Gesami Hea:su.
94.
Hina Gode, Di da Gode amo da se imunusa: dawa:. Dia ougi hou olelema! 
Di da fifi asi gala dunu huluane ilima fofada:su esala! Di wa:legadole amola hina: da:ima hidale nodone hamobe dunu ilima hi giadofale hamobe defele amo dabe ima! 
Habowali seda wadela:i hou hamosu dunu da nodoma:bela:? Hina Gode, habowali seda ganoma:bela:? 
Wadela:le hamoi dunu da habowali seda nodonanoma:bela:, amola ea wadela:le hamoi amoga hidale sia:noma:bela:? 
Hina Gode, ilia da Dia dunu amo fane dalega:le sala, amalu ilia da Dimagai dunu ososa:gilisisa. 
Ilia da uda didalo amola guluba: mano amola sofe misi dunu ninia soge ganodini esalebe dunu amo huluane fane lelegesa. 
Ilia da amane, sia:sa “Hina Gode Ea da nini hame ba:sa. Isala:ili Gode da nini hame dawa:digi.” 
Na dunu fi! Dilia da abuli gagaoui agoane ganoma:bela:? Dilia da habogala noga:le dawa:ma:bela:? 
Dilia da adi dawa:bela:? Gode da ninia ge hahamoi. E da sia: hame nabala:? Gode da ninia si hahamoi. E da hame ba:sala:? 
E da fifi asi gala ilima ouligisa! E da ilima se bidi ima:bela:? E da osobo bagade dunu huluane ilima olelesu dunu. E da dawa: hame ganabela:? 
Hina Gode da dunu huluane ilia asigiga dawa:be huluane dawa:sa, E da ilia dawa:su da hamedene liligi amo dawa: 
Hina Gode! Nowa dunu amo Di da ema Dia sema olelebe. e da hahawane bagade gala! 
Bidi hamosu eno da ema mae doaga:ma:ne, Di da helefisu ema iaha, amogainini wadela:i hou hamosu dunu ili sa:ima:ne uli dogoi da dogosa. 
Hina Gode da Ea dunu fi hame fisiagamu. E da Ea dunu fi ilima hame gogolemu. 
Moloidafa fofada:su hou da fofada:su diasu ganodini bu ba:mu, amola moloidafa dunu ilia da amo hou fuligala:mu. 
Nowa da wadela:i hou hamosu amoma higale nama ga:musa: wa:legadobela:? Nowa da wadela:i hou hamosu dunu ilima higale, namagale aligibala:? 
Hina Gode da na hame fidi ganiaba, na da hedolowane ouiya:i soge amoga asi gala:loba. 
Na da amane sia:i “Na da dafabe!” be Hina Gode Dia mae fisili asigidafa hou amoga, Dia na fidi. 
Habogala na da da:i dione dadawa:sea, Di da na lalesalawene hahawane hamosa. 
Di da giadofale fofada:su dunu ilima hahamomu hou da hame gala, amo ilia da giadofale fofada:su hamoma:ne sia:sa, amola amo ilia da noga:i dunu amo fane legemusa:, wamo sia: ilegele amola molole hamosu dunu amo fane lelegesa. 
Be na: Hina Gode da na gaga:sa. E da na ouligisa. 
Be eno dunu ilia da wadela:i hou hamobeba:le, Ninia Hina Gode da ilima se bidi imunu, amola ilia da wadela:i hou hamobeba:le ili gugunufinisimu.