11
1 Knang Dwata i to mlimbung di ktimbangan,
bay i gulehewan i to tmimbang i glut ktimbang.
2 I to fdag, là mlo nun bong kyaan,
bay i to fdanaan i kton nun kfulungan.
3 I katlu i to matlu, mebe kenen di katlun,
bay i kabigkò i to sasè, mebe kenen di kalmon.
4 I dad knunam landè gukmamum di kakel i duh kfatim,
bay i katlum, i gafalwà ge di sasè kfati.
5 I katlu i to fye, én gafye i knean,
bay i ksasè i to sasè, én gafalmo kenen.
6 I katlu i to gsalig, i gafalwà kenen,
bay i to là gsalig, tamgikat kenen di sasè knayean.
7 Di kfati i to sasè, talandè i kdee imen nawan di tah tanà ani,
na i ksaligan di knunan landè gukelan.
8 I to matlu, galwà di samuk,
bay én baling nkel i samuk i to sasè.
9 I gman i to là faglut di Dwata, én gafalmo i demen to,
bay i kfulung i to matlu, én gafalwà i demen to.
10 Too kanlehew i dad to di banwe ku nun fye kel di dad to matlu,
na toola kanlehew i kfati dad to sasè.
11 Fagu di nimò i dad to matlu mbaling mdengeg i banwe,
bay fagu di talù i dad to sasè malmo i banwe.
12 I to madoy i demen to kulang kaglabatan,
bay i to nun kaglabat landè manan.
13 I to samtugad salék, là gsalig gutmulen i santulenam di kenen,
bay i to gsalig, là samtugad i santulenam di kenen.
14 Malmo i banwe ku landè to fulung mebe dun,
bay ku nun dee fulung mebe na fulung mngewe, nun ktanak di banwe.
15 Nsalam kadang ku makang ge mayad uteng i to laam dilè,
fye fa ku là ge makang di kenen.
16 I libun fye ldam, too mgafè,
bay i lagi labè, landè mafè kenen, én aloan gwè i knun.
17 Ku kamdo ge i demem to, én gafye i ktom,
bay ku fansaseam i demem to, fansaseam sa i ktom.
18 I sasè to, landè fye untungan,
bay i matlu to, nun fye untung toon gdawat.
19 Mlawil i to ku too ndà di nawan mimò i tlu,
bay i to too mayè mimò sasè, mlal mati.
20 Knang Dwata i dad to sasè fandam,
bay én toon kanlehew i dad to mimò matlu.
21 I kaglutan, là galwà i dad to sasè di kaflayam Dwata dale,
bay i dad to matlu falwaan.
22 Balù tan kafye baweh i libun, bay ku landè kaglabatan i fyenimò,
salngad kenen i tising blawen di ilung sdè.
23 I to matlu, én fatanan alò i fye,
bay i to sasè, én fatanan alò kalbut Dwata.
24 I to too mlé, too matnù i knunan,
bay i to là mayè mlé mbaling kenen landè.
25 Nun gufye di to too mlé,
du ku tnabengan i dad demen to na lêla kenen tnabeng.
26 Mnang nawa dad to i satu to fatan di kagket i btas mse klon fafabli dun,
bay dagla i to fadlug fabli.
27 Ku too ge mngabal fye, nafè ge,
bay ku mngabal ge sasè, sasè sa i teenam.
28 I to smalig di knunan, sasè knean salngad i dad doon mlanas dibang minit,
bay i to matlu, fye knean salngad i dad doon mbaling mlunu di bangulen.
29 I to mebe i ksamuk di malayan, di gusenan lana i knunan,
na i to là fulung faldam, mbaling kenen fasak di to fulung faldam.
30 I bunge i nimò i to matlu, én gamlawil i demen to,
bay i klabè, én gafalmo dun.
31 I kaglutan, ku glut nun untung di mgimò i to matlu di tah tanàani,
lumban fa nun untung di mgimò i to sasè na i to gamsalà.