4
Satan mi Yesu bavedo esisina.
(Matthew 4:1-11; Mark 1:12-13)
1 Ango edo Yesu, Asisi Kotopu mi sirido beda esisina. Edo Yesu Jodani unda awa egenembedo bengida visiri, Asisi mi gisijido kundo maundo abu damodamoda totorisina. 2 Edo ainda deguta 40 isiri Binei* Binei awa Satan da dao nei. mi Yesu bavedo esisina. Iji angode awa imo indari indae, iji awa itae esiri, ainda amboda imo beji mina burisina.
3 Ango esiri Binei mi embo ainde sisina, “Imo God da Mai rita? Ge tewasi ganuma eiwa bread ari indate!”
4 Ata Yesu mi ainde sisina, “God da geda gaiari isira awa, ‘Embo enembomi bread akuta injido wasiribé bari tao ae, ata God da ge tari da da berari isira, ami wasiribé piedo eira.’ ” Deuteronomy 8:3
5 Ango edo Binei mi embo awa gisi edo kundo visido peji ikaneda esisina. Edo yai berari embobomi gisijido era awa piesiri gosisina, awa jisi papariko arago. 6 Edo Binei mi Yesu de sisina, “God mi yai berari ainda awara tari de taogari de awa namonde pipisisina, awatedo, imonde piana. Edo nanemi embo da ave jipapa edo avigetena, ainde piana. 7 Awa embo, imo baongo dadari edo na tumondebain ata gido, berari eiwa imo topo aina.”
8 Ango tesiri Yesu mi ge mina sisina, “Nato gunda mambu, Satan!† Satan awa God da anela da (1) da dao. Anela awa God da ge jindesiri God mi imo utuda kundo augesiri idegedo wowosisina. Edo Satan da dao mokabé Hiburu geda awa ‘gitopo embo’. Satan awa God da gitopo edo embo enemboda gitopo. God da geda gaiari isira awa, ‘Imo BADARI ito God awa tumondebain edo eyo, edo embo awa akuta kera edo eyo!’ ” Deuteronomy 6:13
9 Ango edo Binei mi Yesu gisijido kundo maundo Jerusalem da esisina. Ainda Judah embomainda oro kotopu bajinada eno ikanebé ikaneda piedo sisina, “Imo God da Mai rita? Einda kekapunya edo wote! 10 Aindabé, God da geda gaiari isira awa:
‘God mi ge okain tari anelamanemi imo dedegara,
nei ro ainyae.
11 Edo awamanemi imo ipada jiaro vitata,
ganumada ito tai dainyae.’ ” Psalm 91:11-12
12 Ango tesiri Yesu mi sisina, “God da geda gaiari isira awa, ‘Imo BADARI ito God bawote dowasi!’ ” Deuteronomy 6:16
13 Edo Binei bawari berari awa itae edo, ainda amboda, imo iji dave nei gido tekago gumaina ango kotembedo, Yesu dodo maunsisina.
Yesu ainda buro yai Galili doda tuturo esisina.
(Matthew 4:12-17; Mark 1:14-15)
14 Ango edo Yesu tenda egenembedo yai Galili da, Asisi da gorobade maunsisina. Edo ainda bino yai ainda edo nasi demonda jiari awa berari arapu esisina. 15 Edo imo Judah embomainda benunu oroda‡ Judah embomainda benunu oro awa jiwaebé, edo nasi da da ainda isima edo esitera. Oro ainda Judah embomai dada edo Badari tumondebain edo, awamaneda katari budo, awamaneda mamai atopasido esitera. atopapoteiuri embo jiwaebé gido awa dasiga edo esitera.
Nasaret embomaimi Yesu ajiregesitera.
(Matthew 13:54-58; Mark 6:1-6)
16 Edo Yesu, Nasaret nasi imo isite babojisina, ainda gupusina. Edo wasiri matawa edo eira ango, Judah embomainda benunu oro ainda Oena Apari Degutade§ Oena Apari Deguta awa Judah embomainda deguta kotopu. Awamanemi deguta ainde, buro dodo oena apeite God dasiga edo esitera (Exodus 20:8-10). Iji boroko, deguta ‘Saturday’ awa awamaneda Oena Apari Deguta. maundo totorisina, edo imo ove ajigaintedo erorisina. 17 Edo peroveta Isaiah da ove gaiari awa embomi ainde pietero kupusina. Edo awa paraugedo ge gaiari eiwa tapusina:
18 “BADARI na avigesira,
mapa embomai rorae isisigaede,
God da bino dave karigano gorote,
awatedo, ainda Asisi nato yai isira.
