Hosia.
1.
Hina Gode da Hosia (Bialai egefe) ema sia: adole i. Amo esoha galu, Asaia, Youdame, A:ihase amola Hesigaia da Yuda dunu fi ilima hina bagade galu. Amola Yelouboua:me (Yihoua:se egefe) da Isala:ili fi amo ilia hina bagade esalu. 
Hina Gode da bisili Hosia ea lafidili Isala:ili fi ilima adomusa: galea, E da Hosiama amane sia:i, “Di da asili uda lama. Be dia uda da di baligi fa:mu, amola dia mano da dia uda ea hou defele, hame nabasu mano ba:mu. Amo defele, Na fi dunu ilia da Na yolesili, baligi fa:i dagoi. 
Amaiba:le, Hosia da Dibala:ime ea uda mano Gouma amo lai dagoi. Amalalu ela da dunu mano lalelegei. 
Amalalu, Hina Gode da Hosiama amane sia:i, “Dia mano ea dio Yeseliele asulima. Bai Na da gadenenewane Isala:ili hina bagade ema se nabasu bagade imunu. Amo se imunu ea bai da ea aowa Yihiu da musa: Yeseliele moilai bai bagadega dunu bagohame medole lelegei. Na da Yihiu ea fi ouligisu hou dagolesimu. 
Amola amo esoha, Na da Yeseliele Fago ganodini, Isala:ili fi ilia gegemusa: sasanega:nanusu wadela:lesimu. 
Gouma da mano eno lalelegei. Waha lalelegei amo da uda mano. Hina Gode da Hosiama amane sia:i, “Ea dio ‘Ema hame asigisa’ asulima. Bai Na da Isala:ili dunu huluanema bu hame asigimu, amola ilia wadela:i hou bu hame gogolema:ne olofomu. 
Be Na da Yuda dunuma asigimu. Na, ilia Hina Gode, da ili gaga:mu. Be amo gaga:su hou Na da gegesu amoga amola gegesu dadi amola gegesu gobihei sedade amola hosiga fila heda:le gegesu dunu, amoga hame hamomu. 
Gouma da ea uda mano dodo fisilalu, abula eno agui ba:i. Amalu dunu mano eno lalelegei. 
Hina Gode da Hosiama amane sia:i, “Mano ea dio ‘Na fi dunu hame’ amo asulima. Bai wali Isala:ili dunu da Na fi dunu hame. Amola Na da ilia Gode hame.” 
Isala:ili dunu fi da afadenene hano bega: bosoda:i dialebe agoai ba:mu. Bagadeba:le, idimu da hamedei ba:mu. Wali, Gode da ilima amane sia:sa, “Dili da Na dunu hame,” be eso da misunu amoga E da ilima amane sia:mu, “Dilia da Esalalalusu Gode Ea mano esala.” 
Yuda fi dunu amola Isala:ili fi dunu ilia da bu gilisili fi afae hamoi ba:mu. Amola ilia da dunu afae amo ili ouligima:ne ilegemu. Amola ilia fi da bu heda:mu amola ilia soge ganodini hahawane esalumu. Dafawane! Yeseliele ea eso misunu hou da hou bagadedafa ba:mu.”