1 Oo Koorinti maqannaasa qini qikaqaafasaa ooqai qinee inni maqusai mariaafanausa, innee sia maraquna faqaasara foora faiqí faiqi iriranamau fimarufaqa qinee sia maraquna iriramau inni qimannimiqiafana. Inni irirafa maa maqa maaqanasaaqaraa irirafa inniki marinara Yisuna saqarikiranaki innee sia faiqiara foora mariafanoo faiqi aanaaqiara foora aamina mariafanoo. 2 Innee sia faiqiara foora mariafanoo faiqi aanaaqiuqa irirana fooqaasa marufaqa qinee sia narana uqanna nimiqiafana naammara foora inni nimiqiafana, innee narana uqanna sia amanaikufaqa ninuqiqiafana. Doo maqee aukuana faqa sia amana innee narana naaqaa inoo maridanoo. 3 Innee maa maqa maaqanasaaqaraasa naanna ree mariasa aaqaida miqimarifanoo, innee nariara nariara rairai qidaqa ufa rainee marianannai maa maqa maaqanasaaqaraasa naanna ree mariana aaqarafa kooroo idanoo. 4 Innikiqari Koorinti maqusanaa Yisuna ufara suqimariasakiqari moo fannoo qinee Pauroona aiku asauku marida mina ufamau fida fee qidanoo kafaa moo fannoo qinee Apooroosana aiku asauku marida mina ufamau fidee qimasaida aaqaida miqi qimariafanoo sia fee mi oosanafa innikina maqasaaqaraasa naanna ree mariana kooroo idanoo fee. Doo kooroo idanoo.

5 Apooroosa faqa Pauroosa faqa maaqanda uriqararaqandee maridee sia uriqararaqanda marisa maridaqa. Maaqanda fifau Anutuna ainainira fasiqaqara kai maridaqa, inni rarisameeqee Yisuna saqarikiranaki quqee mariaqanda kai maridaqa. Maaqanda karaambaiqa saika aadu aadu nimimarunnaqanda kai maridaqa.

6 Qinee Koorinti maqusai inni iriranaki qaqammara foora aaqasaafananoo Apooroosafa aniree nammariara foora adiasoofanoo Anutufa kambiqarana aminau. 7 Aaqee mari fasiqafa faqa nammari adiee mari fasiqafa faqa kai fifau maridanoo, Anutufa kambiqarana amufa mifa anoona maridanoo.

