Gesami Hea:su.
29.
Dilia Hebene fi! Hina Godema nodone sia:ma! Ea hadigi amola gasa bagade hou amoma nodoma. 
Hina Gode Ea Hadigi Dio amoma nodoma. E da doaga:sea Ea midadi beguduma. 
Hina Gode Ea sia: da hano wayabo bagade da:iya naba. Hadigi Gode Ea sia: da gugelebe agoane naba. Ea sia: da hano wayabo bagade da:iya gobagala:sa. 
Hina Gode Ea sia: da gasa bagade amola gadodafa agoane lalaba ahoa. 
Hina Gode Ea sia: da Lebanone dolo ifa amo fifila ahoa. 
Ea sia:beba:le, Lebanone goumi alelaloi da bulamagau mano agoane soagala:be agoane hamosa. Amola Ea sia:beba:le, Hemone Goumi da waha debe bulamagau gawali agoane soagala:sa. 
Hina Gode Ea sia: da ha:ha:na da:gini gagala:be agoane hamosa. 
Ea sia:beba:le, hafoga:i soge da igugusa. E da Ga:idesie hafoga:i soge igugulisisa. 
Hina Gode Ea sia: da ‘ouge’ ifa igugusa amola ea lubi da gahea dudugini dadafulala. Amogalu dunu huluane Ea Debolo diasu ganodini, “Hina Gode da Hadigidafa!” amane wele sia:sa. 
Hina Gode da hano lugudu osodogoi amoga ouligisa. E da eso huluane mae fisili, Hina Bagade agoane ouligilalumu. 
Hina Gode da Ea fi dunuma gasa iaha. Amola E da ilima hahawane dogolegele olofosu hou iaha.