1 Yisufa kaqi qimannimidanoo maa ufana faqa qimanniminoo qinau, innee iriaqa innee maaqoo mariasakiqari akaqausa sia kuqirai kaqi marina kamuqoo Anutuna ququsa afeekaikamandee qumirana innee mina qafeefaranoo. Sia taikara faasaanara qidaqa kaqi kasaaqaindari qumiranara qidaqa.

2 Doo miqooqari dinni qisauku taikasee dinni ani moodaa marasee afuru faiqeenoo doo findimeeqeenoo Yisufa Peetooroona faqa Yameesana faqa Yoohaneena faqa doo minamusa faqa aaqana kisaaqasaa nifiqamaree oorureenoo aadumasaa sia faiqí maruqoo oorureenoo miqoo misa nifusaa Yisuna afaaqa qamunna moo kammafinau. 3 Mina qamunna aiqama dupuqa aruaqufufanoo aiqama eekara aruaqufufanoo nifu faqa daroo daraa inau. Sia maqasaaqaraa fasiqa amana qamunna miqimandeeqa nammari uqusaifanoo eekara arinoo dupuqara maqi aruaquannoo. 4 Eeriaasa faqa Mooseesa faqa ooqai tamummaqara fasiqaqanda maridaqa kuqiqa ooru fuqanda miqoo aaqanasaa Yisuna faiqinamu nifusaa kooroomafufaqa Yisuna faqa ufa qimarufaqa Yisuna faiqinamu nindafaqau. 5-7 Nindafaidaqa firaaqoo maparaaida rufiaidaqa ufa qiranara randee marufanoo Peetooroofa Yisuna aaramaseenoo qinau Oo ufasaa rakisira maasa maaqoo marunanoo amiqimminoo amanee maasa maaqoo uqiqaana maqa qaaramoo auquanauree, aniara moo Mooseenara moo Eerianara moo usakaanauree. Rufiaqa rufiaqidanoo ufa qiranara randoosia miqi qinau. Miqi qimasoofanoo asuru fannoo anireenoo aiqama misa dukunimaqasoofanoo asurukiqari ufa moo kambiqeenoo maaqi qinau. Maafa qini qimuqusira qimaaku marifa, innee mina ufa kai iriaqa. 8 Yisuna faiqinamu mi ufana iriseeqa kaqi kaqi miqoo munu randee mini randee ufanoo, sia faiqí miqoo marufanoo Yisufa kai miqoo misa faqa marinau.

9 Mi ainainafa taikoofaqa misa Yisuna saimbaqa mi aaqannasaaqari ooqu fimarufanoo Yisufa maaqi qimasee afeekaikamandee qimanniminau. Innee meerai aaqanasaa qafaanara ooquree sia uqanna qimannimiaqa. Qinee faiqí nimaaku kuqiranakiqari findi fuannaqoo miqoo kai qimannimiaqa. 10-11 Mi faiqinamusa eedoo qimasee sia qimannimiqau, Yisufa kuqiranakiqari findifuaninnara minara kai narí qimami narí qimami umee kai qimariqau. Misa miqi qidaqa Yisuna iramiriqa qiqau, Mooseena sandufa akoofasauqa minakiqari maaqi qidaqa. Faiqí moo fannoo Eeriaafarafoo qira fasiqa mifa naaree findifumafinanoo miqooqari Anutuna asauku mundirafa kambiqaannoo fee qidaqa. Misa miqi qidaqa nanee fee qidee miqi qidee qufanoo Yisufa maaqi qimasee qimanniminoo qinau. 12-13 Kuqaa Eeriaafara maqi kambiqafinoo asauku mundirausa qinee aniannanara deedaqinoo. Doo qinee inni qimannimidaqa. Doo Eeriaafara maqi moo auqu Yoohaneefa nammari nimimarufa doo ooqai kambiqafi marufaqa faiqí anaasee akaqausa sia irirai tamummaqarausa ufamau fiqa nári manda nidiranakoo mareeqee mina kuqarusaqau. Qinee kafaa innimma irammirianaura tamummaqara fasiqauqa nanaree misa faiqí nimaakuara aupurarana firaana amiseeqa mareeqee aquseefaree.

