Gesami Hea:su.
60.
Gode! Di da nini higale, nini hasali. Di da ninima ougi galu. Be wali ninima bu beba:ma! 
Di da soge fogoma:ne hamoi amola Di da soge damuni, a:lesi. Soge da agele sa:imu gadeneiba:le, ea fa:ginisi amo uhinisima. 
Dia hamobeba:le, Dia fi da se bagade naba. Ninia da adini ba:i dunu defele, amane gigiawasa ahoa. 
Di da dunu Dima beda:be, ilima diwaneya udidibi amo mae ba:ma:ne sisai dagoi. 
Dia gasa bagade amoga nini gaga:ma! Dunu amo da Dia dogolegei, ilia da gaga:su ba:ma:ne, ninia sia:ne gadosu amoma dabe adole ima. 
Ea hadigi sogebi amogainini, Gode da amane sia:i “Na da hasalasili, Siegeme moilai bai bagade amola Sagode Fago amo alalo hahamone, huluane momogili Na fi dunuma imunu. 
Gilia:de da Na:. Ma:na:sa amola da Na:. Ifala:ime da Na dialuma figisu amola Yuda da Na Hina Bagade Dagulu. 
Be Na da Moua:be amo na lobo dodofesu ofodo hamomu. Amola Na da Idome amo Ni lai dagoi, amo enoga dawa:digima:ne, Na da emo salasu gisa:le, Idomema galagamu! Filisidini dunu da Nama bagadewane hasalasibiba:le, Nama ha:gi wele sia:su hamomu, ilia da dawa:bela:? Amane hame!” 
Gode! Nowa da na oule, gasa bagade gagili sali moilai fi amoga heda:ma:bela:? Nowa da na sigi aligili, Idome amoga masa:bela:? 
Di da dafawane nini higale fisiagabela:? Di da ninia dadi gagui dunu ilima gilisili mogodigili gadili masa:bela:? 
Ninima ha lai dunu da nini hasalasa:besa:le, Dia nini fidima. Bai osobo bagade dunu ilia fidisu da hamedeidafa gala. 
Gode da ninimagasea, ninia da ili hasalasimu. E da ninima ha lai dunu ili hasalimu.