Gesami Hea:su.
110.
Hina Gode da na Hina Godema amane sia:i, “Na lobodafadili fili, amogai esaleawane, Na da Dia ha lai dunu da Dia emoga osa:laligima:ne hasalasimu. 
Saione Goumia, Hina Gode da Dia Hina Bagade hou sedagilisimu. E amane sia:sa, “Dia ha lai dunu ili ouligima.” 
Dia ha lai dunuma gegebe eso amoga, Dia fi dunu da hahawane Di fuligala:musa: misunu. Hehebolo mabe galu oubi mogele defele, Dia ayeligi dunu da Di hadigi agologa esalea, amogai Di fidimusa: misunu. 
Hina Gode da dafawanedafa ilegele sia:i. Amo E da bu hame afadenemu. E amane sia:i, “Di da Melegisedege gobele salasu dunu ea sosogo fi amo ganodini eso huluanedafa gobele salasu dunu esalumu.” 
Hina Gode da Dia lobodafadili lela. E da ougi heda:sea, osobo bagade hina bagade dunu hasalasimu. 
E da fifi asi gala huluanema fofada:mu. E da gegesu sogebi amo, bogoi da:i hodo amoga nabalesimu. E da osobo bagade huluane amo ganodini, Hina bagade dunu huluane hasalasimu. 
Hina Bagade da hano amo logo bega: dalebe, amoga dili manu. Amola amoga gasa laiba:le, E da gasa fili aligili, gegenanu hasalasimu.