Gesami Hea:su.
90.
Hina Gode, Di da eso huluane ninia esalebe galu. 
Musa:dafa Di da agolo soge amola osobo bagade amo hame hahamoiawane, Di da mae dagole fifi ahoanusu Gode esalu amola Di da ninia Gode esalumu. 
Di da nini musa: esalua amogai buhagima:ne sia:sa. Di da nini afadenene bu gulu hamosa. 
Ode 1,000 gidigisia, amo Dia ba:sea da ha afaedafa agoai ba:sa, amo da aiya eso baligi amo agoai ba:sa, amola eso dunumunidafa gasia agoai ba:sa. 
Di da nini hano heda:iga mini ahoabe agoane gisa ahoa, be ninia golaia ba:be amoali seda da hame gala. Nini da gisi fage hahabe fadegalalu heda:le osomo amo da falegalu bu daeya biobe agoai gala. 
Nini da Dia ougi hou amoga gugunufinisi dagoi, nini da Dia gasa bagade ougi hou amoga beda:i gala. 
Di da ninia wadela:i hou nini wamo hamobe Dia ba:be amo huluane Dia midadi ligisisa. 
Ninia fifi ahoanusu da Dia ougi hou amoga gasiguda:le dunumuniginisisa, amola sia: sadoga sia:sea fofonobona ahoabe agoai gala. 80 
Nini da ode 80agoane esalumu galu, be amomane ninia da ode 70 amoga fawane doaga:sa, ninia da gasa galu ganiaba, ilia ninima gaguli mabe da bidi hamosu amola disu fawane gala, esalusu da gadenene baligimu, amola ninia da asi hame ba:mu. 
Nowa da Dia gasa bagade ougi hou amo bagade nabibala:? Dia ougi hou gasa bagade mabe amoga beda:su hou da Nowa dawa:ma:bela:? 
Ninia esalusu da habowali seda ganumu, amo ninima olelema! Amasea ninia da noga:le dawa:su dunu esalumu. 
Dia ougi hou da habowali seda dialoma:bela:? Hina Gode, Dia hawa: hamosu dunuma asigima! 
Eso huluane hahabe Dia da nini Dia mae fisili asigidafa hou amoga ianoma, amasea ninia da esaleawane Dima nodone gesami hahawane hea:lumu. 
Di da ode bagohame amoga da:i diosu fawane ninima ianusu. Be waha Di da ninima hahawane hou bagade ima. 
Ninia da Dia hawa: hamosu dunu. Ninia da Dia hamobe hou bagadedafa amo ba:ma:ma. Niniga fifi ahoanebe ilia da Dia Hina bagade hou ba:ma:ma. 
Ninia Hina Gode, Dia hahawane dogolegele fidisu hou da ninima dialoma:ma. Ninia hamobe huluane da didili hamoma:ma.