1 Na kakubu i lwe fali, kamna Faraon. Na di knan, di slengan tadag di kilil i yéél dnagit Nilu, 2 nun fitu baka too fye baweh na too mabù msut mdà di yéél, na mteb ale i dad sabat di kililan. 3 Kafnge én, lêman nun fitu baka msut mdà di yéél Nilu, bay too sasè baweh na too lahan, na samdan ale tadag di dad baka mabù di kilil i yéél. 4 Na knaan i dad baka lahan atù gine, i dad baka mabù. Kafnge én, tagukat Faraon. 5 Kabay lêman gkudang kenen, na lêman kamna. Na di knan teenan sbung fali dnagit trigu, na di skigan nun fitu tlangan, na too malbang na too fye baweh. 6 Là mlo nan, nun tmabò fitu tlanga, bay kufas mdà di too mgal na too minit i nus mbal fdu di banwe gulandè to. 7 Na fanlo i fitu tlanga kufas gine, i fitu tlanga i too malbang. Kafnge én, mukat Faraon, na gadean kamna.

8 Kabay, di kaflafusan too msamuk i nawa Faraon mdà di knan. Taman fngén i kdee dad to fulung mubad i kna, na dademe dad fulung faldam déén di banwe Idyif. Tulenan dale i dad knan, bay landè balù satu di dale i gamtulen kenen ku tan i gumtatek i dad knan.

9 Kafnge én, man i to gal mebe i binu ku Faraon, manan, “Amu, ani gafaldamgu gablà di salàgu di muna. 10 Muna fa, flabè ge di deg na di to gal tmaga fan, na fbilangguam gami, di gumnè i ulu di dad sundalu i gal munung. 11 Na satu kifu kamna gami, bay i gumtatek i knami sahal. 12 Na nun satu sawang lagi Hibru ditù, lifan i ulu i dad sundalu gal munung i bong gumneam ani gbol di gami. Na tulenmi kenen i knami, na nubadan di gami. 13 Na kdee i gmanan too gdòhò, du agu gasfulê di tagnè nimò, na i to gal tmaga fan fatlawéngam.”

14 Taman di kgadè Faraon ani, fngén Dyosif, na gasilla falwà di bilanggù. Di kafnge Dyosif mdis i kumin, na gamgili i klawehan, salu kenen di muna i harì.

15 Na man Faraon ku Dyosif, “Satu butang kamna agu, na landè to gamtulen deg ku tan i gumtatekan. Kabay lingegu, ge gamgubad i dad kna.”

16 Tmimel Dyosif, “I kfulung mubad i dad kna ise mdà di deg, bay alò Dwata gafgadè ge i gumtatekan, du fye nun gufyem.”

17 Na man Faraon, “Kamna agu tadag agu di kilil i yéél Nilu, na slenggu tadag déén, 18 nun fitu baka too mabù na fye baweh, msut mdà di yéél, na mteb sabat di kilil i yéél ani gine. 19 Na lêman nun fitu baka msut mdà di yéél, bay too lahan na sasè baweh. Làgu lmen mite i too sasè klahan dad baka ani dini di banwe Idyif. 20 Kafnge én, knaan dad baka lahan i dad fitu baka mabù. 21 Kabay balù mtila knaan, sadi landè knaanla, du lahan fa di kitegu dun. Kafnge én, gukat agu.

22 “Na lêman agu kamna, na teengu satu fali dnagit trigu, na fitu tlanga tmabò di skigan, na too malbang na fye baweh. 23 Kafnge én, lêmangu teen i fitu tlanga tmabò, bay mlanas na kufas tlangan, mdà di too mgal na minit i nus, mbal fdu di banwe gulandè to. 24 Na fanlo i dad fitu tlanga kufas ani gine, i dad fitu tlanga too malabang. Na tulengu dad knagu ani, di dad to fulung mubad i dad kna, kabay landè di dale gmadè mubad dun.”

25 Na man Dyosif di ku Faraon, “I lwe dad knam ani, satu alò gumtatekan. Tafgadè Dwata ge i fanan nimò. 26 I fitu too mabù baka, na fitu tlanga fali malbang, i gumtatekan fitu fali. Nun alò satu gumtatek i dad knam. 27 Na i fitu baka lahan gamtadol i fitu baka mabù, na i dad fitu tlanga i fali kufas, mdà di kgal na kinit i nus, fdu di banwe gulandè to, i gumtatekan fitu fali bong bitil.

28 “I gmangu di ge gine, too glut mkel kadang. Tafgadè Dwata ge i fanan nimò. 29 Du lam i fitu fali ani kadang, too bong gwè i dad to ulê i dad flala. Taman too lugel di klamang banwe Idyif klo fitu fali. 30 Kabay kakubu én, kel i fitu fali bong kbitil, na mdà di kbitil ani, i fitu fali i too lugel tamaglifet nan, du i banwe Idyif too malmo mdà di kbitil. 31 Hae, i too lugel tamaglifet kadang, du too maflayam kadang, du mdà di bong kbitil ani. 32 Na Faraon, fakna ge Dwata lwe dulê, du fye glabatam kenen sa too mimò kdee ani, na dnohoan là mlo ani.