Ami na piesiri gumena,
embomai avekave do buriya esiri itera,
awamane gao ano dubodave borote,
edo embomai bundarida awa ge karigano
gido udegari borote,
edo jisiguba ari awamane ano
yai berari gorote,
edo embo nenei gisijijiegarimi memesi bajinabé pisido era awa,
nanemi ano udegari borote;
19 edo nanemi BADARI da tonembari duberi
borokobé gumbira awa,
karigano gorote.” Isaiah 61:1-2
20 Ango edo ove gaiari awa ruvedo tekago buro embode piedo imo dodo anumbesisina. Edo embomai berari benunu oro doda ami ge tari gain jisini esitera. 21 Edo Yesu awamanede ge tari tuturo esisina, “Iji boroko bé emi God da ge gaiari ajigeteno ingewa, awa bé eira.”
22 Edo awamane berari Yesu da ge gavi ainda beda idegeteira awa gido mina tara eite korebé esitera. Edo awamanemi sitera, “Eiwa tepo Joseph da mai, ata nongo edo ge engo siri?”
23 Ango tetero gido Yesu mi sisina, “Na gotena, inemane eniya ge eiwa namonde tawa, ‘Siwo Gao Ari Embo, imo akuta gao ewasi! Buro babain ro Kapenium nasida eteto bino ingera dá ango ito nasi topobé einda daedo ewasi gore!’ ”* Eniya ge eiwa, ‘Siwo Gao Ari Embo’ awa Yesu, edo ‘imomane akuta’ awa ainda nasi tutu embomai. Buro babain Yesu mi embomai nasi neneinda awa embo matu esisina, awa dá ango embomai ainda nasi tutu awamane embo arate, jipapa esitera. Awamane imo awa bé God da Avigari Embo ango ari gain jipapa esitera.
24 Edo ami tedo sisina, “Awara! Ge ro boroko imondemane tena, eiwa giwo! Peroveta awa ainda nasi topobéda embomi imo tou ari tao ae. 25 Ata ge arapada imondemane tena, eiwa giwo! Eutu rori jiwae Israel doda isiretera peroveta Elijah da ijide. Iji angode God mi utu engiregesiri, duberi tamonde (3) edo kariga 6 wa wotae, beji iji bajinabé Israel yai berarida arapu esisina. 26 Awarata, iji angode God mi Elijah awa embo berarida yai piae, ata eutu rorida nasi saka Zerepasi da isima eira ainda yai pipisisina. Zerepasi awa Saidoni nasi aikae edo daedo eutu awa Judah eutu ae. 1 Kings 17:1-16 27 Edo embo jiwae ginimi tutupegari Israel doda isiretera, peroveta Elisha da ijide. Awarata, Elisha awamane berari gao ae. Ata da bé Siria embo Naaman, awa akuta gao esiri kaviyegesisina. Daedo embo awa Judah embo ae.” 2 Kings 5:1-14
28 Ango tesiri gido embomai berari benunu oroda sinigambaribé Yesu da yai esitera. 29 Edo awamane erido Yesu dumundo kundo nasi arapada idegesitera. Ainda edo awamanemi embo awa gisijido nasi pamoda jiari isira ainda visido daninida maunsitera, augaro dedewada wotarate. 30 Ata embo awa doiedo kundo mauntero awamaneda toropuda dodo taigedo eve maunsisina.
Yesu ge okain asisi beyaede tesiri kera edo idegedo maunsisina.
(Mark 1:21-28)
31 Ango edo Yesu Kapenium nasi bajinada wotedo maunsisina, yai Galili doda. Edo Oena Apari Degutade awamane atopaposisina. 32 Embo ainda geda awara tari isira, awatedo, embomaimi ainda atopatari gido korebé esitera.
33 Iji angode awa benunu oro doda embo da (1), asisi beyae† asisi beyae awa embo betarida asisi ae. Awamane awa Satan da anelamane. Iji matu God mi anelamane berari esisina (Kolosi 1:16). Ainda amboda, anela bajina dao Satan mi God da ge jinjisina (Isaiah 14:12-15). Iji ainde imo God da ge jindesiri anelamane nenei Satan ambo ambo esitera (Amboda Idegaina 12:3-4). Iji boroko, Satan ae ainda anelamane demi embomai udumboro God da ge jindedo Satan da jipapa ambo ambo edo era. doda itari, ami aoro ikanade gatedo sisina, 34 “Eei! Imo namondekare ro ain esi, Yesu Nasaret Embo? Imo nakare dedo sitain gumbesita? Na gotena, imo awa God da Embo Kotopu!”
