19
Pilate mi Iesu katedo oregada dorote pipisisina.
(Matthew 27:27-31; Mark 15:16-20)
1 Ango edo Pilate mi Iesu kundo ainda itoro emboboda yai piesiri vejitera. 2 Edo itoro embobomi dongo bebede awa kundo daotarida gobe ango engoegedo ainda kopuruda pipisitera. Edo awamanemi ombari ribori tokona* ombari ribori tokona awa rorae ango daotegeregarimi iji angode omundo esitera. Awatedo Iesu tedojijireite daotarida ombari ango ainda tamoda pipisitera. Tokona awa ove natopo ae ororo deda baige ari. awa ainda tamoda pipisitera. 3 Edo ainda yai tekago, tekago sitera, “Oro! Oro! Jew embomaida Daotari!” Edo awamanemi imo awa tenda, tenda doritera.
4 Edo tekago Pilate idegedo gundo embomaide sisina, “Giwo, na embo eiwa kundo itomane yai idegedo gupena. Ango ano imomane gawate na embo einda beyae da ji tambae.” 5 Edo Iesu gobe bebede edo ombari ribori tokona awa tamoda piari idegesisina. Edo Pilate mi awamanede sisina, “Giwo! Embo awa eire!”
6 Awatedo, iji angode pirisi babain ae oro kotopuda sima ari embobo demi Iesu gido, awamane aorogatedo sitera, “Oregada de! Oregada de!”
Edo Pilate mi awamanede sisina, “Na embo einda beyae da ro tambae. Inemanemi embo eiwa kundo oregada dewo.”
7 Edo Jew embomaimi ainde ge mina sitera, “Embo emi imo awa God da Mai ango tedo eira. Awatedo natokare aodari da (1) isira awa, embo ango awa daro betaina.”
8 Edo iji ainde Pilate ge eiwa ingido ainda adu aribé babojisina. 9 Edo imo tenda gavanada mando doda torido Iesu de sisina, “Imo yai nonda edo guputesi?” Ata Iesu mi ge mina da ro tae. 10 Edo Pilate mi ainde sisina, “Imo namonde ge tari jipapa ae esita? Kotembeyo! Nato awara tari isira ami imo udegana ko imo oregada dano betata.”
11 Iesu mi mina sisina, “Edo God mi awara tari imonde piae gido awa, inemi nato yai nei ro ari tao. Awatedo embo ainmi na ito yaida piesira, ainda jimbo beyae awa ito jimbo beyae daginegesira.”
12 Edo ge awa ingido ainda amboda, Pilate nongo edo Iesu udegari mamaini awa gain edo esisina, ata Jew embomaimi koko jimundo ge site sitera, “Imo embo eiwa dowato mamaina gido, imo awa Caesar da otawo ae. Embo berari ainmi imo akuta awa daotari tedo eira gido awa Caesar da gitopo edo eira.”
13 Edo ge awa ingido Pilate mi Iesu kundo idegedo gupusina. Edo Pilate katari emboda anumbada anumbesisina. Katari yaida dao awa Begata Ganumami ari, ata Hiburu gemi awa Gabata. 14 Edo Darutegari Bondo ainda siya ari deguta de ora 6† ora 6. Ove Kotopuda atopapasigari nenei kotembedo era, John da ge einda awa Rome embomaida degutada sirigari ambo ambo eira. Awatedo ora 6da moka einda awa 6:00 sipode. Ata Ove Kotopuda atopapasigari nenei kotembedo era, John da ge einda Jew embomaida degutada sirigari ambo ambo eira, edo ora 6da moka einda awa 12:00 ijide. Ata Mark 15:25da ge tari awa ora 9:00 sipode awamanemi Iesu oregada doritera. Awatedo ora 9:00da gumbae gisida, Pilate mi Iesu katedo itae esisina, edo ainda amboda, ora 9:00 sipode, Iesu oregada doritera. Aindabé Mark da ge awa ango, degutada sirigari Rome embomaimi ambo ambo edo esitera awa sirigari davego gano einda. ango eiri,
Pilate mi Jew embomaide sisina, “Giwo! Itomane Daotari awa eire!”
15 Ata awamanemi aorogatedo sitera, “Deyo betare! Deyo betare! Oregada deyo betare!”
Pilate mi awamanede sisina, “Nanemi itomane Daotari awa oregada danita?”
Edo pirisi babain mi mina sitera, “Nakare daotari itae ata da (1), Caesar akuta!”
