Yoube.
24.
Gode da abuliba:le fofada:su eso hame ilegesala:? Abuliba:le Ema hawa: hamosu dunu da moloidafa sia:ma:ne, fofada:su eso hame ilegesala:? 
Dunu ilia da soge eno lama:ne, alalo legesu afadenesa. Ilia sibi wa:i gilisima:ne, eno sibi wamolasa. 
Ilia da guluba: mano ilia dougi wamolasa, amola didalo ea dabe bu ima:ne sesesa, ea bulamagau samogesa. 
Ilia hame gagui dunu amo moloidafa hou ba:ma:ne logo hedofasa. Amola ilia hahani dunu sesebeba:le, ilia hobeale, wamoaligisa. 
Amaiba:le, hame gagui dunu da sigua dougi agoane, wadela:i hafoga:i sogega ilia ha:i manu hogosa. Ilia manogili ha:i manu ima:ne, sogebi eno hame ba:sa. 
Ilia da soge hame gaguiba:le, inia ifabia dadamisa. Ilia wadela:i hamosu dunu ilia waini sagaiga waini fage faisa. 
Gasia, ilia abula sosone diasu hameba:le, anegagini golasa. 
Gibu amo da goumia daha amoga ilia da:i nanegasa. Ilia da nanegaiga anegagiba:le, igihaguga aliligisa. 
Wadela:le hamosu dunu da guluba: mano dudubu ili udigili hawa: hamoma:ne laha. Eno dunu da ilima dabe bu imunu galea, ilia da ilia mano amoga dabe imunusa: agoane samogesa. 
Be hame gagui dunu da da:i nabado agoane ahoa. Ilia ha:aligiwane widi ha:i manu gamisa. 
Ilia da olife susuligi hamomusa:, olife fage banesa, amola waini hano hamoma:ne, waini fage ososa:gisa, be ilila: da hano hanai. 
Moilai bai bagade ganodini, fofa:gi amola bogolalebe dunu ilia se nabawane wele sia:sa. Be Gode da ilia sia:ne gadosu hame naba. 
Wadela:i hamosu dunu da hadigidafa higasa. Ilia da amo hadigi hame dawa:digisa, amola amoma hame fa:no bobogesa. 
Hehebolo mabe galu, medole legesu dunu da nedigili, wa:legadole, hame gagui dunu medole legemusa: ahoa. Gasia, e da wamolasu hou hamosa. 
Inia uda adole lasu dunu da gasima:ne ouesalu, dunu eno da e mae ba:ma:ne, ea odagi dedebosa. 
Gasia, wamolasu dunu da diasu fili ganodini maha. Be hayoga ilia wamoaligisa amola hadigi ganodini hame ahoa. 
Ilia da eso ea hadigi amoma beda:i gala. Be gasia ilia beda:su hame dawa:.” Soufa da amane sia:i, 
“Wadela:le hamosu dunu da hano leda:i amoga mini asi dagoi ba:sa. Gode da ilia soge amoga gagabusu aligima:ne sia:sa. Ilia da ilia waini sagaia hawa: hamomusa: hame ahoa. 
Eso da gia:sea, mugene ofo da alalolesisa. Amo defele, wadela:i hamosu dunu da dunu esalebe sogega bu mae ba:ma:ne alalolesisa. 
Ilia emedafa da ili gogolelesisa. Daba: da ilia da:i na dagosa. Amola ilia da ifa fili sa:i defele dasasa. 
Bai ilia da didalo ili se nabima:ne hamoi, amola aligime uda ilima hame asigi galu. 
Gode da gasa bagadeba:le, E da mimogo gasa bagade dunu gugunufinisisa. Gode Ea hamobeba:le, wadela:le hamosu dunu da bogogia:sa. 
Gode da ili fonobahadi gaga:iwane esaloma:ne, logo doasisa. Be E da ili eso huluane ha:giwane sosodo aligisa. 
Wadela:le hamosu dunu da fonobahadi hahawane amola bagade gaguiwane esala. Be amalu ilia da gagalobo amola widi gisi damui defele, hedolo biosa. 
Amo da dafawane hame, nowa da sia:ma:bela:? Nowa da na adoi da dafawane hame sia:ma:bela:?”