13
1 I tingà fulung faldam too mayè flinge i fngewe i maan,
bay i tingà madoy too là flinge i kngak kenen.
2 I to gamdawat kenen i fye untung fagu di dad fye gmanan,
bay i to gal mgaw, gamdawat i untungan fagu di toon kayè mimòsamuk.
3 I to toon fangeye i dad manan, toon nifat i kton,
bay i to talù laan funa fandam i manan, falmon i kton.
4 I to là mayè mimò, too dee knibalan, bay landè kiboan gamwè dun,
bay i to too mayè mimò, gamwè balù tan i knayean.
5 I to matlu knangan i là glut,
bay i to sasè, sasè na magagyà i nimoan.
6 I to matlu, én kamlung kenen i dad fye nimoan,
bay i to gamsalà, én gafalmo kenen i dad sasè nimoan.
7 Nun dad to flingu nun knunla balù landè,
bay nun dademe dad to flingu landè knunla, balù nun bongknunla.
8 I to nun knun, i knunan gafalwà kenen di agot dad sasè tomantak kenen,
bay i to landè, landè to mantak kenen.
9 I dad to matlu, gambet i kalwa too fye knengan,
bay i dad to sasè, gambet i salò mudaf i nengan du kagunmati.
10 I to fdatah i kton, landè dademe gukelan ku là samuk,
bay i to flinge i fngewe, kenen fulung faldam.
11 I knun gwè mdà di mlal kfagu, too mlal sa lana,
bay i knun gwè fagu di tu, too lamnok.
12 Ku nun fatanam na là gdohò, too gdanà i nawam,
bay ku gdohò i knayè nawam, too ge lehew.
13 I to knangan flalò Dwata, én gafalmo kenen,
bay i to mlalò i flaloan nun gufyen.
14 I dad tdò i dad fulung faldam gamtabeng ge, gambet yéél mdà disfuten,
na ku laloam, gafalwaan ge di ksasè i gamgebe ge di fati.
15 I to nun kaglabat too mgafè,
bay i to là gsalig too malima gnagun.
16 I to fulung mebe i kton, funa faldam klon fa mimò,
bay i to là fulung faldam, fiten di kdee i klandè kfulungan.
17 I to là gsalig dek ftulen i tulen, mlé sa i ksamuk,
bay i to gsalig dek ftulen i tulen, én mlé ktanak.
18 I to là mayè flinge i fngewe kenen, kalima na kyà i mkel dikenen,
bay i to flinge i kngak kenen, nafè i dad to.
19 Ku gdohò i knayè nawam, too ge lehew,
na dad to là fulung faldam là mayè tmagak i sasè.
20 I to sgalak i dad to fulung faldam, kenen mbaling fulung faldam,
bay i to sgalak i dad to là fulung faldam nun kalmon.
21 I samuk samlalò i dad to gamsalà,
bay i kafye, én samlalò i dad to matlu.
22 I to fye, nun knunan tnagakan di dad ngà i dad ngaan,
bay i knun i to gamsalà, gfun i dad to matlu kadang di satu duh.
23 I tanà là magligo, ku magligo na fanla, gamlé gablà knaan i dadto landè,
bay dad to là matlu, làla faloh fafla.
24 I to là mlayam i tingaan di gugsalaan du fye matdò, landè kakdoni tingaan,
bay i to nun kakdon i tingaan, fanlayaman du fye matdò kenen.
25 I dad to matlu, too gablà i knaanla,
bay là tlag i kbitil i dad to sasè.