35 Ata Yesu mi ge okain ainde sisina, “Ge do! Idegedo mambu!” Edo bineimi‡ binei awa asisi beyaeda dao nei. embo awa embomainda doda augesiri duriri dodo idegesisina, ainde kambo piae.
36 Idegesiri gido awamane berarimi kore bajina edo mina tara eite sitera, “Ge eiwa tena! Embo emi ainda awara tari de goroba demi ge okain asisi bebegaede siri kera edo idegedo mauntera!” 37 Edo embomaimi Yesu buro ro esira ainda bino awa kundo maundo nasi nenei demonda itera berari ainda karigetero arapu esisina.
Yesu embo jiwaebé gao esisina.
(Matthew 8:14-17; Mark 1:29-34)
38 Ango edo imo erido benunu oroda awa idegedo maundo Simon da mandoda totorisina. Edo Simon da imbosi karu dademo bajinabé bureite isiri awamanemi Yesu mi eutu awa kondade arate tetero gosisina. 39 Awatedo, imo maundo ainda besi demonda petedo karu dademode ge okain tesiri karu itae esiri eutu awa boraebé erido awamane sima esisina.
40 Edo iji wowoteiri turo ainde embomai berari aimi awamaneda otatawo karu neindekainde bari awa Yesu da yai kundo guputera. Etero gido karu embomai da da berari awa ami ipa tamonda pipiteite gao euri kaviyegedo esitera. 41 Edo daedo Yesu mi binei embomai jiwaeda doda itera, awamanede ge okain teuri dodo idegeteite aorogatedo tedo esitera, “Imo awa Keriso, God da Mai bé!” Edo awamane matu gositera imo awa Keriso, awatedo Yesu mi dowae binei embo ainde ge tae.
Yesu dengoro baiari Galili ainda piedo esisina.
(Matthew 4:23-25; Mark 1:35-39)
42 Ango edo sipo taragae isiri imo erido idegedo yai damodamoda maunsisina. Esiri gido embomai jiwaebémi imo kakowa ero jiriri taputera. Edo awamanemi imo yai neinda mamburekae engiregari ge tedo esitera. 43 Ata Yesu mi awamanede sisina, “Na bino dave awa embomai nasi neneinda daedo karigano gara awa, God mi gundo embomai berari butuda gisijiaina. Aindabé, God mi na buro awa anate piesiri gumena awatedo.” 44 Edo imo Judah embomainda benunu oro neneinda maundo dengoro baiari piedo esisina, yai Galili doda.
*4:2 Binei awa Satan da dao nei.
4:4 Deuteronomy 8:3
†4:8 Satan awa God da anela da (1) da dao. Anela awa God da ge jindesiri God mi imo utuda kundo augesiri idegedo wowosisina. Edo Satan da dao mokabé Hiburu geda awa ‘gitopo embo’. Satan awa God da gitopo edo embo enemboda gitopo.
4:8 Deuteronomy 6:13
4:11 Psalm 91:11-12
4:12 Deuteronomy 6:16
‡4:15 Judah embomainda benunu oro awa jiwaebé, edo nasi da da ainda isima edo esitera. Oro ainda Judah embomai dada edo Badari tumondebain edo, awamaneda katari budo, awamaneda mamai atopasido esitera.
§4:16 Oena Apari Deguta awa Judah embomainda deguta kotopu. Awamanemi deguta ainde, buro dodo oena apeite God dasiga edo esitera (Exodus 20:8-10). Iji boroko, deguta ‘Saturday’ awa awamaneda Oena Apari Deguta.
4:19 Isaiah 61:1-2
*4:23 Eniya ge eiwa, ‘Siwo Gao Ari Embo’ awa Yesu, edo ‘imomane akuta’ awa ainda nasi tutu embomai. Buro babain Yesu mi embomai nasi neneinda awa embo matu esisina, awa dá ango embomai ainda nasi tutu awamane embo arate, jipapa esitera. Awamane imo awa bé God da Avigari Embo ango ari gain jipapa esitera.
4:26 1 Kings 17:1-16
4:27 2 Kings 5:1-14
†4:33 asisi beyae awa embo betarida asisi ae. Awamane awa Satan da anelamane. Iji matu God mi anelamane berari esisina (Kolosi 1:16). Ainda amboda, anela bajina dao Satan mi God da ge jinjisina (Isaiah 14:12-15). Iji ainde imo God da ge jindesiri anelamane nenei Satan ambo ambo esitera (Amboda Idegaina 12:3-4). Iji boroko, Satan ae ainda anelamane demi embomai udumboro God da ge jindedo Satan da jipapa ambo ambo edo era.
‡4:35 binei awa asisi beyaeda dao nei.