Yoube.
26.
Yoube da amane sia:i, 
“Dilia da na fidiba:! Na da hahani amola gasa hame galebe. 
Di da nama fada:i sia: noga:idafa olelesase! Na da gagaoui dunu, be dilia da dilia bagade dawa:su nama olelesase! 
Dilia sia: huluane, nowa da nabima:bela:? Nowa da olelebeba:le, dilia amane sia:sala:?” Bilida:de da amane sia:i, 
“Bogoi dunu ilia a:silibu osobo hagududi hano amo ganodini fofogosa. 
Gode da bogoi dunu ilia soge ba:lala. Ea siga mae ba:ma:ne, amo soge da hame alaloi. 
Gode da ga (north) mu amo gasi gagai. E da osobo bagade hame fufua amo ganodini gosagisi. 
Gode Hi fawane da mu mobi amo hanoga nabalesisa. Amola ilia dioi bagadeba:le, ili mae fudagala:ma:ne hamosa. 
E da oubi ufa: amo mobiga uligilisisa. 
E da gasi amola hadigi mogima:ne, osobo bagade dogoa sisiga:le dedenesi. 
Fedege agoane, E da bada amoga mu udidili gaguia gadosa, amoma badugusia, ilia da beda:ga fofogosa. 
E da Ea gasaga, hano wayabo bagade hasalasi. E da gasa bagadeba:le, wadela:i ohe bagade La:iha:be gugunufinisi. 
Gode Ea lafi holo da mu haisewe hamoi. Amola ohe bagade da hobeamusa: dawa:loba, E da amo Ea loboga medole legei. 
Be Ea gasa bagade hou da amo bagadewane baligisa. Amo hou ninia nababeba:le, da sadoga sia: agoai gala. Bai nowa da Gode Ea Gasa Bagadedafa hou dawa:ma:bela:?”