1 Yisufa mi manaaqana mara findifummaseenoo miqooqari findifinoo narí maqusai Nasareetinni finau, narí faiqi namufaqa mina faqa fiqau. 2 Nasareetee maqusai Yuda maqannaa marunara nariqa amaana Saririqasaa amaana maqaki keeqafufanoo Yisufa Anutuna ufa qimannimi marufaqa misa irisee tautumasee qiqau. Maafa maa amiqira iriranna yai fee mareenoo fee, yafee maa irirana aminoo fee naqimasee faiqí sia auquaqaa ira ainaina auqidanoo fee. 3 Maasaki kamundaa mariifa mifa kai maridanoo, mina anoofa Mariafa maridanoo maaqooqaraa anaasee faiqi maridanoo, mina akaqaafasaauqa Yameesana amarafa faqa Yooseesa faqa Yudasina amarafa faqa Simoona amarafa faqa maaqooqaraasa marifanoo Yisufa misakinaafa maridanoo. Mina asooqmaaka faqa maaqookai maridaqa. Misa minara miqi qimasee nikoo fee qiqau.

4 Yisufa mina iriseenoo maaqi qimasee qimanniminau. Tamummaqara fasiqa moo fannoo maqusa maqusa fidanoo qimanniminaqa misa iriseeqa mina ufara kuqaa fee qifaranoo narí maqannaasa faqa narí ainaina faqa narí moodaa fasiqa anaasee faiqi faqa mina ufa siamma irifaranoo. 5-6 Yisufa narí maqannaasara miqimmidammia maqi qimasee sia amana moo fasiqa anaasee mandaikirausa andeeqannimaqararee qinau. Qaaramoo aurusasaa kai asauku quqasoofaqa findifiqau. Narí maqannaasa nári irirana sia minasaa mundunara irisee firaaqoo tautinau.

Yisufa miqoo narí maqusai Nasareeteendari dinni dinni fiqu fiqumma marusa misa qimannimimarinau. 7-9 Qimannimiseenoo narí faiqi namu naarama quqaseenoo manda afaanna faiqí anaasee naundurai marusa misa niqiqara afeeka nimiseenoo qaaraqanda qapamandee qaaraqanda qapamandeenoo qimanniminoo qinau, Sia moo ainaina maree fuaqa saunu kai qara maree fuaqa, feemu faqa uqa faqa munnimma faqa sia maree fuaqa, niku aanaamu afisumareeqa siuta moodaa afisumaree sia aabaa moo maraaqa. 10 Innee maqusa maqusa fidaqa moo maqusaki oonu raifanoo mara quqainna maaqanaki quqasaina sia namummaqaqa nuaqa minaki kai faiqaida nuaqa, minakiqari moo maqusa fiqa fuaqa. 11-12 Innee moo maqusai fifaqa misa sia inni mara quqeeqa sia inni ufa irifaqa innee fidaqa kookoomma afaqa ninaamarasee fuaqa. Innee miqiqa Anutuna naruaninnanara misa aaquqima nimaqeefaranoo. Yisufa miqi qimaseenoo niqiqoofaqa maqusa maqusa fidaqa faiqí anaaseera nári mandainainara nimeesuquaqeera qimannimiqa fiqau. 13 Qimannimidaqa moomoosa naunduraki afaanna faafasaaqa marusa niqiqamannimi marufaqa rafudamakida fimariqau. Miqiqa fidaqa aurusa nikiaaqa sauna fadameenara fooqaana adiasoofaqa findifi mariqau.

14-15 Yisuna aufakiana ufa fannoo aiqama atinai daraanimambunara Eeroodeefa mi ufana faqa iriseenoo tautinau. Akaqausa Yisunara Yoohaneefa nammari nimimarufa kuqiranakiqari findifinoo firaa ainaina auqeemari fee qufaqa akaqausa Yisunara Eeriaafa ooqeenaa tamummaqara fasiqa mifa kaifaa kambiqanoo maridanoo fee qufaqa akaqausa ooqeenaa tamummaqara fasiqa fooqaafa kambiqanoo maridanoo fee qiqau.

