Gesami Hea:su.
52.
Gasa fi dunu! Abuliba:le di da dia wadela:i houba:le hidasala:? Gode Ea asigidafa hou da eso huluane dialalalumu. 
Di da eno dunu wadela:lesimusa: ilegesa. Dia gona:su da gobimedai mei agoai gala. Di da mae fisili, eso huluane ogogosu sia: hahamonesilala. 
Di da wadela:i hou hanane, hou noga:i amo higasa. Di da ogogosu hanane, dafawane sia: amo higasa. 
Di da ogogosu dunu! Di da dia sia:ga eno dunu se nabima:ne hanasa. 
Amaiba:le Gode da di eso huluane amane dialoma:ne wadela:lesimu. E da di gaguli, dia diasu amoga di mae esaloma:ne di fadegale fasimu. E da di medole legemu. 
Moloidafa dunu da amo hou ba:beba:le, beda:mu. Amasea, ilia da dima oufesega:ne, amane sia:mu, 
“Ba:ma! Amo dunu da Godema gaga:su lama:ne hame asi. Be e da ea bagade gagui hou amola ea wadela:i hou amoga e gaga:ma:beyale dawa:i. 
Be na da olife ifa Gode Ea diasu ganodini heda:lebe, agoane ba:sa. Na da Ea maedafa fisili asigidafa hou amo dafawaneyale dawa:lala. 
Gode! Na da eso huluane Dia nama hamobe amoba:le Dima nodone sia:nana. Amola Dia fi dunu ilia si da:iya, Dia noga:idafa hou amo olelelalumu.