1 Anutufa narí afaarirana maasa qimunara minara naqi fee qianauree. Maasa maaqi qimasee aaqamasee qianauree, maasa mandainaina aaqaranaki kaqi mariananoo Anutufa mina minnisaina afaarirafa firaanaikee iannoo fee qianauree. 2 Oo sia uqanna maasa miqi qianaura Yisufa aunirira saqarisaa kuqinau, maasa mina faqa kuqiira foora iqa marunnanara maqee maria mandainainakiqari kuqiira foora iqa maridaqa. Naqimasee maqee mari mandainainaki fuanauree doo kuqiara foora iqa maridaqa.

3 Innee maa ainainnara amiqimasee iridee sia fee iridee. Maasa Asauku mundirana Yisuna auqusaa nammari maraafannaqoo maasa Yisuna saimbaqa narí kuqiranaki keeqeeqa nammari mina kikiqa ususeeqa mareeqa. 4-5 Maasa nammari maraafannanannai maasa Yisuna namufaqa qikundeera foora iqa narí kuqirana naida qimidanoora foora qinoo, mina akoofa narí kaaqa areenara afeekannai narí asauku mundirana kuqiranakinaana mara findifuna, maasa miqi kai masee maasa fuka mariranaki mariaqeera qinoo maasa kuqiranakiqariara foora findifumaqisanau. Maasa Yisuna faqa kuqiqa moodaanaki kammidaqa miqikaimasee mina faqa findi fiqa mina moodaa kaqi mariranaki marianaura. 6 Maasa maa ainainna iridaqa, maasa manda marira nirana ameemaanai maridaqa. Doo maasa minakiqari idukuanifeera Anutufa maasa mareeqeenoo asauku mundirana faqa aunirira saqarisaa kuqannarinau. Maasa sia kaifaa ooqeenaa marirana maraqa nuaqeerau miqinau. 7 Miqinoo marifaqa maasa minara maaqi qidaqa, faiqí moo fannoo kuqinanoo mina manda marira nirana mina afaaqasaaqaraafa idukuannoo sia kafaa amana minaki nuannoo. Maasa Yisunasaimbaqa kuquafannanara miqi qidaqa. 8 Maasa Yisuna faqa kuqiranaki keeqaafanausee qidaqa maasa mina faqa findifi mariraree qidaqa.

9 Maasa asauku mundiranara doo kuqiranakiqari findifinoo sia kafaa kuquannoo miqunara kuqirana afeeka sia kaifaa rafaaqafuannoo fee qidaqa. 10 Mina kuqirafa mandainaina akiaqara arirafa moodaa kari kuqunara sia kaifaa maa maqanasaaqaraa mandainaina fannoo mina rafaaqafuannoo. Doo maasa mandainaina mina rafaaqafirana faqa, kuqirana faqa doo taikeenoo. Doo maqee findififa mina marirafa Anutuna faqa maridanoo. 11 Innee mi irirana marasee maaqimandee iriaqa. Maasa mandainainaki maridaqa kuqufiqa doo sia minaki maridaqa maasa faqa kuqirausa maridaqa doo maqee asauku mundirana Yisuna faqa kuqiranakiqari findi fiqa mina faqa Anutuna kaqi mariranaki maridaqee qidaqa.

12 Minara maqee manda marira nirana fannoo sia maasa qifaaqa rakisiqimaqaannoo, qaoo qiaqa. Sia maasa faiqí faiqi manda nidiranamau fuaqa. 13 Manda oosana moo inni qumarainaqa sia inniqa nifaaqa minakina eedoo qimasee quqaaqa. Sia miqiaqa maaqiaqa, innee kuqiranakiqari findifi mariasara foora aiqama nifaaqa eedoo qimasee Anutuna aramandunnai rumafifanoo mina inni nifaaqa mareeqeenoo narí andeeqara saikaki quqaanifeera mina aramandunnai inneeqa nifaaqa quqaaqa. 14 Maqee innee sia Mooseena sandufa nimaarusira ufa ameemaanai mariafanoo innee Anutuna afaarirana ameemaanai mariafanoo minara mandainaina fannoo sia inni rafaaqa fuannoo.