16 Eeroodeefa mi ufausa iriseenoo narí qinau, Qinee ooqai Yoohaneena nammari nimimaruna anuka ateekasaafanafa mifa kai kuqiranakiqari anida qinoo.

17 Ooqai Eeroodeefa narí kai qimannimufaqa sundiauqa Yoohaneena nammari nimimaruna rumbamaree karabusa maaqaki quqaseeqa firaa sainanda qumareeqa rumba quqasoofanoo marinau. Eeroodeefa sia fifau Yoohaneena mareeqee rumbaranaki quqanau. 18 Yoohaneefa nammari nimimarufa maqee maqee anaasee qummuarunasaara aqunara rumba quqanau. Eeroodeefa narí akaqa Firipina anaaqa Eeroodia nammarina kaqi narí afaaqi faqa marufanoo qummuarunara Yoohaneefa qimaminoo qinau Anee aneenna akaqa anaaqa Eeroodia nammarina qummuaramminana maraananoo Anutuna ufa rukiasee miqiananoo. 19 Eeroodia nammarifa Yoohaneena ufa irisoofanoo afaaqai kaqi ati qanoo marufanoo maridanoo mina ariranara randee marufanoo Eeroodeefa qaoo qufanoo sia arinau. 20 Eeroodeefa Yoohaneenara irirana andeeqara qikairi siai fasiqa fee qimasee minara rufiaseenoo karafusaki seenoo ititasoofanoo sia Eeroodia nammarifa arinau. Eeroodeefa maqee maqee Yoohaneena faqa ufa qiranara aidi marufanoo maqee maqee Yoohaneena aaramasee ufa qimamimarinau. Yoohaneena ufa fannoo Eeroodeefa maqee maqee Yoohaneena faqa ufa qufanoo Yoohaneena ufa fannoo Eeroodeena raquramufanoo aqu ufafa afaaqai ati qanoo marunara siamma irimarinau kaqi maqee maqee Yoohaneena karabusaki marunna aaramasaida ufa narí qimami narí qimami qimariqau.

21 Doo anaasee Eeroodia nammarifa rakisinoo fifiufanoo aruaninna faasaana paqurinau. Mi fasaanna faiqí Eeroodeefa Eeroodia nammarina afaaqi narí anoofa narí maqoo faasaannara iriseenoo qoomaqa firaana suqaseeno kaamanna uriqararausa faqa sundiauqa uriqararausa faqa Kariree maqa maaqaki faiqí firaasa faqa naaramasoofaqa anireeqa nee mariqau.

22-25 Misa nee marufanoo anaasee Eeroodia nammarina araamuna fannoo anireenoo misa noorinni idi amiqirana raidanoo aqoori raqee marinau. Aqoori raqee marufaqa misa irufanoo adiafaa qufanoo Eeroodeefa qoomaqa nimiufa mi manaaqana aaramasee aiqamausa nifusaa qimaminau, ani amiqira idi akiaqara nana ainainee qinaqee amianauree qinau. Sia kai ufa kai qinau narí amana naaree aqiqamaseenoo qimaminau, Anee nana ainainaree aididanoo fee anee qinaqa mi ainainna ani amianaura. Anee Kariree maqa maaqa dinni rakisianee qinaqa qinee qambaana oosusee dinni ani amianana anee misasaa rakisia qufanoo narí anoofinai oonureenoo qinau, nanaree qimamianauree qufanoo mina anoofa maqee Yoohaneefa nammari nimi marifa kuquanifee qimasee Eeroodeenara qikaru qiandoo qimaseenoo akiaqa tupumma maree minisaifaqa qeeqa qifunnoo mina qafamasee kuqaa kuqiifoo qianauree qimasee narí araamuna qimaminau. Yoohaneefa nammari nimimarina mina anuka ateeka maree mina akiaqa mini qimiaqeera kai qia qufanoo mina araamuna fannoo anirandeenoo sandee oonureenoo Eeroodeena qimaminoo afeekaikamandee qimaminau anee maqee uqanna Yoohaneefa nammari nimimarina anuka tuqusee fidika maaqamau iandoora qimasee saqari difaaniki akiaqa quqasee mini qimiannee qufanoo Eeroodeefa firaaqoo uqanna akooqamafinau. 26-28 Akooqoofanoo sia amana qaoo qinau. Aiqamausa nifusaa narí amana aqiqamasoonara asauruseenoo narí sundia moo aqiqoofanoo karafusa marunaki oonureenoo Yoohaneena anuka ateekaseenoo saqari difaaniki mina akiaqa quqaseenoo maree mini Eeroodia nammarina araamuna amufanoo mifa mareeqeenoo narí anoona aminau.

