1 Anutufa maaqi qinoo. 2 Qinee Yaaweesa inni Anutusa maridaqa. Qinee Isipa maqasaa rumbaranaki maruna inni mareeqee mai quqaafanausa maridaqa. 3 Innee sia moo anutuna amooqiaqa, qini kai qimooqiaqa. 4 Innee sia innaarunai mari ainainausa faqa maqasaa mari ainainausa faqa nammariki mari ainainausa faqa nimana auqusee maasa anutufee qiaqa. 5 Minara sia moo ainaina amana auqirana oorinni mapamufida innaaru qidaqa amooqiaqa. Qinee Yaaweesa inni Anutusa marunnanara sia mi ainainausa nimooqiaqa. Qinee sia uqanna moo anutunara qiananoo qini qimaaqa maqaannoo. Faiqí qiniara fidiaqaa inausa aupurarana nimiananoo misasaa faqa misa faiqi namu saa faqa misa ninaiqimara saa faqa nisaifaqausa saa faqa mariannoo. 6 Moomoosa qiniara ridaqa qini sanda ufa mau finausa qinee misa faiqi namu kasooaqee nukudara foora kambiqainausa qeeqa didirana uqannifiqaanaura. 7 Innee sia qini duqunnai manda oosana auqaaqa. Qinee Yaaweesa inni Anutusa qini duqa fifau faafau inausa aupurarana nimianaura. 8 Innee Sabata faasaanara naaquqara faasaanee qimasee iriqa fuaqa. 9 Dinni taikasee dinni ani moodaa marasee 6 faasaana inni ainainira faasaana mariani. 10 Dinni ani qaara marasee 7 faasaanasaa qini Yaaweesa adooara faasaana maridanoo. Mi faasaannasaa sia uqanna moodaafa faqa ainainiani. Innee faqa inni faiqi namu faqa inni ainainira faiqiuqa faqa inni aandauqa faqa aanaamuru inniki ani mariasa faqa sia uqanna ainainiaqa. 11 Dinni taikasee dinni ani moodaa marasee 6 faasaana qinee Yaaweesa innaaruna faqa maqa faqa ooruku nammari faqa minauqaki mari ainainausa faqa auqi qiafana. Dinni ani qaara marasee 7 faasaanasaa qinee qidooa qiafana. Minara qinee Yaaweesa Sabata faasaana afaaqooqa qimasee naaquqara faasaanee qidaqa. 12 Inneeqa ninausa nikausara qeerairidaqa misa ufa qaindusuaqa. Innee miqiqa qinee nimianna maqanasaa kisaaqasaa marifaranoo. 13 Innee sia faiqí anaasee nuqu qimasee naruaqa. 14 Innee faiqí anaasee sia narí ummuari narí umuariaqa. 15 Innee sia moona ainaina umuariaqa. 16 Innee sia akaqausara unna qimasee misa kikiqa ususee ufa nimia. 17 Sia moona maaqa umiasanara amuqusiani. Sia moona aanaaqara amukaani mina ainainira fasiqa anaaseera faqa misa aandau ainainara faqa mina aiqama ainainara faqa sia amukaani.

18 Faiqí anaasee aiqama innaarunai qirana faqa aakuasaa faqa ukeena firaana faqa aaqanasaa idamuna namu faqa qafoofanoo naindiri reenoo naaquqoofaqa nianasaa marida qafee mariqau. 19 Miqi masee misa rufiasee Mooseena qimamiqa qiqau. Anutufa maasa qimaqiminaqa maasa irisee kuquanoora rufiaidaqa anee kai maasa qimaqiminaqa iria.

20 Mooseefa iriseenoo qimanniminau. Innee sia rufiaaqa Anutufa inni nimanamasee qafainaqa aiqama kari minara rufiasee mina ameemaanai maridaqa numoo ainaina sia auqaaqeera. 21 Miqi qimasoofaqa faiqí anaasee nianai marufanoo Mooseefa kai Anutufa asukuna arira oonamuki maruna aaqa finau.

22 Yaaweefa Isaraee maqannaasa qimannimianifeera maaqi qimaseenoo Mooseena qimaminau. Qinee innaarunaindari inni faqa ufa qimarunaqa innee inneeqa nifunnai mina qafaafanoo. 23 Innee sia siruaannai faqa koorannai faqa unna anutuna amana auqusee qini Yaaweesa faqbaqa masee amooqiaqa.

24 Innee maqannai qainda auqusee minasaa inneeqa sipsipa faqa burimakau faqa miniseeqa ida qama taikara tatufirana suqasaifaqa faiqí anaasee qini faqa moodaanaki kiaqa. Aiqama maqusa innee qini qimooqiaqeera utaaqama qaunna maqusanaki oonureeqa miqifaqa qinee innee iannai qumuree amiqi amiqimma nimaqaanaura. 25 Innee ooninnai qini aidara auqiraree qimasee sia faiqí rukamuqaa ooninannai auquaqa. Innee faiqí rukamuqaa ooninannai auquseeqa minasaa tatufirana suqa qimirafa sia amanaikiannoo. 26 Innee sia aidara auqusee minni akarara irirasu auquaqa. Innee miqiqa umee nifaaqa kooroo ifaqa qafeefoora.