Gesami Hea:su.
83.
Gode, Di ouiya:le mae dialoma! Di hamedigili mae dialoma! Mae ouiya:ma! 
Ba:ma, Dima ha lai dunu da dodona:gi bagade, amola Dima higa:i dunu da Dima odoga:sa. 
Ilia da Dia dunu fi ilima hamomusa: sia: wamo ilegesa! Ilia da Dia gaga:i dunu fi amo wadela:lesimusa: wamo sia: ilegesa. 
“Misa!” ilia da sia:sa. “Ninia da ilia fifi asi amo wadela:lesila:di, amasea, Isala:ili da gogolesa, gogoleidafa dialoma:ne.” 
Ilia da ilia hamomusa: ilegei amo hamomusa: sia:nu amola Dima didili hamomusa:, eno dunuma gilisisa. 
Idome fi dunu amola Isiama:iele fi dunu, Moua:be fi dunu amola Ha:galaide fi, 
Giba:le, A:mone amola A:malege fi dunu, amola Filisidini amola Daia fi dunu. 
Asilia fi amolawane da ilima madelale amola gasa bagade fili, A:moulaide amola Moua:be (Lode egaga fi) ilima gilisisa. 
Di da Midia:ne fi amola Sisela amola Ya:bini ilima Gisione Hanoga hamoi, amo defele ilima hamoma. 
Di da ili Enedo sogebia hasalasibiba:le, ilia da:i hodo da osobo da:iya dasale sa:i. 
Di Olebe amola Sibe, elama hamoi defele, ilia bisilua amo ilima hamoma. Di da Siba amola Sa:lamouna hasalasi defele, ilima hamoma. 
Elea da amane sia:i, “Ania da Gode Ea Soge amo anigili lamu.” 
Gode! Gulu defele ili dudulisima! Widi gisi bioi defele foga mini masa:ma. 
Lalu da iwila soge nesea, lalu gona:su da agolo soge amo madelala asili, nene ahoa. 
Amo defele, wadela:i hou hamosu dunu Dia gasa bagade mulu amoga sefasima! Amola Dia gasa bagade fo amoga ili beda:ma:ma. 
Hina Gode! Ilia odagi amo gogosiasuga dedebosima, amola Dia gasa bagade hou amo dawa:digima:ma. 
Ilia da mae fisili eso huluane, hasalasu amola beda:su bagade fawane ba:mu da defea. Ilia da dafawane gugunufinisi galea fawane bogogia:ma:ma. 
Difawane da Hina Gode, amo ilia dafawane dawa:ma:ma! Amola Difawane da osobo bagade amo ganodini Ouligisudafa amo ilia dawa:ma:ma.