29 Yoohaneefa nammari nimimaruna faiqi namu mifa kuqunara irisee ani mina iri maree munu akundaqau.

30 Yisufa narí faiqi namu niqiqoofaqa maqusa maqusa nidaqa qimannimunara faqa auqoonara faqa Yisuna mini qimamiqau. 31-32 Qimamimarufaqa faiqí anaasee moomoosa aniree qumbiqafunara narana narafa sia amanaikufanoo Yisufa narí faiqi namu maaqi qimasee qimanniminau. Aniaqa innisaimbaqa faiqí sia mariannai oonuree idooaaqa. Miqi qimaseenoo narí faiqi namufaqa nammari afainni ooquree kanuqaki akaramafufaqa nammari amuaqumau fiqau.

33 Faiqí anaasee moomoosa nindafamaseeqa oo Yisufammi maqi qimasee nári maqusaki nári maqusakiqari oonu maree ani mareeufaqa Yisuna kanuqa fannoo munu maqanamu raquru amufanoo nindafoofaqa faiqí anaasee moomoosa faasai afainni qusi mariqau. 34 Yisufa kanuqakiqari maqasaa aqufinoo faiqí anaasee moomoo nindafamasoofanoo firaaqoo amuqusufanoo qinau. Oo maaqoo mariasa sipsipa aandaurafoora rakisirafa siaisa mariafanoo fee qimaseenoo Anutuna ufa oosana oosana ainainara qimanniminau. 35-38 Eenoofaqa Yisuna faiqi namu Yisuna qimamiqau, doo eendidanoo anee niqiqainaqa kaqikaa maqusakiaqa narana feefauriaqa maaqoo faiqí siaiqoo maridanoo fee qufanoo Yisufa qinau inneeqa kai narana nimiaqa qufaqa misa qiqau, maasa sia amanaikianaura maasa moomoo ooni mareeqa oonu moomoo feemu feefaurumasee minisee nimianaqa naifanoo sia amanaikiannoo, maasa sia amanaikidaqa qufanoo Yisufa qinau. Inni feemu naqummee maridanoo oonu qafaaqa qufaqa misa oonu qafamaseeqa aniree qimamiqau, maasa feemu moodaanai qisaukunamu, noodaanna qaaraqanda faqa maridanoo fee qufanoo.

