101
Hina bagade ea Ilegele Sia:su
1 Na gesami da dafawanedafa dogolegei hou
Amola moloidafa fofada:su hou olelesa.
Amo na da Hina Gode, Dima nodone gesami hea:le iaha.
2 Na hou amo ganodini giadofai da hamedafa ba:mu.
Di da habogala nama misa:bela:?
Na da na sosogo fi amo ganodini, foloai agoane esalumu.
3 Na da na sosogo fi amo ganodini, wadela:i hou dialosa:besa:le, logo hedofamu.
Dunu ilia da Godema baligi fa:be, amo ilia hamobe na higasa.
Na da ilima hamedafa gilisimu.
4 Na da wadela:i hou hame dawa:mu.
Na da wadela:le hamomusa: hame madelamu.
5 Na da dunu amo da eno dunu ea hou wadela:ma:ne sadoga sia:dasea,
amo fadegale fasimu.
Nowa da hidale hina hou gaguia gadosea, na da amo dunu fadegale fasimu.
6 Nowa da Godema mae fisili fa:no bobogesea, na da ilima hahawane ba:mu,
amola ili na hina bagade diasua esaloma:ne sia:mu.
Nowa da dafawanedafa moloidafa galea,
ilia fawane da na hawa: hamoma:mu.
7 Ogogosu dunu da na hina bagade diasu ganodini hame esalumu.
Dabua fawane moloi dunu ilia da na midadi hame esalumu.
8 Eso huluane na da wadela:i hou hamosu dunu ninia soge ganodini esafulubi
ilima gugunufinisisu hou ianumu.
Na da wadela:i hou hamosu dunu
amo da Hina Gode Ea Moilai Bai Bagade ganodini esafulubi,
amo huluane fadegale fasimu.