10
1 Oo qini qikaqaafasaauqa Roomma maqusai mariasa. Qeeqa qimuqusa ookiqari qeeqa maqannaasa Isaraee maqannaasara Yisufinnai aniree mina asumu marirana maraaqeera firaaqoo qimuqusidanoo. Qinee Pauroosa misara Anutufinnai firaaqoo innaaru qidaqa. 2 Misa Anutunara aidiranaki keeqaranara rirafa firaaqoo marifaqa qinee nindafaunaqa sia anoona iriranamau fida Anutunara ridaqa, kaqi runnambidaqa. 3 Misa Anutufa faiqí mareeqeenoo narí afusaa andeeqara oosanaki quqaranara sia irimariafaqa nariqa kai nári firoosana nariqa kai uqeerasee mi mau fidaqa, sia Anutuna andeeqaranaki fimaria oosana iriseeqa sia mina ameemaanai keeqaidaqa.
4 Anutuna asauku mundirafa Mooseena sandufamau Anutuna andeeqaranaki amanimariana aru taikeenoo narí Yisunasaa naaqoo rusimariasa kai Anutuna andeeqaranaki keeqaidaqa.
Asumu marira ufa sia nianai maridanoo, daaqa maridanoo.
5 Anutuna andeeqara oosanaki faiqí finara maaqi qimasee Mooseefa akara rinau. Faiqí moo fannoo aanaaqisaa findifunakiqari andeeqasee Mooseena sandufamau fidanoo sia moo kari aaqainafa amiqisaa finafa kuqinoo innaaruna asumu marirana maraannoo. 6-7 Kafaa mina dinni asauku mundirana saqarikiranannai asumu marirafa maaqimminoo maridanoo. Mooseefa kafaa minara maaqi qidanoo. Innee Mooseena sandufamau fimariasa fifau firaaqoo munari minari mariasa innaarunai asumu mariranaki firaree qimariasa. Innee innaarunai ooruree asauku mundiranara randasee paqurimasee afiqee qumu dadaaqianifee qimariana fifau sia amanaikimari ainainara fifau kadaapirumasee maree mariafanoo. Asauku mundirafa doo qumu marinoo. Innee fifau maqa ameemaanai ooqu keeqafi asauku mundiranara paqurimandee afiqee murusaifanoo mifa dadaaqianifee qimariafanoo fifau sia amanaikimari ainainara fifau kadaapiri mariafanoo. Asauku mundirafa doo kuqiranakiqari findifinoo maridanoo.
8 Akara fannoo maasa inni qimannimira ufara maaqi qidanoo. Anutuna qimannimira ufa inni naaqa maridanoo inni nifaurusaa maridanoo inni nimuqusaki maridanoo. Miqimmasee Mooseefa maasa faiqí anaasee qimannimimari ufanara Yisunasaa irirana mundiranara qidanoo. 9 Maaqi qimasee qimannimidaqa, anee aneenna afaurunnai Yisufa kuqaa karaambaiqa maridanoo fee qimasee, aneenna amuqusa ookiqari kuqaa Anutufa Yisuna kuqiranakinaana uqeeranau maqi qimasainanoo Anutufa narí asumu mariranaki ani mara quqaannoo.
10 Maasa qeeqa qimuqusannai Anutuna andeeqaranaki fidaqa qeeqa qifaurunnai mina kooroo iranannai Anutuna asumu mariranaki fidaqa. 11 Tamummaqarausa ufa minara maaqi qidanoo.
Anutunasaa irirana rusirafa sia mi rusiranarau kadooparaannoo.
12 Mi ufana aiqamausara qidanoo Yuda maqannaa faqa aanaamuru faqa sia rainarafa maridanoo Anutufa aiqamausa narí aaree mariasa dadaaqirafa maridanoo. Aiqamausa amana amana kai Anutufa narí aaree mariasa firaaqoo naundura marirana amiqi amiqimannimaqaannoo. 13 Tamummaqara fasiqa akarakinaafa minara maaqi qidanoo.
Aiqamausa karaambaiqa dadaaqianifeera aareemariasa misa Anutuna asumu mariranaki fifaranoo.
14 Naqimasee faiqí anaasee karaambaiqara sia irirana minasaa rusimarinausa aareefaree sia amana aareefaranoo. Sia karaambaiqara irimariasa naqimandee fee irirana minasaa rusifaree. Moo fannoo oonu qimanniminaqa irifaranoo sia oonuree qimannimifaqa sia irifaranoo. 15 Naqi fee maseenoo fee moo fannoo oonu qimannimiannoo fee moo afeeqaseeqa mina ati uaqeeifanoo amana oonu maridanoo qimannimiannoo. Tamummaqara fasiqa minara maaqi qimasee akara rumaqoofa maridanoo.
Amiqira fasaasa ufa maree animariasa anirafa amiqirafa maridanoo.
Tamummaqara fasiqa miqi qimaqoofa maridanoo.
16-17 Misa amiqira fasaasa ufa mini qimannimisoofaqa sia aiqamausa iriqau akaqausa kai iriqau. Eesaiaafa minara maaqi qimasee akara rinau. Oo karaambaiqa maasa qimannimira ufa yausee iriaa, akaqausa moodaa kai iriaa. Eesaiaafa miqi qimasoofaqa qinee Pauroosa minara maaqi qidaqa. Faiqí anaasee sia fifau kaqi Yisuna saqarikidaqa, mina aufakiana naaree irisee miqoo Yisuna saqarikidaqa, Yisuna aufakiana sia fifau naaqooki kambiqaannoo, faiqí qimannimiafanoo naaqooki kambiqafifaqa saqarikidaqa.
18 Qinee Pauroosa minara iraidaqa Yuda maqannaasa ooqaindari sia fee Anutuna ufa irideeaa. Eeoo kuqaa misa iriaa, akarakinaafa misara maaqi qidanoo.
Misa ufa fannoo aiqama maqa afaaqasasa Yuda maqannaa fimaruqoo daraaninau. Misa ufa fannoo maqa dinni dinni ati munu raquraminau.
19 Qinee Pauroosa kafaa iraidaqa, Isaraee maqannaa Anutuna ufa iriqee iqau sia fee iriqau. Mooseena ooqai akarakinaa ufa dauni qimaqimida maaqi qidanoo.
Qinee Anutusa qumee Isaraee maqannaasa naundurai saikiafanaqa fifau moo maqannaasara Anutuna ufa iridammiafoo qimasaidaqa rairai qimannimaqaidaqa. Qinee Anutusa qumee fuki faaki qunaqa furufarira maqannaasa qini ufa irisaifaqa qini faiqi namu Yuda maqannaasa mina qafamasee mi maqannaasara rairai qimasee doo mi rairai qiranannai nári faqa qini ufa irifaranoo.
20 Mooseefa miqi qimasoofanoo Eesaiaafa aranaiqi kooroomasee mi furufarira maqannaasa aanaamuruara maaqi qinau.
Qinee eedoo qimasaunaqa sia qiniara randeemaria fasiqa anaaseesa qini Anutusa paquriqa. Sia qini daaree mariasa nifusaa qinee oonu kikiqiqa.
21 Miqi qimaseenoo Isaraee maqannaasara maaqi qinau.
Qinee faasaambaasaana inni rafusira runaqa innee ufa rukieeqa kaqirunna fimaria maqannaasa maridaqa rafusiranara rufiee mariafanoo.