70
Fidima:ne Sia:ne Gadosu
(Gesami Hea:su 40:13-17)
1 Gode! Na gaga:ma! Hina Gode!
Wahadafa, na fidima!
2 Amo dunu na fane legemusa: manebe da hasalasili amola ededenanesima:ma!
Amola dunu amo da na bidi hamosu ba:beba:le, hahawane gala,
ili ogobele gogosiasu ba:ma:ma!
3 Dunu amo da nama lasogole oufesega:sa, amo hasalima!
Amasea, ilia da bagade beda:mu.
4 Dunu huluane da Dima masea, ilia da nodone hahawane ba:mu da defea.
Dunu huluane amo da Dia gaga:su lai dagoiba:le, Dima nodosa,
ilia da eso huluane, “Gode da baligili bagadedafa,” sia:mu da defea.
5 Na da gasa hamedeidafa! Gode! Nama hedolo misa!
Hina Gode! Di da na gaga:su gala! Nama hedolo fidila misa!