Gesami Hea:su.
7.
Na Hina Gode! Na Dia gaga:ma:ne Dima maha. Nama ha lai da na se bobogesa. Dia gaga:ma! 
Dia da hame gaga:sea, nama ha lai dunu da soge laione wa:me agoane, na lale, aboda:ne asili, dunu hame esalebe sogega, fane dadega:le, na dagoi hamedafa ba:mu. 
Na Hina Gode! Na da dunu eno amoma giadofale hamoi galea, o na sama ema hohonoi galea, o nama ha lai amoma udigili wadela:le hamoi galea, amo hou afae na da hamoi galea, 
defea, nama ha lai dunu da na doagala:le, na gagulaligimu da defea. Amola ilia da na fane salawane, na da osoboga bogola sa:imu da defea. 
Hina Gode! Di nama ha lai dunuma ougili doagala:ma. Di wa:legadole na fidima. Di da moloidafa fofada:su fawane dawa:. 
Amaiba:le, Di fifi asi gala dunu huluane Dima gilisila misa:ne sia:ma. Amola, Dia ilima gasa bagadewane ouligima. 
Di da fifi asi gala dunu huluane ilima Fofada:su Dunu esala. Hina Gode! Na fidima:ne fofada:ma. Na da wadela:i hou hame hamoi. 
Di da moloidafa Gode esala. Di da ninia asigi dawa:su amola ninia dogo ganodini hanai hou huluane dawa:beba:le, fofada:nana. Wadela:i hamosu dunu ilia wadela:i hou hedofama. Amola, noga:i dunu ilima bidi ima. 
Gode da na Gaga:su dunu. E da nowa dunu da Ea sia: nabawane hamosea, amo E da gaga:sa. 
Gode da moloidafa fofada:su dunu. E da wadela:i hamosu dunu ilima fofada:nanu, se iaha. 
Ilia da ilia hou hame afadenesea, E da fedege agoane Ea gobihei mema:ne debesa. E da Ea dadi dili ouligisa. 
E da Ea gasa bagade gegesu liligi lale, ea dadi amoga dilaligili oulela. 
Ba:ma! Wadela:i hamosu dunu da ilia dogo ganodini wadela:i hamomusa: dawa:lala. Ilia da moso hamomusa: dawa:lala, amola ogogosu bagade hamonana. 
Be ilia eno dunu sa:ima:ne sanisisia, ilisu da amo sani ganodini daha. 
Amaiba:le, ilia wadela:i hou da ililima se iasu dabe iaha. Amola ilia nimi bagade hou da ililima se iasu iaha. 
Na da Hina Gode Ea moloidafa fofada:su hou ba:beba:le, Ema nodosa. Na da Hina Gode Gadodafa Ema nodone gesami hea:lala.