoma hame fa:no bobogei.
5 Na da eso huluane Dia logodili ahoasu
amola na da afuda:le hamedafa asi.
6 Hina Gode! Na Dima sia:ne gadosu
amo da Dia na sia:ne gadobe bu alofele iaha.
Amaiba:le, nama ba:leguda:le, na sia nabima.
7 Dia asigidafa hou amo nama olelema amola na gaga:ma.
Na da Di guga esalea, na da na ha lai ilima gaga:i dagoi ba:sa.
8-10 Di da Dia si amoma gaga:su hou amo defele, na gaga:ma.
Wadela:i hamosu dunu da nama doagala:sa:besa:le,
Dia ogelebaha na wamolegema.
Nimi bagade ha lai dunu da na guba:le sisiga:sa.
Ilia da asigi hou hame dawa: amola ilia da gasa fili sia: daha.
11 Ilia da na sisiga:le disi.
Ilia da na hiougia gudumusa: logo hogoi helesa.
12 Ilia da soge laione wa:me agoai,
na desega aligili medole manusa: amola dodosa:ne manusa: oulela.
13 Hina Gode misa! Na ha lai ilima gegene sefasima.
Amola, ilima hasalasima.
Dia gobihei bagade amoga gegebeba:le, na gaga:ma.
14 Wadela:i hamosu dunu da osobo bagadega esalea,
ilia da ilia hanai liligi huluane gagusa.
Ilia da nama ha laiba:le, Di na gaga:ma.
Dia da se iasu bagade ilima ima:ne, gagadole ilegei dagoi.
Amo se iasu da ilima ianu, ili baligili amola ilia mano
amola ilia mano ilia mano amo defele ilima se iasu ima:ne ba:mu da defea.
15 Be na da wadela:le hame hamoiba:le, na da Di ba:mu.
Amola, na da nedigisia, Di guga esalebeba:le, na da hahawane bagade ba:mu.