16
Anaaseeuqa madikaki oonu qafaqau.
(Mat 28:1-8; Ruk 24:1-12; Yoh 20:1-10)
1 Yisuna iri kaqi ooni aamaraki marufaqa Mariana amarafa Makadara maqusaindaraafa faqa Mariana moo amarafa Yameesana anoofa faqa moo anaasee Saroomeesa faqa Sabata faasaana aiqaroofaqa kuqimariasa akunnimaqee maria marasinna feefaurumamaree Yisuna irisaa akuanee qimasee mi eendanaki deedaqiqau.
2 Kananaana iqaqoofanoo suani maqee ururoofaqa mi anaaseesa Yisuna akundoo ooni aamaranaki fiqau. 3-4 Aanai fidaqa misa narí qimami narí qimami qiqau, firaa oonitia fannoo ooni aamara ititanoo marifaqa yafee dadaaqinaqee umbaqi quqasee fee marasinna aku amaqeefaree qimasee oonu qafoofanoo ooni faasai quanda quandammeeqee mafi aquqoofanoo marinau. 5 Misa ooni qafamasee ooni aamaraki keeqafi qafoofanoo asauku uqannai kumaaraa moo fannoo qamunna eekara arirana afisusee ooqu marifufaqa qafamasee tautumasee kaaqa rufiaqau. 6-7 Tautumasee rufioofanoo mi kumaaraafa qimanniminoo qinau sia tautumasee rufiaaqa. Innee Yisu Nasareetee maqusaindaraana aunirira saqarisaa pirimmannai aruanara randee mariafanoo, mifa sia maaqoo maridanoo findi finoo maridanoo. Doo qafaaqa, maaqoo misa mina iri quqeeaa. Doo fuaqa maa ufana narí faiqi namufaqa Peetooroona faqa qimannimiaqa. Yisufa inni noorinni Kariree maqa maaqai finoo, innee miqoo oonureeqa narí qundee kai iqa mina qafeefaranoo.
8 Mi anaaseeuqa mina iriseeqa ooni aamarakiqari rafudamakufaqa sandamaqaraasammiqau. Kaaqa rufiarana faqa naindiri roofaqa sandaqau. Misa maqusai oonureeqa kaaqa rufiasee sia moosa qimannimiqau. 9 Yuda maqannaasa Saririqara amaanasaa fee qimasee amaanasaara indaaruqaa faasaanee qimariqau. Mi indaaruqaa faasaanna sandoo anaasee namusa anu faasaanasaa Mariafa Makadara maqusaindaraafa naaree Yisufa findifuna qafanau. Ooqai Yisufa kaqi maru kamuqoo faafasaaqa narí anoona amarana mi Mariana aunduraki faafasaaqa qisauku dinni taikasee dinni ani qaara marasee marufanoo Yisufa kaqi maruqoo mina aunduraindaraa faafasaaqa niqiqoofaqa rafudamaki sandamafiqau. Yisufa mi anaaseena afusaa narí kuqiranakiqari findifuna indaaru kooroo inau. 10 Yisufa mi anaaseena afusaa kooroomambunara Yisuna aiku asauku oonu maaqi qimasee qimanniminau, 11 Yisufa kuqiranakiqari findifinoo marifaqa qinee qafeeqee qufaqa misa kaqi minara soofaaridaqa ikiraqee maruqoo marufaqa mi anaaseenara unna qiifoo qiqau.
Yisufa kuqiranakiqari findifinoo narí faiqi namukiqari qaaraqanda kooroo inau.
(Ruk 24:13-35)
12-13 Yisufa kafaa moo oosana maraseenoo narí faiqi namukina qaaraqanda nifusaa kooroo inau. Miqanda Yeerusaree maqusaindari moo maqusa kaqikaa maqusai fimarufanoo Yisufa aanai nifusaa kooroomambufaqa miqanda oonurandee aniree Yisuna aiku asauku qimannimufaqa unna fee qiqau.
Yisufa narí faiqinamuki kooroo inau.
(Mat 28:16-20; Ruk 24:36-49; Yoh 20:19-23; NiFa 1:6-8)
14 Yisufa mina inaaqiana narí faiqi namu qisaukuqara taikasee qikunni ooqu moodaa mararausa narana nee marufanoo kooroo inau. Kooroomafinoo misa mina qafee marusa unna fee qunara niqinoo qinau, inni irirafa ufa rukiee marisa mariafanoo sia qiqafee mariasa ufara innee irimariafanoo.
15 Yisufa miqi qimasee qimannimiseenoo kafaa maaqi qimasee qimanniminau. Innee maa maqa maaqana afaaqasasa aiqama maqannaa iannai uqanna oonureeqa qini amiqira fasaasa ufa qimannimiaqa 16 Qinisaa irirana rusimariasa irirana rusidaqa nammari maree mariasa misa innaarunai naaru marira asumu mareefaranoo. Qinisaa sia irirana rusimariasa misa nariranaki fifaranoo. 17 Qinisaa irirana rusimariasa maa afeeka ainainna misaki marinaqa qafeefaranoo, misa faiqí naundurakinaa faafasaaqa qini duqusaa niqiqeefaranoo misa moo maqannaasa ufa sia nári iri marianakiqari qifaranoo. 18 Faiqí kuqannarimari sakanifa ukaqanimisainaqa sia mandaikifaranoo. Misa ufaaqa namasee sia kuqifaranoo. Misa nári nisauku aurimariasasaa rusisaifaqa findi fifaranoo.
Yisufa innaarunai ooru fu ufafa.
(Ruk 24:50-53; NiFa 1:9-11)
19 Yisufa narí faiqi namu faqa ufa qiqisoofanoo Anutufa mina uqeereeqeenoo innaarunai narí aaqa asauku uqannai quqasoofanoo miqoo ooqu marinau. 20 Yisufa innaarunai ooru fufaqa mina faiqi namu aiqamai fifainidaqa Yisuna amiqira fasaasa ufa qimannimiqa niqau. Misa miqi marufanoo Karaambaiqa qumee dadaaqufanoo faiqí anaasee misa ufara kuqaa fee qiaqeera faiqí sia auqaaqaa ira afeeka nimufaqa auqoofanoo anoona kambiqee marinau.