Yoube.
8.
Bilida:de da amane sia:i, 
“Dia sia: da udigili fo agoane ahoa. Amo sia: da dagobela:? 
Gode da moloidafa hou hamedafa giadofasa. E da eso huluane moloidafa hou fawane hamosa. 
Amabela:? Dia mano ilia Godema wadela:le hamobeba:le, E da ilia hamobe defele se iasu dabe ilima i. 
Amaiba:le, di sinidigili, Gode Bagadedafa Ema edegema. 
Dia hou da moloidafa amola ledo hamedei, di da sia:sa. Amai galea, Gode da di fidima:ne misunu. Amola E da dia liligi fisi amo huluane dima bu imunu. 
Dia liligi bagadedafa da fisi dagoi. Be di da Godema bu sinidigisia, E da dima imunu liligi da dia musa: gagui fisi, amo bagadewane baligimu. 
Di wahadafa, ninia aowalali ilia bagade asigi dawa:su ba:ma. Ilia da bagadewane hogolalu, asigi dawa:su noga:i lai dagoi. 
Bai ninia esalusu da dunumuni, hedolo dagomu. Ninia da asigi dawa:su hame gala. Ninia da udigili baba agoane osobo bagadega ahoa. 
Be ninia siba aowalalia olelesu lamu da defea. Ilia musa: fada:i sia:su noga:le nabima! 
Hano da hame galea, saga: da hame heda:sa. Saga: da heahai soge ganodini fawane ba:sa. 
Be hano da hafoga:sea, saga: fonobahadi hame damui liligi da hedolowane biosa. 
Gode Ea hou hame lalegagui dunu da amo saga: agoai gala. Ilia da Gode Ea hou hedolowane gogoleba:le, ilia dafawane hamoma:beyale dawa:su da fisi dagoi ba:sa. 
Ilia da ogome diasu gou momoge afae fawane dafawaneyale dawa:sa. 
Ilia da gou momoge afae amoba:le heda:sea, dafama:bela:? Ilia da ogome gou momoge afae galiamo agoai gagusia, noga:le leloma:bela:? Hame mabu! 
Eso masea, wadela:i gagalobo da osoboga hedolo heda:le, ifabi huluane wadela:sa. Wadela:le hamosu dunu da amo defele heda:sa. 
Wadela:i gagalobo difi da igi huluane ha:giwane idinigilisili lala:bolosa. 
Be dunu da amo gagalobo a:le fasisia, ilia da musa: amo sogebi dialu, dunu ilia da hamedafa dawa:mu. 
Dafawane! Wadela:le hamosu dunu da fonobahadi hahawane esalu, fa:no bu hamedafa ba:mu. Eno wadela:le hamosu dunu da ilia sogebi lamu. 
Be Gode da Ea fa:no bobogesu dunu hamedafa yolesimu. Amola E da wadela:le hamosu dunu hamedafa fidimu. 
E da logo doasimuba:le, di da bu oumu amola hahawane wele sia:mu. 
Be Gode da dia ha lai dunuma se dabe imunuba:le, ilia da gogosiamu. Amola wadela:le hamosu dunu ilia diasu da bu hamedafa ba:mu.”