8-9 Aaqee mari fasiqana saika faqa nammari adiee mari fasiqana saika faqa amana amana kai maridanoo. Anutufa naadu naadu narí ainaini marina akiaqara feefauru kasooqaqee nimiannoo. Maaqanda moodaanaki Anutuna ainainiranaki maridaqa ainainidaqa innee afuqa qambaanai Anutuna ainainirafa mariafanoo. Qinee Pauroosa moo ainaina kikiqa usuanaura, innee Koorinti maqannaasa Anutuna maaqa mariafanoo. 10 Anutufa maaqa usakee maria iriranna qini qimusa maridaqa maaqa usakarana akoofasa qinee faakana faqa maaqa atuna faqa arusaunanoo moo fannoo asaanidanoo. Qinee andeeqasee maaqa atuna arusaunanoo moo fannoo sia fifau maaqa asaaniannoo andeeqee mari fasiqafa ireeda amiqimaseenoo kai maaqa asaaniannoo. 11 Anutufa narí asauku mundirana Yisuna doo moodaa faakana narí maaqaki rakiqeenoo, sia amana moo faakana rakiarafa mariannoo doo mifa kai mariannoo. 12 Oosana oosana maaqa usakee mariasara foora maridaqa akaqausa amiqimasee faiqí anaasee dadaaqidaqa mapuku nimaqaidaqa, akaqausa sia amiqimasee mapuku nimaqaidaqa moo fannoo koora fooqaa iranannai maaqa asaanimarifa amiqirafa maaqa asaanimarifa maridanoo, moo fannoo mina oorudupirana siruaannai maaqa asaanimarifa maridanoo. Moo fannoo mina oorudupirana firaa munnimma aqimaria ooninannai asaanimarifa maridanoo. Moo fannoo mina oorudupirana saqarinnai asaanimarifa maridanoo. Moo fannoo mina oorudupirana eefeedannai maaqa asaanimarifa maridanoo. Moo fannoo misa oorudupirafa fiaarunnai maaqa asaanimarifa maridanoo. Inni Koorinti maqannaa Yisunara qimannimiqa maaqa atuna rakiqannimaqaannee qiafanausa mariafanoo maaqa asaana imariasara qunnana misa miqooqari innikina ookaamandee maaqa asaanara foora moo faqa moo faqa qidaqa. 13 Asauku mundirafa qumuaninna aukuannai maaqa asaanira oosana aiqamausa nifusaa kooroo iannoo. Mi faasaannana Anutuna ida fannoo aiqama fasiqa ainainirana qamafinoo kooroo iannoo. Mi idafa aiqamausa ainainirana amanamandainanoo mina anoona kooroo iannoo. 14 Faiqí moo fannoo maaqa atunasaa ookaamandee usakee marina ida sia qama taikasainanoo Anutufa mina qafamaseenoo mi fasiqanara amiqimmandee usakee maqi qimasee feefauru amiannoo. 15 Faiqí moo fannoo mandainainannai usakee marina, ida qama taikasainanoo sia feefauru amiannoo. Mi fasiqafa mifa kaqisamu innaarunai asumu mariranaki fuannoo maaqakiqari raudamakinoo idauru aanaaqi ainaina sia uqirafa kaqi sandaannoo.

16 Innee maana iridee sia fee iridee innee Yisuna ufara suqimariasa Anutuna amaana maqara foora mariafanoo, Anutuna maraquna fannoo narí maaqara foora inniki maridanoo. 17 Moo fannoo Yisuna ufa suqimarinanaki misa raiqara ufee oosana oosana manda ufa niminaqa raindaanifanoo Anutuna maaqara foora rapee inanoo Anutufa mi fasiqana kuridisaannoo. Anutuna amaana maqa naaquqarafa anukarafa maridanoo innee misa mi maqafa mariafanoo.

18 Sia moo fannoo narí narí akaru qiannoo. Inniki moo fannoo nariara maqasaa fasiqaki irirana faqasee qimarifa narí maqasaa irirana amooidanoo sia anoona irirana faifa, mi fasiqafa nariara ureeqafinoo reendeenamafinanoo miqoo amana anoona irirana oosana araannoo. 19 Maqasaa fasiqauqa iriranee qimariana Anutufa minara furufara qidammiafoo qidanoo. Ooqeenaa tamummaqara fasiqa minara maaqi qimasee akara rinau.

20 Tamummaqarafa moo fannoo minara maaqi qimasee akara rinau.

21-23 Innee Koorinti maqannaasa minara irisee sia moo fannoo faiqí irirafa afeekainainara irisee amooqiannoo. Innee Koorinti maqannaa Yisuna ufara suqimariasa kaaqa rakeekaamasee akaqausa Pauroosanaindifee qidaqa akaqausa Apooroosanaindi fee qidaqa akaqausa Peetooroonaindi fee qidaqa aaqaida miqi qimariafanoo. Innee sia misaindi mariafanoo misa innindi maridaqa. Aiqama maa ainainna inni dadaaqi mari ainainausa maridanoo. Pauroona faqa Apooroosana faqa Peetooroona faqa maa maqa maaqafa faqa kaqi marirana faqa kuqirana faqa maqee mariana faqa naaru marinnana faqa aiqama maa ainainausa inni dadaaqi mari ainainausa maridaqa innee asauku mundiranaindi mariafanoo kafaa asauku mundirafa Anutunaindi maridanoo. Innee minara irisee fifau ammuqundari qidaqa Pauroonaindi fee Apooroosanaindi fee Peetooroonaindi fee qimariafanoo Anutunaindi maridammia.