Gesami Hea:su.
137.
Ba:bilone hano bega: ninia da fi dialu. Amogawi, ninia da Saione Moilai Bai Bagade dawa:beba:le, fofagini dinanu. 
Ninia da ‘yodima’ ifa damana, ninia sani baidama gosagisi. 
Dunu amo da nini gagulaligi, ilia da ninima amane sia:i, “Ninia hahawane nabima:ne, Saione ea hou olelema:ne, gesami hea:ma.” 
Be ninia da habodane ga fi soge ganodini, Hina Godema nodone gesami hea:ma:bela:? 
Yelusaleme! Na da di gogolesea, na da sani baidama bu hamedafa dumu da defea. 
Na da di gogolesea, amola di da na baligili hahawane hou bai diala amo hame dawa:sea, na da bu gesami hea:mu logo hamedafa ba:mu da defea. 
Hina Gode! Idome dunu ilia da Yelusaleme doagala:le, hasalasi dagoi, Dia amo hou bu dawa:ma. Ilia amane sia:i, “Yelusaleme dafawanedafa muguluma.” Dia amo hou bu dawa:ma. 
Ba:bilone moilai bai bagade! Di da gugunufinisi dagoi ba:mu. Di da ninima wadela:i hou bagade hamobeba:le, nowa da dima se dabe iasea, da hahawane bagade ba:mu. 
E da dia mano dudubu amo sasamogene, gele da:iya gisalu gagala:mu da defea.