14 Misa miqi qimammaree aaqanasaaqari ooqu fiufaqa Yisuna faiqi namu akaqausa sia ooru fusa maruqoo ooqu paqurimasee faiqí anaasee moomoosa suqimarufaqa ooqu nindafaqau. Mooseena sandufasaa rakisimarusa akaqausa miqoo faqa maridaqa Yisuna faiqi namu faqa ufa rainee mariqau. 15 Faiqí anaasee Yisuna qafamasee tautumasee sandee mifunnai oonureeqa amandaqau. 16-17 Yisufa anireenoo narí faiqi namu qimanniminoo qinau, nana ufaree innee Mooseena sandufasaa rakisi mariasa faqa ufa rainaidee qufanoo faiqí moo fannoo faiqí aanaaseekiqari Yisuna qimaminau. Qinee qeeqa qimaaku afiqee anee ianannai anidaqa. Manda afaanna fannoo mina aunduraki keeqafi marifanoo siamma ufa qidanoo. 18 Mi afaannafa mi faiqina arifanoo maqasaa kuqaki kuqaki aqufifanoo aiku asauku pipisaaqa qusufifanoo amaaqini datimambifanoo ookiqari qaqaara kai aniraidanoo. Qinee ani faiqi namu maaqoo mariasara afaanna afaqaaqee qunaqa misa miqiafanoo sia amanaikifaqa ani qimamidaqa.

19-20 Yisufa iriseenoo aiqama faiqí anaasee qimanniminau. Inni firaaqoo uqanna sia irirana qinisaa rusimarifanoo qinee kisaaqasaa fee inni manda furufarira ummaara dadaaqiqa nuanauree. Mi kumaaraana afiqamaree mai aniaqa qufaqa misa mi kumaaraana afiqee munusoofanoo minakinaa afaanna fannoo Yisuna qafamaseenoo mi kumaaraana mareeqeenoo fuseenasana aaku amaqaseenoo maqasaa rutuku quqasoofanoo mi kumaaraafa maqasaa aqufinoo quanda qaandi marufanoo qaqaara ookiqari ururama teeqinau. 21 Yisufa mina akoona irammirinoo qinau maafa kisaaqasaa maaqinoo mari fee qufanoo mina akoofa qinau Eeoo faiqi aanaaqisaaqari miqi marinau. 22 Moomoo kari mi afaannafa mina kuqaruanee qimaseenoo idaki fee nammariki fee kaqi mara aqi marufa maridanoo. Anee amanaikinana maasara amuqusinana dadaaqia. 23 Yisufa iriseenoo qinau sia qiniara amanaikiannee qia aneenna kai qinisaa irirana rusiranara kai iria. Faiqí Anutunasaa irirana rusimarifa aiqama ainaina amanaikammiannoo.

24-26 Mi kumaaraana akoofa mina iriseenoo faaqa quqaseenoo Yisuna qimaminoo qinau eeoo qinee anisaa irirana rusimarunausa maridaqa sia amanaikidaqa anee dadaaqia qufanoo Yisufa faiqí anaasee dindari dindari ani usufufanoo nindafeenoo misa qini ititaqimaqeefoo qimaseenoo mi kumaaraana aundurakinaa afaanna amambaina qimamiseenoo qinau. Qinee ani qimamidaqa mi kumaaraana aundurakiqari rafudamaki sandamafinana sia uqanna kafaa ani keeqaa qufanoo mi afaannafa faaqa quqaseenoo firaa fuseena sana mi kumaaraana aaku amaqaseenoo maqasaa rutuku quqaseenoo doo raudamaki sandamafufanoo mi kumaaraafa kuqiara foora maqasaa rumafufanoo aiku asauku pipisaaqa qususeenoo kuqiara foora mambinau. Miqi mambufaqa faiqí ani qafee doo kuqiifoo qiqau. 27 Miqi qufanoo Yisufa mina asauku qumaroofanoo doo findi finau.

28-29 Miqooqari Yisufa moo maqaki keeqafufaqa mina faiqi namu kukeeqasee aniree irammiriqa qiqau. Maasa nanaree mi kumaaraana aundurakinaa afaanna aqiqarara anuqi fee qufanoo Yisufa qinau Anutunara innaaruqirafa kai miqira afaannauqa niqiqaina fifaranoo sia moo ainainannai niqiqeefaranoo.

30-31 Misa mi maqusanaindari quqasee Kariree maqa maaqaki narí faiqi namu faqa faiqí anaasee sia iriaqee qimasee narí faiqi namu oosana oosana ufa qimannimiani qimaseenoo fidanoo Kariree maqa maaqakiaqa fidanoo qimanniminoo finau. Mifa maaqi qimasee qimanniminau. Faiqí misa qini faiqí nimaaku qumare̱eqee faiqí nisaukuki quqaqisaifaqa misa qini kuqa darusaifanoo qaaramoo faasaana aiqarainanoo Anutufa kuqiranakiqari qini mara findifumaqisaannoo. 32 Mina faiqi namu mi ufana iriseeqa sia mina oosanara iriqau irammirirana faqa sia irammiriqau rufiasee kaqi mariqau.

