Gesami Hea:su.
33.
Molole hamosu dunu, dilia! Hina Gode Ea hamoi dawa:beba:le, hahawaneba:le wele sia:ma! Ema nabasu dunu! Ema nodone sia:ma! 
Hina Godema nodoma:ne, baidama amola ilibu amola sani baidama huluane dududu sa:ima. 
Ema gaheabolo gesami hea:ma. Dawa:iwane sani baidama duma amola hahawaneba:le, wele sia:ma. 
Hina Gode Ea sia:i liligi huluane da dafawanedafa. Amola ea hamobe huluane da mugulumu hamedei ba:sa. 
Hina Gode da moloidafa hou amoma dogolegesa. Osobo bagade da Ea asigidafa hou amoga nabai gala. 
Hina Gode da Ea sia:ga fawane mu amola eso amola oubi amola gasumuni huluane hahamoi dagoi. 
E da hano wayabo huluane gagadolesi. E da fedege agoane, hano wayabo bagade lugudu huluane gagadole legei. 
Osobo bagade dunu huluane! Hina Godema beda:ma! Ema nodone sia:ma! 
Ea sia:beba:le fawane, E da osobo bagade hahamoi dagoi. Liligi huluanedafa da Ea sia:beba:le fawane doaga:i. 
Hina Gode da fifi asi gala ilia ilegesu amo hedofasa. E da ilia ilegei mae hamoma:ne, logo ga:sa. 
Be Ea ilegei da mae yolele, amanewane dialumu. Ea hanai ilegei da gebewane dialumu. 
Fifi asi gala amo da Hina Gode da ilia Godedafa sia:sa, amo da hahawane gala. Hina Gode Ea ilegele lai dunu da hahawane bagade gala. 
Hina Gode da Hebene gadonini, dunu fifi asi huluane ba:le gudusa. 
Ea ouligisu sogebi amoganini, E da osobo bagade fifi asi dialebe ilima ba:le gudusa. 
E da ilia asigi dawa:su huluane hahamosa amola ilia hamobe huluane dawa:. 
Osobo bagade hina bagade da ea gasa bagade dadi gagui wa:i, amoba:le hame hasalasa. Dadi gagui dunu da ea gasa bagadeba:le, hame hasala. 
Gegesu hosi da hasalimu hamedei. Ilia da gasa bagade, be amoga gaga:su da hame ba:mu. 
Hina Gode da dunu amo da Ema nabawane fa:no bobogesa amola Ea mae fisili asigidafa hou dafawaneyale dawa:sa, amo noga:le ouligisa. 
Ili da mae bogoma:ne, E da ili gaga:sa. Amola ha:i esoga, ili esaloma:ne fidisa. 
Hina Gode da ninima hobea misunu hou amo noga:le ouligimu, ninia dafawaneyale dawa:sa. E da ninia gaga:su dunu amola ninia fidisu dunu. 
Ninia da Ea houba:le hahawane gala. Ninia da Ea Hadigi Dio dafawaneyale dawa:sa. 
Hina Gode! Dia mae fisili asigidafa hou da ninima dialoma:ma! Bai ninia da Diba:le, dafawane hamoma:beyale dawa:beba:le, Dima fa:no bobogesa.