Gesami Hea:su.
73.
Gode da dafawane Ea noga:idafa hou amo Isala:ili dunu ilima olelesa. E da nowa dunu ea dogo da ledo hamedei, ilima asigisa. 
Be na dafawane hamoma:beyale hou da gadenenewane fisi dagoi ba:i. 
Bai na da hidale gasa fi dunu amoba:le mudai. Na da wadela:i hamosu dunu hahawane esalebe ba:beba:le, mudale ba:i. 
Ilia da se hame naba. Ilia gasa fili, dagamuiwane esala. 
Ilia da dunu oda defele, se nabasu hame ba:sa. Bidi hamosu da noga:i dunu ilima doaga:sa. Be wadela:i hamosu dunu da bidi hamosu hame ba:sa. 
Amaiba:le, ilia da gasa fi hou gisa:gisu defele ga:sa, amola gegesu hou abula agoane ga:sa. 
Ilia dogoga, wadela:i hou fawane da gadili ahoa. Amola ilia asigi dawa:su ganodini ilia da mae fisili, wadela:i ilegesu fawane dawa:lala. 
Ilia da eno dunuma oufesega:lala, amola wadela:i liligi amo sia:daha. Ilia da gasa fili, eno dunu banenesimusa:, ilegelala. 
Ilia da Gode (Hebene ganodini esala) amo Ea hou olelesea, wadela:le sia:sa. Amola ilia da osobo bagade dunu ilima gasa fili, ilima agoane hamoma:ne sia:sa. 
Amaiba:le, Gode Ea fi dunu amolawane da ilima sinidigili, hanaiwane ilia sia:be huluane dafawaneyale dawa:sa. 
Ilia da amane sia:sa, “Gode da ninia hou hame dawa:mu. Gadodafa Gode da ninia hamobe hame hogole ba:mu.” 
Wadela:i hamosu dunu da agoaiwane gala. Ilia da sadi dagoi, be eso huluane eno liligi lamusa: dawa:lala. 
Amaiba:le, na da udigili na hou ledo hamedei, amo udigili ouligibela:? Na da wadela:i hou mae hamone, noga:i hou fawane hamoi, agoane udigili hamobela:? 
Gode! Di da hahabe asili daeya huluane, na se nabima:ne hahamonesi. Hahabe huluane, Di da nama se bidi iasu. 
Be na da agoai sia: sia:noba, na da Dia fi dunu ilia sia:dafa agoane hame sia:na:noba. 
Na da amo gasa bagade hou ea bai dawa:ma:ne, asigi dawa:su logo hogoi helei. Be hamedei fawane ba:i. 
Amalalu, na da Dia Debolo diasu ganodini golili sa:i. Amalalu, na da wadela:i hamosu dunu ilima doaga:mu hou dawa:digi. 
Di da ili sadenama:ne soge amoga asunasimu. Amasea, Di da ili dafane gugunufinisimu. 
Ilia da hedolowane wadela:lesi dagoi ba:mu. Ilia da wadela:le dogonesi dagoi ba:mu. 
Ilia da simasia ba:su amo da hahabe asi dagoi ba:sa, amo defele ba:sa. Hina Gode! Di da wa:legadosea, ilia da alalolesi dagoi ba:mu. 
Musa, na dawa:su da gamoga:i agoai galea, amola na dogo ganodini na da se nabaloba, 
Na da gagaoui, ohe agoai galu. Na da Dia hou noga:le hame dawa:digi. 
Be amowane, na da eso huluane di gadenene lela, amo Di da na lobolele lela. 
Di da Dia olelebe amoga nama logo olelesa. Amola na da logo bidiga amogai doaga:sea, Di da nama nodone yosia:mu. 
Na da Hebene ganodini fidisu dunu eno hame gala. Be Di fawane! Na da Di lai galeawane, na da osobo bagadega eno dunu hame hogomu. 
Na asigi dawa:su amola da:i hodo da gogaeamu. Be Gode da nama gasa iaha. Na da Ea hou laiba:le, defele gala. 
Dunu amo da Di fisiagasea, ilia da dafawane bogogia:mu. Di da dunu amo da Dima baligi fa:sea, amo wadela:lesimu. 
Be amomane, na da Gode gadenenewane esalebeba:le, nodonana. Na da Ouligisudafa Hina Gode Ea gaga:su lai dagoiba:le, nodonana. Na da Ea hamoi huluane sisia:i labeba:le, nodonana.