16 Edo Pilate mi embo awa oregada daro betarate awamaneda ipada pipisisina.
Iesu awa oregada doritera.
(Matthew 27:32-44; Mark 15:21-32; Luke 23:26-43)
Ango edo awamanemi Iesu budo gisijido maunsitera. 17 Edo Iesu ainda orega awa budo idegedo maundo Yai Kopuru Akou ainda esisina. Yai einda dao nei Hiburu gemi awa Gologata. 18 Edo yai ainda Iesu awa benomami oregada doritera. Edo embo tote (2) ainde daedo oregada doritera. Embo nei demo neida, edo embo nei demo neida, edo Iesu toropuda.
19 Edo Pilate mi karigari ge gaiedo piesiri oregada doritera. Edo ainda ajigari awa: Iesu Nasaret Embo, Jew Embomaida Daotari. 20 Edo ove gaiari eiwa, Hiburu ae Guriki de Latin deda gemi gagurisina. Edo yai nonda Iesu oregada doritera awa nasi bajina aikae, awatedo Jew embomai jiwaemi karigari ge eiwa ajijigesitera. 21 Awatedo Jew embomaida pirisi babain mi Pilate de sitera, “ ‘Jew Embomaida Daotari’ gaiote, ata, ‘Ine tesira, “Na awa Jew embomaida Daotari,” ’ gaieyo.”
22 Edo Pilate mina sisina, “Nane ro gaietena awa matawa itaina.”
23 Edo itoro embobo Iesu oregada doritera. Edo ainda amboda, awamanemi ainda ombarijiari budo jisi ipa ao pasido (4) edo embo tegeri da da pipisitera. Edo daedo ainda ombari ribori buritera. Ombari awawa ainda ikane gaiedo wotedo tuda itae ari, ata ainda tatari itae.
24 Awatedo itoro embobomi mina tara esitera, “Kaenane keredo evekara ainyae, ata kaen ganuma babaingae ove gaiaride awa augedo ango tetenya ara ami arapa ari ain baini awa gore.”
Eiwa idegesisina, God da Ove Gaiarida ge awa bé arate,
“Awamanemi nato ombarijiari kundo evekara edo da da buritera,
edo nato ombari awa baintedo ganuma babaingae awa augedo tetenya esitera.” Psalm 22:18
Awatedo itoro embobomi rorae berari eiwa esitera.
25 Edo Iesu da oregada demonda, ainda ai ae, ainda aida dao de, Clopas da aro Mary de edo Mary nei de (Eutu awa nasi Magadala eutu.), awamane berari pepositera. 26 Edo iji angode Iesu ainda ai gosisina, edo ambodani ine dubobé budo eira awa, ainda demonda daedo petedo isiri gosisina. Awatedo ainda aide sisina, “Eutu, ito mai eire!” 27 Edo ambodanide sisina, “Ito ai eire!” Edo iji ainde edo ainda amboda, ambodani emi eutu awa ainda mandoda sima arate kundo maunsisina.
Iesu awa besisina.
(Matthew 27:45-56; Mark 15:33-41; Luke 23:44-49)
28 Einda amboda Iesu mi ainda buro berari awa matu petugari gosisina. Edo God da Ove Gaiari da ge awa bé arate jipapa esisina, awatedo ami sisina, “Na dubo gagara eira.” Psalm 22:15 29 Edo waini jigagani sigi beda ari awa ainda isiri awamanemi pepeu da (1) pietero tatapu berari esiri kundo inguta hyssop‡ hyssop awa ni tupo Jew embomaimi Darutegari Bondoda jigamo edo esitera. Awamanemi hyssop da papatu kundo sipu ko goutu maida ororo teo doda pasido awamaneda mando manguro beda gutedo esitera (Exodus 12:21-22). Wo goutuda ge nei Ge Moka Teteka doda ove einda gunda daedo giwo. da doiedo Iesu da beda indarate pipisitera. Psalm 69:21 30 Edo waini jigagani awa injido Iesu mi sisina, “Awa petugesira!” Edo imo tumo gotugedo ainda asisi doturisina.