39-40 Yisufa qimanniminoo qinau. Innee faiqí aanaaseera qifaqa misa raina rainamafinaqa naadu naadu ruumbaku finaqa qusau rasoonookamasee ooqumari maree fuaqa qufaqa faiqí anaasee eedoo qimasee ruumbakiranakiqari padimambufaqa ooqu marifiqau. Akaqa ruumbakiranakiqari wan handareeta mariqau akaqa ruumbakiranakiqari qaara fasiqa niku nisauku taikasee qisaukuqara taikasee fasiqa anaasee mariqau. 41-42 Ooqu marifufanoo Yisufa mi moodaannai qisauku feemuna qumaree noodaannaqara faqa qumaree sandaaqai oori uqeerasee Anutunara dufi dufi qimaseenoo mi feemuna ruqi ruqi mandeenoo narí faiqi namu nisaukuki quqasoofaqa faiqí anaasee ooqu mariranakiaqa nimi maree fimariqau. Yisufa miqikai inoo noodaanna faqa ruqi ruqi mannimufaqa mina faqa nimi maree fufaqa noofanoo nimuaqufaqa akaqana kaqi quqaqau. 43 Yisuna faiqi namu mina ataraasa qumaree qisaukuqara taikasee qikunni ooqu qaara marasee uqa qumbiqaqau. 44 Mi naranna nee marusa faifa tauseenna fasiqa mariqau, anaasee faqa faiqiuqaindi faqa mariqau. Ooni saqari auqusee moomoo uqanna mariunara faifa tauseenna fee qinoo maridanoo.

45 Yisuna faiqi namu narana ataraasa mara maroofanoo Yisufa narí faiqi namuara afeekaikamandee fuki faaki qinoo niqiqoofaqa misa mina afunni kanuqaki akaramafi Beetasaida maqusai nammari dinni afainni fiqau. 46 Misa fimarufanoo Yisufa faiqí anaasee niqiqamasoofaqa fufanoo mifa narí faiqi namu nimanda maseenoo naríara amuaqunamusaa ooru maridanoo Anutunara innaaru qimarinau.

47-49 Eendufanoo Yisuna faiqi namu kanuqaki nammari qambaanai nimarufanoo Yisufa naríara maqasaa maridanoo misa nindafoofanoo ufai fannoo misa noorindari anidanoo kanuqa mara furufarimarufaqa purannai puridaqa kadaapindi mariqau. Inaaqiana kookooraana ufaqi maru kamuqoo Yisufa misunnai fidanoo nammari amuaqumau aiku ramasee finau. Mifa kanuqakinaasa finnaaqareera foora fimarufaqa Yisuna faiqi namu afaanna fee qimasee rufiasee faaqariqau. 50-51 Misa faaqarumasoofanoo Yisufa qimanniminoo qinau. Sia maparaa iaqa nifaaqa quqasee kasooiaqa qineemma anidaqa. Yisufa miqi qimaseenoo misa faqa kanuqaki akaramafufanoo misaki ooqumari fufanoo ufai fannoo taikafinau. Taikafufaqa Yisuna faiqi namu maparaa iqa naundura faqa furufariqau. 52 Yisufa moodaanai qisauku feemu ruqi ruqi mandee nimufaqa noofanoo amanaikunara mina faiqi namu sia mina anoonara andeeqasee irusa maridaqa nammari amuaqumau anunara faqa sia iriqau.

53-55 Misa miqooqari kanuqaki nammari amuaqumau fiqa munu maqa raquramufaqa fitaqa mareeqa mafi kanuqa qususeeqa doo Keeneesareeta maqa maaqammifoo qimaseeqa kanuqakiqari aqufiqa maqasaa oorufufaqa misaqa marusa miqooqaraasa Yisufammifoo qimaseeqa sandeeqa maqusa maqusa qimannimufaqa nariqa aurimarusa qaarisa rumba maraidaqa yatinnai fee Yisufa fuannoo fee qimasaida aurimariasa qaarisaa rumba maraidaqa Yisuna oorinni mini quqee mariqau.

56 Yisufa ya maqusanai fee ya taunnaki fee ya ainaini marunaki fee finau nári aurimarusa nifiqa maraidaqa mifa funnai munu makeetaki firaa saqa marunaki quqasee Yisunara nári nimuqusa ookiqari firaaqoo qimamiqau. Maasa sia kadaapi amirara qimamidaqa aurimariasa ani qamunna ati kai auqamasaida findififara qidaqee qufanoo Yisufa eedoo qufaqa mina qamunna auqee marusa amiqi mandee findifi mariqau.