Gesami Hea:su.
141.
Hina Gode! Na Dima wele sia:sa! Wahadafa, na fidima! Na Dima wele sia:sea, Dia nabima! 
Na sia:ne gadosu amo gabusiga: gobele salasu defele, Dia lama. Na lobo gaguia gadobeba:le, Dia amo hou daeya gobele salasu defele ba:ma. 
Hina Gode! Na lafi noga:le sosodo aligima! Na lafi logoga, sosodo aligisu dunu asunasima! 
Na da wadela:i hou hanasa:besa:le, Di fidima. Amola na da wadela:i hamosu dunuma mae gilisima:ne, amola ilia lolo nasu amoga mae masa:ne, Di fidima. 
Dunu noga:idafa da nama asigiba:le, dawa:ma:ne se iasu amola gagabosu nama imunu da defea. Be wadela:i hamosu dunu ilia nama nodosu, amo na da hame lale salimu. Bai na da eso huluane ilia wadela:i hou fisima:ne sia:ne gadolala. 
Ilia ouligisu dunu da igi gafulua bogoma:ne fulisali ba:sea, dunu eno da na sia:i liligi da dafawane galebeyale dawa:le sia:mu. 
Lalu ifa da gaga:ne habele dudunumiai ba:mu. Amo defele, amo dunu ilia gasa da bogoi ulidogoi bega: afagogoi ba:mu. 
Be Ouligisudafa Hina Gode! Na Dima dafawaneyale dawa:lala. Na da Dia gaga:su hou hogosa. Amola na mae bogoma:ne, Di gaga:ma. 
Wadela:i hamosu dunu, ilia da na sa:ima:ne sani dilisisa. Dia na gaga:ma! 
Wadela:i hamosu dunu ilila: sani amoga ilila: sa:imu da defea. Amola na da hahawane masa:ne, Di fidima!