Malasu.
7.
Nagofe! Dawa:ma na adi sia:be di mae gogolema amola na dima hamoma:ne sia:be maedafa gogolema! 
Na sia:be amo defele hamoma, amasea di da esalumu. Amola di da dia si noga:le ouligibi defele, na olelebe amo noga:le fa:no bobogema. 
Na olelebe liligi eso huluane dawa:laloma amola fedege agoane, dia dogoga noga:le dedema. 
Di Bagade Dawa:su Hou amoma hou dia dalusi amoma hamobe defele hamoma amola dawa:su dia dogo ganodini diala amo dia na:iyado ema hamobe defele hamoma. 
Ilia da dia hou huluane ouligili, di da inia uda amoma hobeamu amola ea sefe sia: amo hame nabimu. 
Eso afaega na da na diasu fo misa:ne agenesi amoga ba:lalu. 
Amola na ba:loba goi logoga manebe ba:i. Ilia da asigi dawa:su noga:i hame galu amola afadafa da gagaoui dunu agoai ba:i. 
Amo goi da uda afadafa ea diasu gadenene misini, 
eso amola sa:i dagoi gadenene gasi dagoi. 
Amo uda e da hina: da:i bidi lasu uda defele abula ida:iwane ga:i amola e da hou ilegelalu. 
Goe uda amo da gasa fi hamosu uda amola gogosiasu hame dawa:i. E da moilai logoga lalusu. 
E da logoga udigili lalu amola bidi lama:ne diasu labe soge ganodini amola dunu hogosa lalala. 
Amola na ba:i, amalalu amo uda e da goi ayeligi amo ea galogoa amoga ea lobo la:boloi dagoi amo lalu e da amo goi nonogonanu e hedolowane si damana ba:i amalalu e amane sia:i, 
“Wali na da gobele salasu hamoi amola amo gobele salasu hu da na diasuga diala. 
Amaiba:le na da na diasu yolesili di hogola misi amola wali na da di ba:i dagoi. 
Na da hedolowane midunusa: diaheda:su ida:iwane hahamoi dagoi amo dedebosu abula ida:iwane gala amo da na Idibidi soge amoga gaguli misi. 
Na da amo ganodini manoma ida:iwane gala amo me, a:lou, sinamone amola amo manoma gabusiga: ida:iwane gala fafai da:iya sogadigi. 
Misa! Na amola di gilisili hedelala soge hadigimu. Ani da gilisili nonogomuba:le hahawane bagade ba:mu. 
Di da na dunuba:le mae beda:ma. E da soge sedaga asi esala. 
E da su bagade gaguli asi. E da hedolo hame bu misunu. E da esala hi aduna aligimu.” 
Goe uda ea sefe sia: bagadewane sia:beba:le, goi ayeligi da dafai dagoi. 
Amo dunu e da amo sia: nababeba:le, e da hedolowane amo uda fa:no bobogele diasuga asi. Fedege sia: e da bulamagau bogoma:ne fasu sogebi amoga oule ahoasu defele asi. Fedege sia: eno e da ‘dia’ ohe amo da sani sa:ima:ne hahawane ahoa amo defele asi. 
Amo ‘dia’ ohe e da hame dawa:i ea dogo ganodini souga gala:be defele e da bogomu da hame dawa:i. Amo dunu ea hamobe da sio afae e hagili ahoanebe defele ba:i. Amo sio e da segega:i amo mae ba:le ahoabe amola sio e amo segega:i amo hame dawa:i amoga gaguli bogomu amo hame dawa:i. 
Wali na gofelali, dilia na sia: noga:le nabima. Noga:le dawa:ma! 
Agoaiwane uda amo ea sefe sia: mae nabima! Ema mae fa:no bobogema! 
Amo uda e da dunu bagohame ilia hou wadela:lesi dagoi. Amola dunu bagohame idimu hame gala, ilia da ea hou hamobeba:le bogoi dagoi. 
Amola di da amo uda ea diasuga ahoasea, di da bogosu logo amoga ahoa. Amo ahoasu da hedolodafa bogosu amoga doaga:sa.