31 Edo iji eiwa Siya Ari Deguta, edo sipo nei Darutegari Bondo tuturo aina, awatedo deguta nei awa Oena Apari Deguta deposi. Aindabé Jew emboboda gisijijiegarimi tamo dowari oregada Oena Apari Degutade itari awa jipapa ae esitera, awamanemi Pilate de tedogositera, “Ito itoro embobomi awamaneda tai daro eririgaro tamo kundo mambae eterita?” 32 Awatedo itoro embobomi gundo embo tuturoda oregada Iesu de daedo matu doritera awa, ainda tai tote (2)da vetu awa detero erigesisina. Edo embo nei oregada doritera, ainda tai (2)da vetu daedo detero erigesisina. 33 Ata iji nonde awamanemi Iesu da yai gundo, imo matu betesira gido awa, ainda tai dae erigae doturitera. 34 Ata itoro embo da (1)mi Iesu awa dendegida gimi gagurisina. Esiri burigibé ororo de un de idegedo wowosisina. 35 Edo embo ainmi awa gosisina, ge eiwa karigesisina, edo ainda karigari ge awa gebé. Edo embo awa gari imo gebé sira. Edo ami ge eiwa karigesira, imomane gebé awate. 36 Edo rorae berari eiwa idegesisina ami ari God da Ove Gaiarida ge awa bé aina: “Awamanemi ainda vetu da ji daro erigainyae.” Psalm 34:20 37 Edo Ove Gaiarida ge nei bé esisina awa “Awamanemi embo ave gaguritera awa jisimi gara.” Zechariah 12:10
Joseph ae Nicodemus demi Iesu goitera.
(Matthew 27:57-61; Mark 15:42-47; Luke 23:50-56)
38 Iji einda amboda Joseph (Imo awa nasi Eremateia embo.), ami Pilate de Iesu da tamo kundo aimain awa tedogosisina. Joseph awa Iesu da ambodani, ata Jew embomai adu esisina, awatedo Iesu da daoda arapada embode tae. Edo Pilate mi awara esiri Joseph gundo Iesu da tamo kundo yai eve maunsisina. 39 Edo Nicodemus, (Imo iji gisibé muyaede Iesu da yai gupusina.) ami iji ainde daedo gupusina. Embo awa myrrh ae aloe de§ myrrh ae aloe de awa ni evekara tote (2)da bangire muno davede. Jew embomaimi rorae awa mundedo baige edo awamaneda betarida tamoda piedo esitera ainda mata beyae engiregarate. baige ari, bouga tega 34 kilogram ango kundo gupusina. 40 Edo embo tote (2)mi Iesu da tamo budo gongo jibigi riribo virarae ami engoegesitera, rorae muno davede daedo. Eiwa awa Jew embomaida embo goiarida begata. 41 Edo yai demonda Iesu oregada doritera ainda buro isinesina. Edo buro dá ainda goiari banga to teka siya ari ainda gisi embo da ji goiae isinesina. 42 Aindabé iji awa Jew embomaida Oena Apari da Siya Ari Deguta, ainda edo goiari banga to awa aikae, Iesu da tamo yai ainda pipisitera.
*19:2 ombari ribori tokona awa rorae ango daotegeregarimi iji angode omundo esitera. Awatedo Iesu tedojijireite daotarida ombari ango ainda tamoda pipisitera. Tokona awa ove natopo ae ororo deda baige ari.
†19:14 ora 6. Ove Kotopuda atopapasigari nenei kotembedo era, John da ge einda awa Rome embomaida degutada sirigari ambo ambo eira. Awatedo ora 6da moka einda awa 6:00 sipode. Ata Ove Kotopuda atopapasigari nenei kotembedo era, John da ge einda Jew embomaida degutada sirigari ambo ambo eira, edo ora 6da moka einda awa 12:00 ijide. Ata Mark 15:25da ge tari awa ora 9:00 sipode awamanemi Iesu oregada doritera. Awatedo ora 9:00da gumbae gisida, Pilate mi Iesu katedo itae esisina, edo ainda amboda, ora 9:00 sipode, Iesu oregada doritera. Aindabé Mark da ge awa ango, degutada sirigari Rome embomaimi ambo ambo edo esitera awa sirigari davego gano einda.
19:24 Psalm 22:18
19:28 Psalm 22:15
‡19:29 hyssop awa ni tupo Jew embomaimi Darutegari Bondoda jigamo edo esitera. Awamanemi hyssop da papatu kundo sipu ko goutu maida ororo teo doda pasido awamaneda mando manguro beda gutedo esitera (Exodus 12:21-22). Wo goutuda ge nei Ge Moka Teteka doda ove einda gunda daedo giwo.
19:29 Psalm 69:21
19:36 Psalm 34:20
19:37 Zechariah 12:10
§19:39 myrrh ae aloe de awa ni evekara tote (2)da bangire muno davede. Jew embomaimi rorae awa mundedo baige edo awamaneda betarida tamoda piedo esitera ainda mata beyae engiregarate.