1 Kulia yatel* 1:1 “Kulia” e wiin mongom so. Wiin beem mongom e kanekote: “Kak Waneng” te. Kasike, kal kunum banban i fukunomeliw: Waneng kalu fein waneng bate. Wiin kale sios kunum waneng im kiskiw mak ete te. yutaka! Yu biliw yako!

Sion ne Sunbin-Got em angin im yetebin kunum nete te. Kame, ne fut kale boko, yatel yulo, dabalayemi te. Sunbin-Got e yulo akalem wiin so amkose kasike, ne yulo fein ibolow mutuk fian duyemkabi te. Kate, nakalem ete kuw bate! Sunbin-Got em fein weng elo gelewkabiliw kunum waneng alik alik ikati yulo ibolow mutuk fian kuw duyemkabiliw te. 2 Feinka! Sunbin-Got em fein weng be diwkuw diwkuw yuso nuso alakabe kasike, 3 akalem so, em min Yesus Kulais so, yelim biim nulo duyemkabiliw ibolow mutuk fian so, ikalem menew ibolow so, folok ibolow so, alik alik be yuso fein kuw wenboke te.

4 Mali kom mutuk biliw kunum waneng i Aatim Sunbin-Got em weng kiliko, geleweko, em deiw be fein gelewkabiliw kasike, nakati kalfong fian ati keyembi te.* 3 Sion 3 5 Kate kame, iti weng kitil weng mak bokokemite: Ku ibolow mutuk fian dulew dulew kukuw kemolewka! Bakakembi sawa weng be kikis sawa bate! Sua em kukalem kiliko, kemalew sawa weng bakate te.* 1 Sion 2:7 6 Nu Sunbin-Got elo ibolow mutuk fian dulewuw tewe, nu akalem kukuyemin weng be fein kiliko, em afak kakamokoluw te. Sua e, e nulo akalem kukuyemin weng be fein kukuyete: Nu ibolow mutuk fian dulew dulew kukuw beem deiw kakamoluwka!

7 Mali dasuw bakayembiliw kawtiw banso kawin dim kale kel bayemeleko, kakabomi, yulo bokoyemomeliw: “Yesus Kulais e kun so kal so kawtiw nukate tew kelinba kese te!”, yangeko, dasuw funum weng be yangakabiliw kate, nu kilele kal keluwete: “Yesus e fein kunum nukate tew kese te!”, angeko, kal keluw te. Kate yu kilele ibolow fukunina! Dasuw weng be bakabiliw kawtiw bi Yesus em maka kawtiw ite te.* 1 Sion 4:1-3 8 Kasike yukati kilelbi boliwka! Yu im yangbiliw weng be kiliko, gelewiw tewe, nukalem yom dulum aluwkakawkabuluw aluwbamin be sak dem banim kelei, yukati Sunbin-Got em yulo duyemomin kekabe yan ken be nam kuliw te. 9 Mali kawtiw mak i kiliko, kilele kal keliwete: “Kulais e fein kunum nukate tew kese te!”, angbiliw kate, i em kukuyemse weng be kitil aluwinba kesomi, elo bakilewiw tewe, i Sunbin-Got eso fewtokoko, nam biw te. Kate nimin kunum waneng ite mak Kulais em kukuyemse weng be kitil kuw aluwiw tewe, i Aatim so, Min so, yelim biso fein fewtokoko, makmak keko, biliw te. 10 Nimin kawtiw ite mak yom mit mewso teleko, Kulais em dulum elote dasuw sang be yulo bakayembiw tewe, yu kanelom iso weng bakabomi, ilo yom am yemde unemokoliw te! 11 Nimtew angom? Nimin kunum waneng ite mak dasuw bakabiliw kawtiw biso weng bakabomi, iso ken kunum keyemiw tewe, dasuw bakayembiliw kawtiw biim ibolow sili sili nam gelewkabiliw kukuw bakati kitil keleweko, dokoyemkabiliw kasike.

12 Yutaka! Ne ki keko, weng banban fut tem kale kel boko, dabalayemomin keli kate, kanemoka! Nakalem ete “Yom fukun mewso toloki kai!”, angbi kasike. Beem ding kabalak e, nungumel nukalem wensaneko, weng bakabuluw kano, nukalem kalfong be atin kuw fian keyemoke te.

13 Sunbin-Got em akalem wiin so amkoko, koyemse kunum waneng neso kale kel biliw kunum waneng alik alik ikati “Yukalo!”, yangiw te.

Bete kuw. Nem fut weng boyemi fut kame kilaka.