Malasu. 2. Nagofe! Dawa:ma adi na olelebe liligi mae gogolema amola na adi sia:be defele hamoma. Nabima hou moloidafa amola dawa:mu logo hogoma. Ma, amola dawa:su hogoi helema amola amo lama:ne ha:giwane edegema. Hogoma amola hogoi helema gouli amola silifa wamolegei hogobe defele hogoma. Be di amane hamosea, di da Hina Godema nodone beda:su hou dawa:mu. Amola di da Gode Ea hou dawa:ma:ne didili hamomu. Amo dawa:su da Gode Hi fawane iaha. Dawa:su hou amola moloi dawa:digisu da Godema fawane maha. Gode da Hi fawane fidisu hou ouligisa amola E da moloidafa dunu amo gaga:sa. Hi fawane da nowa da eno dunuma hahawane moloidafa hou hamosea ilima ouligisa, amola nowa da Ema asigiba:le Ema fa:no bobogesea, Hi fawane da gaga:sa. Dia na sia: nabasea, di da hou ida:iwane dawa:mu amai amola defele di da dawa:su hou hamomu. Di da dawa:su dunu esalumu amola dia dawa:su ida:iwane gala labeba:le hahawane bagade ba:mu. Dia hamobe liligi amola dawa:su da dima gaga:su liligi agoane ba:mu. Amola dia dawa:su hou da di wadela:i hou hamosa:besa:le, amo logo ga:mu. Di da bagade dawa:su lai dagoiba:le, dunu da baligidu sia: sia:beba:le o mosolasu hamosea, amo dunuma di da hame gilisimu. Amo dunu ilia logo ida:iwane yolesili amola wadela:i hou gasi agoane ganodini ahoa. Amola amo dunu ilia hou ida:iwane gala yolesili wadela:i hou hamobeba:le, hahawane bagade ba:sa. Ilia da moloidafa hou hame dawa: amola eno dunu ilia hou dafawaneyale dawa:mu da hamedei. Wadela:le hamosu uda da sia: asaboi amoga di adole ba:mu dawa:sea, di da ea logo damumusa: dawa:mu. Agoai uda da egoama hame dawa:sa amola egoa ema fawane fima:ne ilegele sia:i, amo yolesisa. Amola di da agoaiwane uda ea diasuga ahoasea, di da bogosu logo amoga ahoana amola di da amoga ahoasea, amo bogosu sogega doaga:mu agoai galebe. Amola nowa dunu e ba:la ahoasea, e da bu hame sinidigimu. E da hahawane esalusu logoga bu hame misunu. Amaiba:le, di da dunu moloi hou hamobe amo ilia hou amoga fa:no bobogema. Dunu nowa da moloi hou hamosea, e da ninia soge ganodini hahawane esalumu. Be nowa dunu da wadela:le hamosea, Gode E da amo dunu fadegale fasimu. Amola amo defele ha:i manu bugi wadela:sea a:le fasibi defele, Gode E da ili a:le fasimu.