33-34 Misa Kapeeranaumma maqusai anireeqa maaqaki keeqafufanoo Yisufa narí faiqi namu irammirinoo qinau. Maasa aanai animarunaqa innee nana raiqara ufee qifee misa nisaurusee sia qimamiqau. Misa narikiqari yafee uriqararafa mariannoo qimasee minara raiqeeqa nisaurusee sia Yisuna ufa qimamiqau. 35 Yisufa ooqu marifinoo narí faiqi namu aiqama naaramasee mai aniaqee qimasee maaqi qimasee qimanniminau. Faiqí moo fannoo maqasaa mariasaki uriqararafaikinafa mifa narí kai ureeqaranaki fuannoo mifa aiqamausa dadaaqidanoo amiqira saika faqa nikooqeemari saikana faqa dadaaqiannoo. 36 Yisufa miqi qimaseenoo faiqi aanaaqi moodaa mareeqee misa noorinni kikiqamaseenoo asaukunnai mina kaqaramma qumareenoo qimanniminoo qinau. 37 Faiqí anaasee moo fannoo maaqira kaqikaa faiqi qini ufara irisee oonu asasamasee aqoondikinafa sia irirainni qini Yisusa faqa qiqoondikidanoo. Yafee moo fannoo qini oonu qifiqainafa sia qini kai qifiqaannoo qini diqiqoona faqa oonu afiqaidanoo.

38 Yoohaneefa Yisuna qimaminoo qinau, Oo ufasaa rakisirafa faiqí moo fannoo moosaa manda faafasaaqa naundurai mariasa ani auqusaa qimasee niqiqeemaru qafaqiafana, mifa sia maasaki nimarufa marunara qaoo qiqiafana. 39 Yisufa mina iriseenoo maaqi qinau sia minara qaoo qia. Mifa qini duqusaa moo firaa ainaina auqamaseenoo sia amana quandaki qini diqiannoo. 40 Maasa aana ititee mariasa maasa namuqaa maridaqa. Sia maasa aana ititee mariasa sia namuqaa maridaqa maasa qifeeqaree mariasa maridaqa minara sia mi fasiqanara qaoo qia. 41 Innee maa ufana iriaqa Innee nammariara nidinaqa innaaru qifanoo faiqí moo fannoo inniara asauku mundirana faiqi namu mariafanoo fee qimaseenoo nammari inni niminanoo Anutufa mina akiaqara mi fasiqana innaarunai quqamaqaannoo.

42 Miqi qimaseenoo Yisufa mi kaqikaa faiqina faasai misa noorinni kikiqunara kafaa qimanniminoo qinau, maaqira kaqikaa faiqi irirana qinisaa rusimarinafa moo fannoo mina mandoosana uqafiqainafa mi fasiqafa Anutuna firaa aqurararana ameemaanai mariannoo. Misa miqinna fasiqana qumaree firaa oonitia anukaki quqasee rumbasee afeeqa amifanoo ooruku nammariki aqufinoo kuqinoo oonu dupira arirafa mariannoo. Kaqikaa faiqi qinisaaqaraa irirana moosaa ubeekee marinafa firaa arirafa mariannoo. 43 Aninna asauku fannoo anirarisameeqeenoo mandoosanaki ubeekee marina mina ateeka aqua. Moodaa asauku faqaafa naaru asumu mariranaki firafa amana maridanoo. Aiqama asaukuqara faqaafa naaru naaru sia qimbeemari idanaki firafa mandaikirafa maridanoo. [ 44 Miqoo naaru naaru kadiaru sia kuqidanoo kaqi maridanoo ida faqa sia dimbee marifa kaqi qaida mariannoo.] 45 Aninna aiku fannoo ani rarisameeqeenoo mandoosanaki ubeekainnana mi aikuna ateeka aqua. Anee moodaa aiku faqaafa naaru asumu mariranaki firafa amana maria. Aiqama aikuqara faqaafa idaki aqufirafa sia andeeqanoo mariani. [ 46 Mi idanaki faiqí neemaria kadiarusa sia kuqidaqa ida fannoo faqa sia qimbaidanoo.] 47 Aninna afu aaqoo fannoo ani mareeqee Anutuna ufamau firanakiqari kaqinni ubeekee marina mina imbasaa. Anee moodaa afu aaqoo faqaafa Anutuna ququsaki keeqarana amana maria. Qaara afu aaqoo faqaafa idaki aqufirafa sia andeeqanoo mariani. 48 Miqoo faiqí neemaria kadiarusa naaru naaru sia kuqidaqa ida faqa naaru naaru sia dimbaida kaqi qaida maridanoo. 49 Anutufa ida qumareenoo nimanamandee qafarana ooruku anoonara foora aiqama qusasaa adia nimaqainaqa Anutuna ufasaa mapukufi mariaqeera nimaniannoo. 50 Ooruku amiqira ainaina maridanoo mina adiafaa irafa taikafinanoo naqimmasee adiafaairana maraannoo fee sia amanaikiannoo. Innee inneeqa naunduraki narinni narinni ooruku faqaasara foora maridaqa narinni narinni asooaranaki mariaqa.