Gesami Hea:su.
116.
Na da Hina Gode dogolegesa. Bai E da na sia:ne gadosu naba. 
Na da eso huluane Ema wele sia:sea, E da na wele sia:su naba. 
Na da baligiliwane da:i dioi amola beda:i galu. Bai na bogole, bogoi uli dogoiga gudu sa:imu gadenene ba:i. 
Amalalu, na da Hina Godema amane wele sia:i, “Hina Gode! Na Dima ha:giwane edegesa! Na gaga:ma!” 
Hina Gode Ea hou da noga:idafa, amola E da asigisa amola gogolema:ne olofosu dawa:. 
Hina Gode da gasa hamedei hahanibi dunu gaga:sa. Na bogomu se nabaloba, E da na gaga:i. 
Na da mae beda:iwane hahawane esalumu da defea. Bai Hina Gode da na noga:le fidi. 
Hina Gode da na bogosa:besa:le, gaga:i. E da na si hano logo ga:i amola na ha lai amoga mae hasalasima:ne hamoi. 
Amaiba:le, na da mae bogole, esaleawane, Hina Gode Ea midadi ahoa. 
- 
Na da musa: amane sia:i, “Na da gugunufinisi dagoi.” Na da beda:iba:le amane sia:i, “Dunu huluanedafa da ilima dafawane hamoma:beyale dawa:mu da hamedei.” Be amomane na da Hina Godema dafawaneyale dawa:lusu hame fisi. 
Hina Gode da nama hou ida:iwane hamonanebeba:le, na da Ema adi ima:bela:? 
E da na gaga:i dagoi. Amaiba:le, na Ema nodomusa:, waini hano iasu Ema imunusa:, gaguli misunu. 
Na da Ema imunusa: ilegei liligi, amo dunu ilia gilisisu amo ganodini, Ema imunu. 
Hina Gode Ea fi dunu afae bogosea, Gode E da se bagade naba. 
Hina Gode! Na da Dia hawa: hamosu dunu. Na ame da Dima hawa: hamoi amo defele, na da Dima hawa: hamosa. Di da na mae bogoma:ne, gaga:i. 
Na da Dima nodone gobele salimu, amola Dima nodone sia:ne gadomu. 
Dia dunu ilia gilisisu ganodini, Dia hadigi sogebi Yelusaleme Debolo diasu ganodini, na da Dima imunusa: ilegele sia:i liligi amo Dima imunu. Hina Godema nodoma!