Gesami Hea:su.
97.
Osobo bagade, hahawane nodoma! Hina Gode da Hina Bagadedafa! Hano wayabo bagade ganodini oga dialebe gala! Dilia da nodoma! 
Mu mobi amola gasi da E sisiga:sa. E da moloidafa amola moloidafa fofada:su amoga ouligisa. 
Lalu da Ea midadi bisili ahoana, Ema ha lai dunu E sisiga:le aliligi amo nene ahoa. 
Ea da:gini gala:be amoga osobo bagade huluane da digaga:la:sa! Amola osobo bagade da amo ba:sea yagugusa. 
Agolo huluane da osobo bagade Hina Gode Ea midadi gamali ulagisia daeane dabe agoai ba:mu. 
Hebene da Ea moloidafa hou amo olelesa, amola fifi asi gala huluane da Ea hadigi amo ba:sa. 
Ogogole ‘gode’ huluane da Hina Gode Ea midadi begudusa, amaiba:le dunu huluane ogogole ‘gode’ ilima nodone sia:ne gadobe da gogosiasu fawane ba:mu. 
Hina Gode! Saione fi dunu amola Yuda moilale gagale fi dunu da hahawaneba:le nodosa. Bai Dia fofada:su hou da moloidafa. 
Hina Gode Bagadedafa! Di da osobo bagade fifi asi gala huluane Ouligisudafa. Di da ogogole ‘gode’ amo huluane baligi dagoi. 
Hina Gode da nowa da wadela:i hamosu amo higabe, ilima nodosa. E da Ea dunu ilia esalusu amo gaga:sa. Wadela:i hou hamosu dunu ilia gasa amoga Ea fi dunu wadela:lesisa:besa:le, E da ili gaga:sa. 
Hadigi da moloidafa dunu amodili diga:sa. Amola hahawane hou da noga:i dunu amodili diga:sa. 
Molole hamobe dunu dilia huluane da Hina Gode Ea hahamobe hou amo dawa:le, hahawane ba:ma! Hadigi Gode Ea hamobe bu dawa:ma amola Ema nodone sia:ma!