Yoube.
13.
Dilia sia:be huluane, na da musa: nabi dagoi. Na da amo huluane dawa:! Dilia dawa:i liligi da na dawa:su hame baligisa. Na da dili defele esala. 
Be na da dilima sia:ga gegesu hame gala. Na da Godema fawane sia:ga gegesu gala. 
Dilia da hou hamedafa dawa:. Amaiba:le, eno dunu da dilia hame dawa:su hou ba:sa:besa:le, dilia udigili ogogosu sia:daha. Dilia da manoma legesu hina dunu amo da oloi uhinisisu hou hame dawa:, agoai ba:sa. 
Dilia ouiya:ma! Amasea, dunu eno da dilia da bagade dawa:su dunu dawa:mu! 
Nabima! Bai na da na hou noga:le dodofele imunusa: momagele esala. 
Dilia abuliba:le ogogosala:? Dilia ogogosu da Gode fidima:beyale, dilia dawa:sala:? 
Dilia da Gode gaga:musa: dawa:sala:? Dilia da fofada:su diasuga, Gode gaga:ma:ne fofada:ma:bela:? 
Gode da dili ha:giwane sosodosea, E da dilia hou amo ganodini noga:i liligi ba:ma:bela:? Hame mabu! Dilia da eno dunuma bagade ogogosa. Be dilia Godema agoane ogogomu da hamedei. 
Dilia moloi hame hou da wamolegei dagoi. Be Gode da dilia wamolegei hou ba:mu. Amola E da dilima gagabole sia:mu. 
Dilia da Ea gasa bagade hou ba:sea, beda:gia:mu. 
Dilia malasu sia: da hamedei, nasubu agoane gala. Dilia sia:ga gegei da gasa hame laga osobo agoai. 
Ouiya:ma! Na sia:ma:ne, logo doasima! Na sia:be ea dabe ninia hobea ba:mu. 
Na da sia:sea, bogosu dabe ba:ma:bela:? Be na da bogomusa: momagele esala. 
Na da hobea misunu hou dafawane hamoma:beyale dawa:su huluane da fisi dagoi. Amaiba:le, Gode da na fane legesea, na da hame dawa:mu. 
Amabela:? Na da hame beda:iba:le, na da Godema moloiwane sia:sea, E da nama asigima:bela:? Bai wadela:le hamosu dunu da beda:iba:le, ilia da Gode Ea odagia moloiwane sia:mu gogolesa. 
Defea! Na da na hou olelesea, dili nabima! 
Na da wali na hou noga:le dodofele imunusa: momagele esala. Bai na hou da moloidafa, na dawa:. 
Gode! Di da nama diwaneya udidimusa: mahabela:? Amai galea, na da ouiya:le bogomusa: momagele ouesala. 
Be na da Dima adole ba:su aduna gala. Di da na adole ba:su amoma defele adole iasea, na da Dima hame wamoaligimu. 
Adole ba:su afae da, ‘Nama se iabe amo yolesima!’ Eno da ‘Dia na beda:ma:ne mae banenesima!’ 
Gode! Di hidadea sia:ma! Amasea, na da Dima dabe adole imunu. O hidadea, na Dima sia:ma:ne logo doasima! Amasea, Di nama dabe adole ima. 
Na da adi hou giadofabela:? Na da adi wadela:i hou hamobeba:le, Dima fofada:ma:bela:? 
Dia abuliba:le naba:le hobeabela:? Dia abuliba:le, na Dia ha lai dunu defele ba:sala:? 
Di da na beda:ma:ne hamosala:? Na da hamedei liligi, lubi agoai gala. Di da fedege agoane gisi bioi amoma doagala:sa. 
Di da nama mi hananewane fofada:nana. Na goi fonoboga wadela:le hamoi liligi, amoba:le Di da nama fofada:sa. 
Di da na emo sia:inega la:gilisili, na osa:le gaga ahoabe Di noga:le sosodosa. Na emobu amolawane, Di da noga:le abodele ba:sa. 
Amaiba:le, na da dasai ifa defele, fofonobone dasale daha. Amola abula aowabaga mai defele, nuini daha.