33 “Taman fye ku fatlagad ge. Fye ku malék ge i to too fulung faldam, na too nun kaglabatan, na blém kenen i glal mebe i klamang banwe Idyif ani. 34 Na fye ku malék ge dademe ganlal, du ale mwè kadang i glime alel, ku gafat dad fla i dad to di klamang Idyif, di klo i fitu fali i too lugel. 35 Dekam ale too mwè i glime alel ani, klo i too lugel ani kadang, na blém di dale i glal samtifun, na musek i ulê i dad fla di kat man satu syudad, na funungla. 36 Na i dad busekla atù, i knaan i dad to di kakel i fitu fali kbitil dini di banwe Idyif, du fye là mati i dad to mdà di kalnusla.”

37 Na agin Faraon na i dademe dad ganlalan di fandam Dyosif. 38 Taman man i harì di dale, “Landè to fakayito teen fye fa di ku Dyosif ani, du Dwata samnagin kenen.”

39 Na man i harì di ku Dyosif, “Du tafgadè Dwata di ge gablà di kdee i fan kel ani, landè dademe to too fulung faldam na too nun kaglabatan salngad ge. 40 Taman blégu ge glal di banwe ani. Na balù tan i dekam i dad to, too ale mimen. Alò deg mdatah di ge, du deg sa i harì.”

41 Fadlug talù Faraon di ku Dyosif, manan, “Ani nalékta ge du mgimò gubirnador di klamang banwe Idyif.” 42 Kafnge én, nwè i harì i tising di tnaloan, na falsakan di tnalò Dyosif, du ilè kenen mgimò ulu. Na falsakan i too mabtas klaweh, na faslan i sla blawen. 43 Na fsakayan kenen i snakay gal dyol i kudà, gusmakay i mdatah salig i harì, na nun dad to dekan di muna Dyosif, du ale sa mkit, manla, “Falohyu kenen magu.” Na taman Dyosif i mgimò i gubrnador di klamang banwe Idyif.

44 Na lêman man i harì di ku Dyosif, “Balù deg sa i harì, bay là fakay ku i dad togu dini di banwe Idyif, mimò balù tan ku laam ale faloh.” 45 Na tanlas i harì dagit Dyosif, na dnagitan kenen Safénat Faniya. Fafwean kenen yaan i libun dnagit ku Asénat, i maan dnagit ku Fotiféras. Fotiféras ani, i mebe i dad to mangamfù di duh, déén di banwe On. Na du tagubirnador Dyosif, magu kenen du meye i klamang banwe Idyif. 46 Na Dyosif tlu falò fali i ktuan di kablé i harì di kenen glal. Na mdà Dyosif di muna i harì, du lamngab na tlang kenen di kdee dad banwe di klamang banwe Idyif. 47 Na klo i fitu fali, too bong ulê i fla. 48 Na fastifun Dyosif i lime alel di ulê i fla i dad to, na fbusekan di dad kat man satu syudad di klamang banwe Idyif. Na di kat man satu syudad nun santifun na busekla fdu di dee nligo di glibut di dale. 49 Na too bong tafastifun Dyosif, i kalbongan gambet i falak di mahin, du là gagan i mse dun du too bong. Ani duen tlag Dyosif mse dun, du too bong.

50 Na di là fa kel i kbitil, nun lwe dad ngà Dyosif lagi, du mngà Asénat. 51 Dnagit Dyosif i twege dunan Manasas, du manan, “Flana Dwata di deg i kaflayamgu di muna, na klidù nawagu i màgu na i dad gakedgu.” 52 Na dnagitan i twali dunan Ifraim, du manan, “Tablé Dwata di deg dad ngà dini di banwe ani, di gunun kaflayamgu.”

53-54 Too glut sa i gman Dyosif, du di kakubu i fitu fali i too nun ulê i dad fla, tambù i bong kbitil. I kbitil ani, galngab di dad dademe banwe, bay nun bong kakaan di banwe Idyif. 55 Na ku too bitil i dad to di Idyif, mni ale knaanla di harìla. Kabay manan di dale, “Ditù gamu di ku Dyosif, na nimenyu i dekan gamu.”

56 Di kbel i kbitil di klamang banwe Idyif, fukà Dyosif i dad gusamtifun i fali trigu, na fafablin i fali di dad to mnè di Idyif, du too sè i kbitil. 57 Na du too sè i kbitil di klamang banwe, balù i dad to di dademe banwe salu ale di Idyif, du mayad ale fali di ku Dyosif.