Yoube.
35.
Yoube! Di da Gode Ea siga ba:ma:ne moloidafa fawane hamosa sia:be, amo da defea hame. 
Di da Godema amane sia:sa. ‘Na wadela:i hou da Dima bai hame gala. Na da wadela:i hou hame hamoiba:le, bidi noga:i hamedafa ba:i.’ Amo sia: amola da defea hame. 
Na da dima amola dia samalalima gilisili adole imunu. 
Mu ba:ma! Mu mobi gadodafa dialebe amo ba:ma! 
Di da wadela:le hamoi ganiaba, Gode da se hame naba:loba. Di da wadela:i hou gebewane hamonanea, Gode da Ea hou afadenema:bela:? 
Di da moloidafa hou hamobeba:le, Godema fidima:bela:? Gode da dima fidisu lamu da hamedei. 
Dia da wadela:le hamobeba:le, dunu eno da se naba. Amola dia da noga:i hou hamosea, amo da ilia hou fidisa. 
Gasa fi dunu da eno dunu banenesisia, ilia da gogonomosa. Ilia dunu eno ili gaga:ma:ne wele sia:sa. 
Be ilia da ili hahamosu Godema hame sinidigisa. Be ilia da gasi dunasi amo ganodini se nabawane esalea, Gode da ilima hobea misunu hahawane hou dafawane hamoma:beyale dawa:lusu imunusa: dawa:. 
Ilia Godema hame sinidigisa. Be Gode da bagade dawa:su hou ninima iaha. Amola E da amo ninima iabeba:le, ninia asigi dawa:su da ohe fi amola sio fi huluane ilia asigi dawa:su baligisa. 
Ilia da Godema, ili fidima:ne wele sia:sa, be Gode da ilima dabe hame adole iaha. Bai ilia da hidale gasa fili agoane wadela:le hamosa. 
Ilia udigili agoane fidima:ne wele sia:sa. Bai Gode Bagadedafa da ili hame ba:sa amola ilia sia: hame naba. 
Yoube! Di Gode hame ba:sa sia:sa! Be gebewane ouesaloma! Gode da Ea ilegei eso doaga:sea, fofada:mu. 
Di da Gode da se dabe hame iaha dawa:sa. Di da Gode da wadela:i hou hame abodesayale dawa:sa. 
Di da bu gebewane sia:nanumu da hamedei. Na ba:loba, dia da bai hame dawa:beba:le, udigili sia:daha.