Gesami Hea:su.
129.
Isala:ili fi! Dia ha lai da di ayeligia amogainini dima se bagade iasu. Amo hou adodoma. 
“Dafawane! Na ayeligia amoganini, nama ha lai dunu da dodona:giniwane nama se bagade iasu. Be ilia na hame hasalasi. 
Ilia da na baligia oso dogone fofa:gi. Na baligi da osobo gidinasuga dogoi agoai ba:i. 
Be Hina Gode da moloidafa amola E da na halegale masa:ne hamoi dagoi.” 
Dunu huluane amo da Saione Moilai Bai Bagade higasa, ilia da hasali dagoiba:le baligidu masa:ne se bobogei ba:mu da defea. 
Ilia huluane da gisi amo diasu figisu da:iya bugi dialebe agoai ba:mu da defea. Amo gisi da mae heda:le, hedolo biosa. 
Dunu afae da amo gisi hame gagadosa amola gilisili la:gili hame gaguli ahoa. 
Dunu afae da baligili ahoasea, amane hame sia:mu, “Hina Gode da dima hahawane dogolegele bagade imunu da defea! Ninia da Hina Gode Ea Dioba:le, dima hahawane dogolegele ganoma:ne sia:sa.”