Yoube.
17.
Na esalusu fisimu eso da gadenesa. Na mifo heda:mu da gadenenewane gogolei. Na da liligi eno hamomu da hamedei, bogomusa: fawane esala. 
Na da ba:lala. Dunu huluane da na ha:giwane habosesesa. 
Gode! Na da dafawane sia:sa! Na sia: nabima! Na sia:be fuligala:su dunu eno da hame. 
Di da eno dunu ilia asigi dawa:su gogolelesibiba:le, ilia moloidafa hou hame dawa:. Ilia da na mae hasalima:ne, ilia logo Dia hedofama. 
Musa: malasu sia: amogai dunu afae da muni lamusa:, ea na:iyado hohonoi. Amola ea hamobeba:le, ea mano huluane da se nabi. 
Amola wali, dunu ilia amo malasu defele, na hamoi ilia sia:sa. Ilia da misini, na odagia defo adugagala:sa. 
Na da da:i dioiba:le, na si da wadela:mu gadenesa. Na lobo amola emo da geloga:le, baba agoai ba:sa. 
Dunu mogili, ilia hou da moloidafa ilisu sia:sa, amo ilia na hou ba:beba:le fofogadigisa. Ilia da na da Gode Ea hou hamedafa dawa: sia:sa. 
Dunu amo da ilia hou da noga:idafa ilisu sia:sa, ilia amola da na Gode Ea hou hame dawa: sia:sa. Amola ilia dawa:i da dafawane ilia dawa:sa. 
Be ilia huluane da na midadi misini aliligisia ganiaba, na da iliga dunu afae bagade dawa:su galebe hamedafa ba:la:loba. 
Na hamomu eso da baligi dagoi. Na hamomusa: ilegei da bugi. Na hobea misunu hou dafawane hamoma:beyale dawa:su da fisi dagoi. 
Be na na:iyado dunu ilia da gasi amo da hadigi sia:sa. Ilia da hadigi da gadenei sia:sa. Be na dawa:, na da gasi ganodini esala. 
Nama hobea misunu dafawane hamoma:beyale hou dawa:be da bogosu soge fawane dawa:sa. Amogawi na gasi ganodini dialumu. 
Na da bogoi uli dogoi amoma na da na ada dio asulimu. Amola daba: amo da na da:i nabe, amoma, “Na ame amola na dalusi,” na da sia:mu. 
Na hobea misunu hou dafawane hamoma:beyale dawa:su da habidili ganabela:? Nowa da amo ba:sala:? 
Na da bogoi dunu ilia sogega gudu dasea, hobea misunu hou hahawane hamoma:beyale dawa:su da na gilisili hame masunu.”