15 Maasa sia Mooseena sandufa nimaarusira ufa ameemaanai maridaqa Anutuna mandainaina minnisara afaarirana ameemaanai maridaqara qiqa manda oosanaki kaqi qifaaqa quqasee maraanauree. Oo sia uqanna. 16 Innee maanara iridaqa maasa Yuda maqannaa ooqeenaa oosana irimariafanoo, maasa akaqausa karafusara foora moo fasiqa qeeqa qifaaqa amisee mina ainaina auqamaisaidaqa. Yafasiqanee ainaina maisaanauree, mi fasiqana qeeqa qifaaqa mina aramandunnai quqasaananoo mifa qini rakisi qimaqainaqa mina ufara eedoo kai qianaura. Qinee manda oosanara faqa Anutuna ufa iriranara faqa miqandara qidaqa. Inneeqa nifaaqa mara maree manda oosana ameemaanai quqasaifanoo inni mareeqeenoo kuqiranaki quqannisaannoo, miqooqari mina dinni Anutunai ubeekamafi minufara eedoo qimasaifanoo mifa narí andeeqaranaki quqannisaannoo.

17-18 Oo Anutunara dufi dufi qiaqa. Innee ooqai mandainaina ufa ameemaanai marusa mariafanoo maqee innee inneeqa aiqamausa naundurannai qinee Pauroosa qimannimuna naamuaqira anoona ufa ameemaanai mariafanoo minara innee manda rumbaranaki marufanoo Anutufa idukunnisoofaqa mina andeeqara rumbaranaki fuafanoo. 19 Inneeqa faiqí faiqi sia afeeka irirana faqaasa mariasa mariafaqa qinee Pauroosa kaqi maa ufana inneeqa irimariana amana kai qimannimianaqa iriaqeera qimannimidaqa. Ooqai innee inneeqa nifaaqa faiqí faqa anaasee faqa nariara nariara fanandirana faqa oosana oosana mandainaina faqa moo faqa moo faqa aaku aakummafifaqa mariafanoo mina aramandunnai kai inneeqa nifaaqa quqasaafanoo doo maqee miqi kai iqa inneeqa nifaaqa aiqama andeeqara oosanamau fimariana aramandunnai quqasee maqeeidaqa naaquqara andeeqara mariranaki mariaqeera.

20 Ooqai innee manda oosana rumbaranaki maridaqa sia andeeqara ummaara ameemaanai mariqau sia minara irimariafanoo. 21 Mi manda ummarafa ooqai mariunara maqee nisauri mariafanoo. Innee mi mandainainaki maridaqa minakiqari nanee moo amiqira ainaina mareeusee. Maqee minara iriseeqa ooqai maraafannainainara nisaurirainaina maraqiafanoo qidaqa. Mi manda oosanamau fifiiufa kuqiranai kai ubeekee marinau. 22 Doo maqee innee mandainainakiqari idukiqa mariafanoo Anutuna rumbaranaki keeqafi mariafanoo. Doo innee miqiunara inni marirafa aiqama doo minaindi kakai mafi mariinaqa taikara aukuana innaarunai marirana inni nimiannoo. 23 Dinni manda oosana fannoo narí ainainimariasa naarama quqaseenoo narí ainainirana akiaqara feefauru nimidanoo mi feefaurufa kuqirafa kai maridanoo. Kafaa mina dinni Anutuna kaqi nimira ainaina innaarunai naaru marirafa sia ainainirana akiaqara maridanoo, mina asauku mundirafa maasa karaambaiqa Yisufa mina faqa moodaanaki kiqa maridaqa mina namufaqa innaarunai naaru marirana kaqi nimirafa mariannoo.